Klei Aê Diê Blŭ: Y-Yôsuê 3:1-5
Êlan kliăng: “Bi doh bĕ diih pô, kyuadah mgi Yêhôwa srăng ngă klei yuôm bhăn ti krah diih” (Y-Yôsuê 3:5)
Klei êmuh ksiêm mĭn: Y-Yôsuê leh anăn phung ƀuôn sang kgŭ ưm ya pioh ngă? Ya klei ñu iêo jak brei phung ƀuôn sang ngă? Ya drei srăng ngă čiăng ƀuh “klei yuôm bhăn” Aê Diê ngă kơ klei hdĭp drei leh anăn kơ klei drei mă bruă kơ Ñu?
Mơ̆ng Sitim, Y-Yôsuê kgŭ ưm čiăng atăt phung Israel êbat hlăm brô 11 kilômet nao truh ti hang Yŭ êa krông Yurdan mdơ̆ng sang čhiăm đăm tinăn êlâo diñu găn êa krông. Tlâo hruê êdei, phung khua kahan găn mŭt tar ƀar wăl diñu leh anăn mtă kơ phung ƀuôn sang brei digơ̆ tui hlue hip klei bi mguôp phung khua ngă yang kkung. Diñu mtă kơ digơ̆ brei êbat kbưi mơ̆ng hip klei bi mguôp hlăm brô dua păn êtuh met čiăng kơ digơ̆ dưi thâo bĭt êlan digơ̆ srăng êbat (êlan 4). Tơdah phung ƀuôn sang êbat jŭm dar hip klei bi mguôp jing dleh snăk kơ digơ̆ tui dlăng kơ hip klei bi mguôp leh anăn tui hlue klei hip klei bi mguôp atăt êlan. Hŏng klei anăn digơ̆ dưi êbat hlăm êlan digơ̆ ka tuôm găn ôh êlâo (êlan 4) leh anăn ƀuh klei yuôm bhăn Aê Diê bi mbha êa. Êngao kơnăn, hip klei bi mguôp jing mnơ̆ng bi knăl kơ klei Aê Diê dôk ti krah phung ƀuôn sang kyuanăn brei digơ̆ dôk kbưi mơ̆ng hip klei bi mguôp čiăng bi êdah klei mpŭ kơ klei doh jăk Aê Diê (II Y-Samuel 6:6-7).
Čiăng prăp êmiêt kơ klei găn êa krông, Y-Yôsuê mtă kơ phung ƀuôn sang, “Bi doh bĕ diih pô, kyuadah mgi Yêhôwa srăng ngă klei yuôm bhăn ti krah diih” (êlan 5). Klei bi doh jing klei yuôm snăk čiăng prăp êmiêt brei phung ƀuôn sang ƀuh klei yuôm bhăn Aê Diê ngă ti krah digơ̆. Mphŭn dô, Aê Diê mtă kơ phung Israel brei digơ̆ bi doh digơ̆ pô čiăng prăp êmiêt guôn Ñu trŭn hriê ti anăp ală digơ̆ ti čư̆ Sinai. Hlăm dŭm hruê anăn, digơ̆ srăng pioh digơ̆ pô jing doh jăk, boh hĕ čhum ao, amâo ngă klei êkei mniê ôh (Klei Kbiă 19:10-15). Êlâo kơ mă tŭ klei Aê Diê hơêč hmưi, Y-Yakôp msĕ mơh lač kơ jih jang phung hlăm sang ñu: “Bi doh bĕ diih pô” (Klei Mphŭn Dơ̆ng 35:2), lui hĕ rup yang tue leh anăn bi mlih čhum ao. Tơdah Aê Diê dơ̆ng ngă bruă prŏng mdê kơ phung ƀuôn sang Ñu snăn brei digơ̆ mâo klei prăp êmiêt mơh (Klei Yap 11:18), brei digơ̆ pioh digơ̆ mdê mơ̆ng klei amâo doh, jing djăp mta klei dưi bi čhŏ klei bi mguôp ti krah digơ̆ hŏng Aê Diê doh jăk. Digơ̆ srăng boh čhum ao, pioh digơ̆ pô jing doh jăk, kăm amâo ƀơ̆ng ôh đa đa mnơ̆ng ƀơ̆ng …Jih jang klei anăn čiăng lač kơ klei hdĭp leh anăn ai tiê doh brei bi mâo hĕ tơdah hriê kơ Aê Diê.
Hruê anei, wăt tơdah Aê Diê amâo lŏ bi khuôt êa êdi ôh čiăng kơ drei găn ƀiădah Ñu ăt ngă “klei yuôm bhăn” čiăng đru drei găn klei bi gun, klei dleh dlan hlăm klei hdĭp amâodah hlăm klei mă bruă kơ Ñu. Klei Aê Diê čoh čuăn brei phung ƀuôn sang Ñu hdĭp doh jăk mơ̆ng đưm hlŏng kơ ară anei amâo tuôm bi mlih ôh. Čiăng dưi ƀuh klei bi knăl mdê Khua Yang ngă, ăt brei drei prăp êmiêt leh anăn bi doh drei pô mơh. Hriê bĕ kơ Khua Yang leh anăn Klei Ñu Blŭ, akâo kơ Ñu bi doh leh anăn pap brei, lui hĕ klei soh leh anăn jih jang ya klei amâo bi mơak kơ Ñu ôh (I Y-Yôhan 1:7,9).
Ya klei yuôm bhăn drei ƀuh leh Aê Diê ngă kơ drei?
Wah lač: Ơ Khua Yang, đru kâo bi doh kâo pô grăp hruê čiăng kơ kâo dưi ƀuh bruă yuôm bhăn Ih ngă hlăm klei hdĭp kâo. Đru kâo thâo weh đuĕ mơ̆ng jih jang klei dưi bi čhŏ klei bi mguôp kâo hŏng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
