Malakaus 10:32-34
Nqe cim:
“Yexus hais tias: Nimno peb tabtom taug kev mus rau nram lub nroog Yeluxalees. Thaum mus txog nrad yuav muaj neeg ntes Neeg Leej Tub coj mus rau cov thawj ntawm cov povthawj thiab cov xibhwb uas qhia Vajtswv txoj Kevcai. Lawv yuav txiav txim coj nws mus tua povtseg thiab muab nws rau lwm haivneeg; lawv yuav thuam nws, ua saib tsis taus nws, nto qaubncaug rau nws, nplawm nws thiab muab nws tua povtseg; tom qab ntawd peb hnub nws yuav sawv hauv qhov tuag rov qab los.” (Malakaus 10:33-34)
Lus nug xav:
– Thaum taug kev mus rau lub nroog Yeluxalees, Tswv Yexus tau qhia tseg rau cov thwjtim txog yam dabtsi yuav tshwmsim rau Nws?
– Dhau qhov ntawd, peb kawm tau dabtsi txog peb lubneej uas raws tus Tswv qab?
Tswv Yexus thiab cov thwjtim tabtom taug kev mus rau nram lub nroog Yeluxalees. Thaum pom tus Tswv mus ua ntej, “cov thwjtim poob siab, thiab cov neeg uas lawv qab ntshai kawg li” (nqe 32). Lawv paub hais tias qhov chaw no muaj ntau yam tsis zoo tabtom tos tus Tswv tom hauv ntej, lawv thiaj txhawj xeeb thiab poob siab. Tus Tswv paub cov thwjtim lub siab xav, Nws thiaj li hais tseg meej meej thiab txhij txhua txog tej yam uas yuav tshwmsim rau Nws: Nws yuav raug ntxeev siab, raug txiav txim tuag, raug thuam, raug nplawm, raug tua, tiamsis Nws yuav sawv rov qab los. No yog zaum thib peb uas phau Malakaus sau txog tus Tswv tej lus hais tseg txog Nws kev txomnyem thiab kev sawv rov los (Malakaus 8:31; 9:31; thiab 10:33-34). Dhau ntawm qhov ntawd, peb kawm tau tej zaj kawm txhawb peb lub zog hauv lub caij nco txog tus Tswv raug kev Txomnyem thiab Sawv Rov Los xyoo no:
Qhov xubthawj, txojkev txomnyem uas tus Tswv tabtom taug ntawd tsis yog tos nco cia li tshwm tuaj lossis raug quabyuam. Tus Tswv taug txojkev ntawd los ntawm kev meej pem, thiab los ntawm nplooj siab ua txhij txhua raws nraim li Leej Txiv txojkev npaj tseg cawm tibneeg dim. Vim li ntawd, txawm paub hais tias tabtom yuav mus ntsib txojkev sim siab uas hnyav tshajplaws, los tus Tswv yeej tsis khiav nkaum, tiamsis Nws txiav txim siab hais tias: “Txawm li cas los thov koj tsis txhob ua raws li kuv lub siab nyiam, tiamsis ua raws li koj lub siab nyiam xwb” (Malakaus 14:36). Peb lubneej uas raws tus Tswv qab tsis yog yuav tau zoo txhua txhua lub sijhawm, thov tus Tswv pab kom peb niaj hnub npaj txhij mloog tus Tswv lus, nrog nraim Nws mus hauv txojkev ntseeg vim peb paub hais tias peb tus Tswv twb taug txojkev ntawd ua ntej peb lawm.
Qhov thib ob, Tswv Yexus hais tseg hais tias peb hnub tom qab uas raug tua lawm Nws yuav sawv rov qab los. Tom qab txojkev txomnyem yuav yog kev sawv rov los ci ntsa iab. Nyob hauv lubneej nrog tus Tswv mus, peb kuj qaij tsis dhau tej lub sijhawm ntsib kev sim siab, teebmeem, qee zaug tseem raug poob ntau yam. Tiamsis los ntawm Tswv Yexus txojkev sawv rov los pub dagzog rau peb tiv dhau tej ntawd, vim peb ntseeg hais tias tom qab tej kev txomnyem ib ntus yuav yog kev ci ntsa iab mus ibtxhis. Thov tus Tswv pab kom peb niaj hnub ruaj khov hla dhau tej teebmeem, tsis poob siab, tsis tso tseg, vim peb paub hais tias yog xav tau kev sawv rov los ci ntsa iab ces yuav tsum hla dhau txojkev txomnyem.
Nyob hauv lub caij nco txog Tswv Yexus Txomnyem xyoo no, txhua tus ntseeg cia li coglus rau tus Tswv hais tias, kuv yuav kub siab kawm Vajluskub kom paub tus Tswv lub homphiaj thiab Nws lub siab nyiam rau kuv lubneej, saib pom Tswv Yexus tus qauv kom tau kawm xyaum, cia siab rau tus Tswv txoj kev hlub kom kov yeej txhua yam teebmeem, khov kho nrog tus Tswv mus txog hnub uas ntsib Nws saum Ntuj Ceeb Tsheej ci ntsa iab.
Thov Vajtswv,
Tswv Yexus tus uas nyuam yaus hlub tshua, ua Koj tsaug vim Koj twb txaus siab rhais ruam taug txojkev txomnyem vim nyuam yaus tej kev txhaum. Thov Koj pab kom nyuam yaus niaj hnub ruaj khov raws Koj qab, txawm yog ntsib lub tsamthawj li cas los yuav ua raws li Koj lub siab nyiam. Nyuam yaus tuav Tswv Yexus Khetos lub npe thov, Amees.
Peb puas niaj hnub mloog tus Tswv lus thiab rhais ruam khov kho hla dhau tej teebmeem?
Nyeem Vajluskub hauv peb lub xyoos: Exekees 33
Kênh Youtube BHKTHN:
