Klei Aê Diê Blŭ: Klei Mphŭn Dơ̆ng 6:1-10
Êlan kliăng: “Ƀiădah ti anôk klei soh jing lu hĭn, klei pap jing lu kdlưn hĭn mơh;” (Rôm 5:20b).
Klei êmuh ksiêm mĭn: Ya ngă Aê Diê ênguôt leh anăn čuăn bi kmhal jih lăn ala? Klei “Y-Nôê mâo klei pap ti anăp ală Khua Yang” lač kơ ya klei? Ya klei bi hriăm brei drei ngă ti krah lăn ala soh jhat anei?
Klei Aê Diê Blŭ čih yăl dliê tơdah phung mnuih kmưn dơ̆ng lar êngŭm ti rŏng lăn ala, phung anak êkei Aê Diê ƀuh phung anak mniê phung mnuih kmưn jing siam snăn diñu mă digơ̆ jing mô̆. Kơ klei mblang hlei “phung anak êkei Aê Diê” jing mâo klei bi tăng mgăl hlăm lu ênuk hŏng dua klei mblang jing kdlưn hĭn. Klei mblang tal sa lač phung anăn jing phung dĭng buăl jăk ngă soh. Wăt tơdah Khua Yang Yêsu mblang leh hlăm Y-Mathiơ 22:30 phung dĭng buăl jăk amâo mâo bi dôk ung mô̆ ôh, wăt snăn dưn, klei anei năng ai ăt mâo mơh phung dĭng buăl jăk ngă soh, čŏng čiăng bi kdơ̆ng hŏng klei bhiăn Aê Diê. Diñu hơô rup sa čô êkei čiăng hriê kơ phung mniê. Klei mblang tal dua lač “phung anak êkei Aê Diê” jing phung huĭ mpŭ kơ Aê Diê mơ̆ng phung anak čô Y-Set. Wăt tơdah ăt dôk mâo klei bi tăng mgăl dưn, ƀiădah mta čih phŭn kơ trăn Klei Aê Diê Blŭ anei jing yăl dliê kơ klei jing phung mnuih soh, diñu tui tiŏ klei kđeh diñu pô čiăng, amâo uêñ ôh kơ klei bhiăn Aê Diê. Klei soh bi êdah amâo djŏ knŏng hlăm klei ngă măk ƀai ti êngao ôh ƀiădah wăt klei mĭn hlăm ai tiê msĕ mơh. Khua Yang ƀuh jih leh anăn Ñu mâo klei ênguôt hlăm ai tiê. Klei anei mtrŭt Khua Yang čuăn bi rai jih lăn ala Ñu mjing leh (êlan 7).
Ti krah klei luč klei čang hmăng anăn, Klei Aê Diê Blŭ lŏ bi êdah sa pŏk rup mdê snăk: “Ƀiădah Y-Nôê mâo klei pap ti anăp ală Khua Yang” (êlan 8). Hdĭp hlăm lăn ala soh jhat ƀiădah Y-Nôê ăt jing sa čô “mnuih kpă ênô, amâo mâo klei năng ƀuah ôh hlăm ênuk ñu. Y-Nôê êbat mbĭt hŏng Aê Diê” (êlan 9). Y-Nôê jing pô thâo kral leh klei pap Khua Yang leh anăn klei hdĭp ñu bi mơak kơ Khua Yang. Klei anei ba klei čang hmăng kơ êdei anăp amâo djŏ knŏng hjăn kơ ñu ôh ƀiădah wăt kơ jih lăn ala mơh – Khua Yang ruah Y-Nôê čiăng ngă hdră Ñu bi mtlaih lăn ala.
Anôk drei dôk hdĭp anei ăt bŏ hŏng klei soh leh anăn klei măk ƀai ƀrư̆ hruê ƀrư̆ đĭ hriê kơ lu. Ai tiê mnuih čuôt klih, mĭn nanao kơ mnêč jhat. Diñu duah lu êlan bi mlih klei bhiăn yang đar Aê Diê čiăng bi hrăp klei kđeh diñu pô tluh. Sĭt nik Aê Diê Pô thâo jih jang mnơ̆ng ăt mâo klei ênguôt hlăm ai tiê kyua klei jing phung mnuih kmưn hruê anei. Ƀiădah lĕ, bi mni kơ Khua Yang Ñu amâo lui mnuih kluôm dhuôm ôh, ti anôk klei soh jing lu hĭn, klei pap jing lu kdlưn hĭn mơh” (Rôm 5:20). Msĕ si Y-Ênôê mâo leh klei pap ti anăp Aê Diê, snăn mơh Aê Diê bi êdah klei Ñu pap kơ hlei pô knang kơ êrah Yêsu Krist. Akâo Khua Yang đru drei amâo hdĭp tui si lăn ala ôh, ƀiădah yua klei blŭ leh anăn klei hdĭp drei đru lăn ala thâo klei pap êbeh dlai Aê Diê čiăng mâo lu mnuih srăng tlaih msĕ mơh.
Si ngă drei dôk hdĭp mdê ti krah lăn ala bŏ hŏng klei soh anei čiăng jing phung hưn bi sĭt kơ Khua Yang mơ̆?
Wah lač: Ơ Aê Diê, kâo bi mni kơ Ih kyuadah êjai mnuih djiê hlăm klei soh, Anak Ih trŭn hriê leh ti lăn ala, tŭ klei djiê ti kyâo bi kal, pŏk êlan bi mtlaih kơ hlei pô êran hriê kơ Ih. Đru kâo jhŏng hưn Klei Mrâo Mrang Jăk anei čiăng grăp hruê lŏ thiăm lu mnuih mâo klei bi mtlaih leh anăn thâo kral klei pap Ih ti krah lăn ala anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 87-88
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
