Klei Aê Diê Blŭ: Klei Bi Hriêng 26:13-16
Êlan kliăng: “Mnuih alah yap ñu pô thâo mĭn hĭn kơ kjuh čô mnuih dưi lŏ wĭt lač hŏng klei găl.” (Klei Bi Hriêng 26:16)
Klei êmuh ksiêm mĭn: Si trăn Klei Aê Diê Blŭ anei lač kơ klei blŭ, bruă ngă phung alah?Ya klei lông dlăng brei drei lui hlăm klei hriăm anei?
Hlăm Klei Bi Hriêng 26:13-16, drei ƀuh sa pŏk rup klă snăk kơ mnuih alah, hŏng klei mgang, klei luč liê mang ai ktang, leh anăn klei diñu ngă mgao. Êlâo hĭn, klei alah mơ̆ng klei mgang, “Mnuih alah lač, “Mâo sa drei êmông gu ti êlan” (êlan 13). Phung alah bi mĭn klei huĭ hyưt čiăng ñĕ kơ bruă klam. Hrô kơ tlă anăp hŏng klei lông dlăng hŏng klei jhŏng leh anăn klei đăo, phung alah mâo klei blŭ mgang hơăi mang čiăng ñĕ kơ bruă knuă. Bi mta phŭn kjham hĭn jing ñu lač mâo sa drei êmông gu hiu hlăm êlan dơ̆ng! Klei blŭ mgang amâo ba klei hriê kơ prŏng ôh ƀiădah knŏng djă kơ̆ng anak mnuih hlăm klei amâo gưt asăp. Mnuih kriăng klă sĭt đăo kơ Khua Yang brei klei ktang leh anăn nao phă anăp, wăt tơdah klei dleh dlan truh dưn.
Tal dua, klei alah bi luč liê ai ktang ƀiădah amâo mâo boh ôh, amâo mdê ôh hŏng ƀăng bhă dar ti kliăng bi đuôm ñu (êlan 14). Phung alah dưi msir bruă mâo ƀiădah klei hdĭp diñu amâo đĭ kyar ôh. Êngao anăn, phung alah đrŭt kngan ñu hlăm jam, leh anăn alah đei lŏ ba gơ̆ kơ ƀăng êgei (êlan 15; Klei Bi Hriêng 19:24).
Anei jing rup phung lui mmông găl, mâo klei mkăp mtam hlăm kngan ƀiădah kƀah klei mĭn čiăng bi leh. Klei alah bi hgăm hŏng klei mdei, ngă luč jih ai ktang, ngă kơ klei hdĭp hlăm mngăt wăt asei mlei jing awăt.
Tal tlâo, klei alah mphŭn mơ̆ng klei mgao. “Mnuih alah yap ñu pô thâo mĭn hĭn kơ kjuh čô mnuih dưi lŏ wĭt lač hŏng klei găl” (êlan 16). Phung alah amâo djŏ knŏng ñĕ kơ bruă mă ôh ƀiădah lŏ hngah kơ klei ƀuah mkra kyua diñu bi mĭn pô thâo mĭn hĭn kơ pô mkăn. Klei alah amâo djŏ knŏng luč liê mang hruê mmông ôh ƀiădah khăng ai tiê ngă mgao. Klei thâo mĭn sĭt brei mâo klei luă gŭ, thâo mđing hmư̆, thâo hriăm, leh anăn gưt hlue si Klei Aê Diê Blŭ.
Trăn anei lông dlăng phung drei lŏ ksiêm dlăng pô. Lu blư̆ drei mgang kơ klei alah pô hŏng klei lač pô thâo mĭn hĭn kơ pô mkăn. Msĕ si lač pô thâo mĭn hĭn kơ amĭ ama, phung khua anôk mă bruă čiăng alah, dêč bruă. Khua ƀĭng kna Y-Pôl mtô: “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23). Klei kriăng amâo djŏ knŏng kñăm mâo klei tŭ dưn ôh, ƀiădah lŏ čiăng mpŭ kơ Aê Diê. Akâo kơ Khua Yang đru drei lui klei alah leh anăn êbat hŏng klei kriăng. Hrô kơ mkŏ mjing klei blŭ mgang, brei đăo knang kơ Khua Yang hlăm djăp boh klei. Hrô kơ ngă mgao, brei êbat hlăm klei luă gŭ, mđing hmư̆ Klei Aê Diê Blŭ leh anăn klei phung thâo mĭn mtă mtăn.
Drei dôk đuĕ dăp ti tluôn klei mgang čiăng mdăp kơ klei alah pô mơ̆?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo ruah klei mgang čiăng lŏ alah. Akâo kơ Ih mtô kâo kriăng mă bruă, amâo kyua klei tŭ jing kâo ôh, ƀiădah čiăng mpŭ kơ Ih. Akâo kơ Ih brei kơ kâo klei dưi hŏng jih klei alah pô čiăng kâo mơak êbat luă gŭ hlăm êlan Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
