1 Timautes 5:21-25
Nqe cim:
“Koj tsis txhob maj tsa leejtwg” (1 Timautes 5:22a)
Lus nug xav:
– “Tsa tes” hauv nqe 22 muaj lub ntsiab li cas?
– Vim li cas timthawj Paulus qhia Timautes hais tias “tsis txhob maj tsa leejtwg”?
– Peb siv qhov no li cas rau kev xaiv tsa cov pab ua Vajtswv haujlwm hauv Pawg ntseeg?
Timthawj Paulus sau tsab ntawv no pab xibhwb hluas Timautes txog tej yam tseemceeb hauv kev coj Pawg ntseeg. Ua ntej ntawd, nws twb qhia qhov uas yuav ua rau cov txwjlaug uas koom nrog yus ua haujlwm thiab ua tib zoo tshuaj xyuas txog tej lus nkaug cov pab ua haujlwm. Hauv ntu Vajluskub hnub no Paulus qhia kom “tsis txhob maj tsa leejtwg” (nqe 22).
Txuas rau qhov haujlwm ntawm cov txwjlaug saud, ces lo lus “tsa tes” totaub lub ntsiab hais tias tabmeeg txhawb meejmom thiab cob haujlwm rau ib tus neeg los ua Vajtswv haujlwm. Nov yog ib tes haujlwm tseemceeb heev, muaj Vajtswv, Tswv Yexus thiab cov tim tswv ua timkhawv rau, vim li ntawd, tsis tsimnyog xav hais tias qhov ntawd yog txoj cai xwb tiamsis yog ib tes haujlwm ntawm sab ntsujplig, yuav tsum ua tib zoo saib, tsis txhob maj. Ua ntej ntawd, thaum timthawj Paulus qhia txog cov xibhwb, cov thawjcoj tus cwjpwm, nws tau cob lus meej hais tias: “Nej yuav tsum xub sim lawv tso, yog lawv ua tau nej mam li tsa lawv ua haujlwm” (1 Timautes 3:10).
Yuav tsum ua ncajncees kawg nkaus, tsis txhob xaiv ntsej muag thaum tsa tes tsa ib tug twg ua haujlwm (nqe 21). Ib tug neeg sawv rau ib tes haujlwm hauv ntiajteb no yuav tsum tau tabpov hais tias tsimnyog npaum cas, mas tus uas tau tsaws rau tes haujlwm sab ntsujplig yuav tsum tau Pawg ntseeg tshuaj xyuas kom zoo tshaj ntawd. Timthawj Paulus qhia Timautes hauv nqe 24-25, yuav tsum ua tib zoo tshuaj xyuas lawv tus cwjpwm ua ntej uas yuav tsa tes tsa lawv ua haujlwm. Pawg ntseeg cheem tsum kev txawj ntse thiab kev coj ntawm sab ntsujplig los xaiv cov pab ua haujlwm. Yuav txaus ntshai heev thaum maj nroos tsa ib tug neeg tsis muaj kev ntseeg ruaj khov, tsis muaj peevxwm, lossis muaj tus cwj pwm tsis zoo los ua thawj coj. Thiab kuj txaus ntshai ib yam nkaus li ntawd thaum ib tug thawjcoj muaj kev xaiv ntsej muag hauv kev tsa neeg ua haujlwm, uas cia nyiaj txiag, meejmom, lossis kev txheeb ze los cuam tshuam.
Kev ua haujlwm pab Pawg ntseeg tsis yog tsuas hais hnyav txog kev teeb tsa (tổ chức) thiab kev cai tswj xwb, tiamsis tseem yog feem xyuam sab ntsujplig tabmeeg ntawm Vajtswv. Xibhwb Timautes yuav tsum tas zog xyuam xim tshuaj xyuas lub neej, kev ntseeg thiab tus cwjpwm ntawm tus neeg raug xaiv. Txhua txoj kev txiav txim siab kev ua tus Tswv haujlwm puavleej cuamtshuam txog lwm tus lub neej sab ntsujplig thiab peb tus kheej. Timthawj Paulus hais meej hais tias “Tsis txhob maj tsa leejtwg ua Vajtswv tes haujlwm thiab tsis txhob mus nrog lwmtus koom lawv tej kev txhaum. Yuavtsum ceev koj tuskheej kom dawbhuv” (nqe 22 MWW2022). Txhais hais tias koj yuav tsum tswj koj lub neej kom dawbhuv, nov kuj yog lub plag kom “Koj tsis txhob maj tsa leejtwg”. Niaj hnub nim no Pawg ntseeg pheej muaj tsis txaus neeg pab ua haujlwm, tiamsis txhob vim li ntawd maj nroos tsa neeg, es tsis muaj kev ua tib zoo tshuaj xyuas. Thov Vajtswv pab kom peb txhua tus pom txog yus feem xyuam hauv kev xaiv tsa neeg los ua haujlwm pab Pawg ntseeg.
Thov Vajtswv,
Vajtswv, thov Koj pub rau cov thawjcoj coj Pawg ntseeg muaj kev txawj ntse thiab txawj ua tib zoo tshuaj xyuas xaiv neeg los ua haujlwm pab Pawg ntseeg, kom txhawb tau Pawg ntseeg thiab pab tau lwm tus lub neej sab ntsujplig. Nyuam yaus tuav Tswv Yexus Khetos lub npe thov, Amees.
Peb puas ua tib zoo xaiv cov pab ua haujlwm hauv Pawg ntseeg?
Nyeem Vajluskub hauv peb lub xyoos: Tshwmsim 12
Kênh Youtube BHKTHN:
