Klei Aê Diê Blŭ: Klei Mmuñ Hđăp 22:1-18
Êlan kliăng: “Ơ Aê Diê kâo, Ơ Aê Diê kâo, si ngă Ih lui kâo leh?” (Klei Mmuñ Hđăp 22:1)
Klei êmuh ksiêm mĭn: Si Yang Mngăt Jăk atăt mtrang mtao Y-Đawit hưn êlâo kơ klei Khua Yang Yêsu săn asei mlei ti kyâo bi kal? Si hdră bi tui mơ̆ng Khua Yang bi êdah klei kpă ênô leh anăn klei pap Ñu? Si drei bi êdah klei hdơr knga bi mni kơ Khua Yang mơ̆ng klei hriăm hruê anei?
Mơ̆ng Klei Mmuñ Hđăp 22:1-18, drei ƀuh klă mtao Y-Đawit ăt jing khua pô hưn êlâo mơh (Bruă Phung Khua Ƀĭng Kna 2:30). Hlăm brô sa êbâo thŭn êlâo kơ Khua Yang Yêsu trŭn hriê ti lăn ala, mtao Y-Đawit mâo leh klei Yang Mngăt Jăk atăt mtrang brei ñu čih sa Klei Mmuñ Hđăp hưn mdah klă nik rup Khua Yang Yêsu tŭ klei knap mñai, Yang Mêsi ti dlông kyâo bi kal, wăt tơdah ênuk anăn phung čar Rôm ka đĭ ôh leh anăn mtao Y-Đawit amâo tuôm thâo ôh kơ klei phung Rôm bi mdjiê mnuih hŏng klei pơ̆ng msei kđĭn ti dlông kyâo bi kal.
hlăm Klei Mmuñ Hđăp anei, mtao Y-Đawit hưn mdah klei thâo săng kơ klei phưi lui kluôm dhuôm: “Ơ Aê Diê kâo, Ơ Aê Diê kâo, si ngă Ih lui kâo leh?” (êlan 1). Anei jing klei hưn êlâo kơ mnĭt mmông hlăk Khua Yang Yêsu ur kraih klei blŭ anăn ti dlông kyâo bi kal (Y-Mathiơ 27:46). Hlăk anăn, Anak Aê Diê amâo mâo klei soh ôh, klam brei leh jih jang klei soh phung mnuih, kyuanăn klei bi mguôp jăk siam ti krah Aê Diê Ama leh anăn Aê Diê Anak bi hgăm hĕ kyua klei ngêñ kpă ênô Aê Diê. Klei Mmuñ Hđăp 22 hưn mdah klă nik kơ klei Khua Yang Yêsu tŭ klei knap mñai hŏng lu nah tĭng: Khua Yang tŭ klei arăng tlao mưč leh anăn: “Jih jang hlei pô ƀuh kâo tlao mưč kơ kâo, diñu wiâo ƀăng kƀông leh anăn kteh kŏ asei,…” (êlan 7). Khua Yang tŭ klei ruă knap hlăm asei mlei kđeh: “Kâo jing msĕ si êa arăng tuh leh, leh anăn jih jang klang kâo amâo lŏ bi kkuh ôh; tiê boh kâo msĕ si hlĭn, ñu lik hlăm prôč tiê kâo … Ih brei kâo đih ti ƀruih lăn msĕ si djiê” (êlan 14-15). Kngan leh anăn jơ̆ng arăng tlŏ bi hluh: “diñu tlŏ leh kngan leh anăn jơ̆ng kâo” (êlan 16). Phung kahan ngă klei mđăo bi mbha ao jhung Khua Yang: “Diñu bi mbha čhiăm ao kâo hdơ̆ng diñu, leh anăn diñu ngă klei mđăo kơ ao jhung kâo” (êlan 18). Jih jang klei truh bi sĭt djŏ klă ti dlông kyâo bi kal.
Hŏng Klei Mmuñ Hđăp 22, drei ƀuh hdră klei bi mtlaih mơ̆ng Aê Diê. Klei kpă ênô Ñu čoh čuăn klei soh brei tŭ klei phat kđi, leh anăn Khua Yang Yêsu tŭ klei bi kmhal anăn kyua drei. Klei khăp Aê Diê prŏng prĭn tơl brei leh Anak Ñu mâo knŏng Sa Čô mjing mnơ̆ng ngă yang kyua drei. Klei knap mñai Yang Krist tŭ jing klei yuôm brei mâo wăt jing klei yuôm bi tui. Kyua hŏng klei ruă knap Khua Yang, drei dưi mâo klei êđăp ênang; kyua hŏng klei Ñu tla brei nư klei soh, drei dưi mâo klei bi grăng; kyua hŏng anôk êka Ñu, drei dưi mâo klei bi hlao. Kyâo bi kal brei ƀuh klei kpă ênô leh anăn klei khăp Aê Diê amâo tuôm bi dră ôh, jih dua knuih anei bi êdah kluôm ênŭm hlăm Khua Yang Yêsu.
Akâo kơ Yang Mngăt Jăk ktrâo atăt drei hdĭp sa klei hdĭp thâo hdơr knga leh anăn mpŭ mni kơ Khua Yang, Pô tŭ leh klei djiê kyua drei ti dlông kyâo bi kal.
Si drei dôk hdĭp tơdah thâo Khua Yang khăp leh, leh anăn jao leh klei hdĭp Ñu djiê hrô brei kơ klei soh drei?
Wah lač: Ơ Khua Yang Yêsu, bi mni kơ Khua Yang kyua hŏng klei Khua Yang tŭ klei knap mñai leh anăn klei djiê ti dlông kyâo bi kal yơh, kâo dưi mâo klei pap brei klei soh, leh anăn kyua hŏng klei anăn yơh kâo thâo kral klei khăp Aê Diê. Akâo Khua Yang đru kâo grăp hruê dôk hdĭp hŏng ai tiê thâo hdơr knga leh anăn hŏng klei huĭ mpŭ doh jăk pioh kơ Khua Yang Pô Bi Mtlaih kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
