Klei Aê Diê Blŭ: Y-Mathiơ 24:14
Êlan kliăng: “Leh anăn arăng srăng mtô klei mrâo mrang jăk kơ ƀuôn ala mtao anei tar ƀar lăn ala jing klei hưn kơ jih jang găp djuê mnuih. Hlăk anăn hruê knhal tuč srăng truh” (Y-Mathiơ 24:14)
Klei êmuh ksiêm mĭn: Ya klei bi knăl kơ hruê knhal tuč Khua Yang Yêsu lŏ hưn brei thâo?Ya klei mdê mâo hlăm klei bi knăl anei? Si klei hriăm anei mñă kơ bruă klam drei?
Klei bi knăl knhal tuč Khua Yang hưn srăng truh hlăm ênuk knhal tuč, anăn jing klei đĭ kyar pral êdimima hlăm bruă hưn Klei Mrâo Mrang Jăk. Mơ̆ng hruê Khua Yang Yêsu mtă Klei Mtă Prŏng kơ phung khua ƀĭng kna: “Nao bĕ tar ƀar lăn ala leh anăn mtô klei mrâo mrang jăk kơ jih jang găp djuê mnuih” (Y-Markôs 16:15), phung khua ƀĭng kna leh anăn phung đăo kơ Krist ênuk êdei tinăn ăt hur har hưn Klei Mrâo Mrang Jăk, ƀiădah lĕ, hlăm ênuk knhal tuč bruă hưn Klei Mrâo Mrang Jăk ti lăn ala đi lar pral arăng ka tuôm ƀuh ôh.
Pruê̆ blŭ “hưn kơ jih jang găp djuê mnuih” amâo djŏ čiăng lač srăng mâo lu mnuih đăo kơ Khua Yang ôh, ƀiădah čiăng lač mâo lu mnuih tar ƀar lăn ala srăng mâo mmông myun dưi hmư̆ Klei Mrâo Mrang Jăk kơ klei bi mtlaih, mâo mmông myun dưi thâo kơ Khua Yang Yêsu jing Pô Bi Mtlaih. Sĭt nik srăng mâo đa đa mnuih mă tŭ Klei Mrâo Mrang Jăk Khua Yang Yêsu Krist. Anei jing sa klei bi knăl jăk snăk kyuadah măng ai mâo klei mplư mơ̆ng phung Krist soh leh anăn phung pô mtô soh, klei bi blah, klei ruă tưp leh anăn klei knap mñai ka tuôm mâo ôh êlâo tinăn, phung đăo sĭt tŭ klei arăng ngă jhat ktang, lu phung đăo amâo sĭt lui wir klei đăo…lu klei mkăn đa đa…, ƀiădah Klei Mrâo Mrang Jăk Krist ăt arăng hưn nanao, amâo mâo pô srăng dưi lač ñu ka tuôm hmư̆ ôh arăng hưn kơ klei bi mtlaih. Anei dưi yap jing mmông myun knhal tuč leh anăn kluôm ênŭm hĭn kơ jih jang mnuih, leh anăn – anăn jing klei pap knhal tuč mơ̆ng Ƀuôn Jăk Aê Diê, kyuadah êdei tinăn mtam ênuk klei pap srăng ruê̆ yơh, mmông myun kơ diñu mâo klei bi mtlaih amâo lŏ adôk ôh, kyuadah hlăk anăn klei knhal tuč srăng truh.
Brei Phung Sang Aê Diê hruê anei gĭr hlăm bruă bi mtlaih mnuih soh êjai mmông myun ăt adôk, msĕ si Khua ƀĭng kna Y-Pôl lač “Kyuadah sa ênuk srăng truh hlăk anăn arăng amâo lŏ čiăng hmư̆ ôh klei mtô sĭt, ƀiădah kyua diñu čiăng hmư̆ klei mơak diñu srăng ruah phung khua pô mtô tui si diñu pô khăp” (II Y-Timôthê 4:3). Drei ăt thâo mơh hŏng klei đĭ kyar hlăm bruă knhâo knhăk leh anăn bruă hưn bi lar klei mrâo snăn ênuk anei anôk taih kbưi hĭn hlăm lăn ala anei ăt dưi hmư̆ mơh Klei Mrâo Mrang Jăk. Ênuk drei hdĭp anei giăm snăk hŏng ênuk Klei Mrâo Mrang Jăk arăng srăng mtô tar ƀar lăn ala. Ti djiêô bruă hưn kơ phung ka thâo kral Khua Yang ôh, ăt brei drei čuă čhưn, bi mđĭ ai jih jang phung ayŏng amai adei đăo leh ƀiădah ăt dôk awăt hlăm klei đăo snei, “Đăm lui ôh klei bi kƀĭn msĕ si đa đa mưng ngă, ƀiădah bi mđĭ ai hdơ̆ng drei, leh anăn ngă klei anăn lu hĭn êjai diih ƀuh Hruê Krist giăm truh” (Hêbrơ 10:25), kyuadah drei thâo tơdah ênuk klei pap ruê̆ snăn mmông myun dưi mâo klei bi mtlaih amâo lŏ srăng adôk ôh.
Drei dôk hur har hlăm bruă mtô Klei Mrâo Mrang Jăk mơ̆?
Wah lač: Ơ Khua Yang khăp, brei kâo khăp kơ Ih leh anăn khăp kơ jih jang mnuih, đru kâo leh anăn Phung Sang Aê Diê hur har mtô Klei Mrâo Mrang Jăk Ih kơ phung riêng gah kâo êlâo kơ ênuk klei pap ruê̆. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
