Klei Aê Diê Blŭ: Y-Markôs 10:32-34
Êlan kliăng: “Ñu lač, “Nĕ anei, drei nao kơ ƀuôn Yêrusalem, leh anăn arăng srăng jao Anak Mnuih kơ phung knơ̆ng khua ngă yang leh anăn kơ phung khua čih hră. Diñu srăng phat kđi brei arăng bi mdjiê gơ̆, leh anăn jao gơ̆ kơ phung tue. Phung anăn srăng mưč kơ gơ̆, kčuh êa bah kơ gơ̆, čăm gơ̆ hŏng klei hnuăt, leh anăn bi mdjiê gơ̆. Ƀiădah tlâo hruê êdei gơ̆ srăng kbiă lŏ hdĭp.” (Y-Markôs 10:33-34)
Klei êmuh ksiêm mĭn: Êjai ti êlan nao kơ ƀuôn Yêrusalem, Khua Yang Yêsu hưn êlâo ya klei srăng truh kơ Ñu? Găn hŏng klei anăn, ya klei hriăm kơ drei kơ klei hdĭp tui hlue Khua Yang?
Khua Yang Yêsu leh anăn phung ƀĭng kna êjai ti êlan nao kơ ƀuôn Yêrusalem. Tơdah ƀuh Khua Yang êbat êlâo ti anăp, “digơ̆ bi kngăr leh anăn phung tui hlue Ñu mâo klei huĭ” (êlan 32). Diñu thâo anôk anei dôk kăp guôn Khua Yang mbĭt hŏng lu mta klei jhat snăn diñu rŭng răng, luč klei êđăp ênang. Khua Yang thâo si boh klei jing hlăm ai tiê phung ƀĭng kna Ñu, kyuanăn Ñu hưn êlâo klă mngač leh anăn djăp ênŭm kơ jih klei srăng truh kơ Ñu: Ñu srăng tŭ klei arăng jao, tŭ klei phat kđi, tŭ klei arăng mưč, arăng čăm hŏng giê hnuăt, tŭ klei arăng bi mdjiê, ƀiădah Ñu srăng kbiă lŏ hdĭp. Anei jing blư̆ tal tlâo Klei Mrâo Mrang Jăk Y-Markôs čih klei Khua Yang hưn êlâo kơ klei Ñu srăng tŭ klei knap mñai leh anăn kơ klei Ñu kbiă lŏ hdĭp (Y-Markôs 8:31; 9:31; leh anăn 10:33-34). Găn hŏng klei anăn, drei mâo lu klei hriăm bi mđĭ ai drei hlăm yan bi hdơr klei Khua Yang tŭ Klei Knap Mñai leh anăn Klei Kbiă Lŏ Hdĭp hlăm thŭn anei:
Tal sa, êlan klei knap mñai Khua Yang dôk êbat nao amâo djŏ jing klei ƀri tuôm, klei truh bhiâo rit amâodah klei mgô̆ mơan ôh. Khua Yang êbat nao ti êlan anăn hŏng klei thâo săng klă mngač, hŏng ai tiê klei mĭn gưt asăp kluôm dhuôm kơ hdră bi mtlaih phung mnuih mơ̆ng Aê Diê Ama. Kyuanăn, wăt tơdah thâo êlâo kơ klei Ñu dơ̆ng mŭt hlăm klei lông dlăng ktrŏ kjham hĭn, ƀiădah Khua Yang amâo êran đuĕ ôh ƀiădah Ñu čuăn “Amâo djŏ tui si klei Kâo čiăng ôh, ƀiădah tui si klei Ih pô čiăng” (Y-Markôs 14:36). Klei hdĭp drei tui hlue Khua Yang amâo djŏ tuôm nanao hŏng klei găl êlưih ôh, akâo kơ Khua Yang brei drei hmiêt mkăp nanao gưt asăp Khua Yang, čhuang êbat kjăp ti êlan klei hdĭp myang kyuadah drei thâo Khua Yang drei êbat leh ti êlan anăn êlâo kơ drei.
Tal dua, Khua Yang Yêsu hưn êlâo snei, tlâo hruê êdei leh arăng bi mdjiê Ñu srăng kbiă lŏ hdĭp. Tui tluôn klei knap mñai srăng jing klei kbiă lŏ hdĭp guh kơang. Hlăm klei hdĭp mbĭt hŏng Khua Yang, drei amâo tlaih ôh tlă anăp hŏng klei truh jhat, tơl tăp năng truh kơ klei săn asei mlei. Klei Khua Yang Yêsu kbiă lŏ hdĭp anăn yơh brei kơ drei klei ktang dưi găn gao, kyuadah drei đăo sĭt ti tluôn klei knap mñai bhiâo anăn jing klei guh kơang hlŏng lar. Akâo kơ Khua Yang brei drei dôk kjăp nanao êbat ti dlông klei dleh dlan, amâo phưi lui, kyuadah thâo klă snei, čiăng dưi truh kơ klei guh kơang klei kbiă lŏ hdĭp brei drei găn êlan klei knap mñai.
Hlăm yan bi hdơr klei Khua Yang Yêsu tŭ klei knap mñai thŭn anei, grăp čô pô đăo kơ Krist brei ƀuăn sĭt hŏng Khua Yang, kâo srăng hur har hriăm Klei Aê Diê Blŭ čiăng thâo kral hdră bruă leh anăn klei Khua Yang čiăng kơ klei hdĭp kâo, thâo ƀuh klă klei Khua Yang Yêsu bi hmô čiăng kăp tui hlue, hŏng klei pap Khua Yang dưi hĭn hŏng jih jang klei dleh dlan, êbat kjăp tui hlue Khua Yang tơl truh hruê bi tuôm hŏng Khua Yang hlăm Ƀuôn Ala Mtao hlŏng lar guh kơang.
Si ngă drei gưt asăp Khua Yang nanao mơ̆ leh anăn ăt êbat kjăp hlăm klei dleh dlan mơ̆?
Wah lač: Ơ Khua Yang Yêsu kâo khăp, bi mni lač jăk kơ Khua Yang tŭ ư êbat nao ti êlan klei knap mñai kyua kơ klei soh kâo pô yơh. Akâo kơ Khua Yang brei kâo êbat kjăp tui hlue Khua Yang, wăt tơdah ya klei truh dưn ăt đup gưp klei Ama čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
