Tơdrong Pơđơ̆k 26:13-16
“Bơngai hơlah khan sư hlôh wao, Hloh mă đei tơpơh ‘nu tơl lăp kư̆m tim mă tam sư.” (Tơdrong Pơđơ̆k 26:16)
Nơ̆r jet tơchĕng pơwao:
– Sơ̆p hla bơar chăl kơđeh ‘nâu roi tơ’bôh nơ̆r pơma, tơdrong jang bơngai hơlah thoi yơ?
– Lu bơ̆n đei tơdrong pơlong kiơ đơ̆ng ‘bai pơhrăm ‘nâu?
Đơ̆ng Tơdrong Pơđơ̆k 26:13-16, lu bơ̆n ‘bôh hơđăl thoi rup tơ’bôh gah bơngai hơlah, hăm lu nơ̆r pơma hơmet kơdih, pơhuach jơhngơ̆m pran, păng tơdrong pơang lu sư.
Hơdrol hloh, tơdrong hơlah kiơ̆ kơ nơ̆r pơma hơmet, chă dŏng kơdih. “Bơngai hơlah pơma: Đei dămbrang tơ trong” (trong 13). Bơngai hơlah sư chă tơchĕng khan krê hơmơt wă weh wer kơ tơdrong jang. Tơplih kơ wă chu iŏk tơdrong pơlong lăng hăm tơdrong pơ̆n nuih păng đon lui, bơngai hơlah đei nơ̆r pơma gơh hơmet pơlăp ming, dŏng kơdih nơ̆r ưh kơ trŏ wă wer kơ tơdrong jang. Đei yă kiơ hloh dơ̆ng kơ sư pơma khan đei dămbrang tơ rok trong pơlei to! Dôm lu nơ̆r pơma dŏng kơdih ưh kơ đei tơgŭm kơ sư wơ̆ ‘lŏ mălei pơm kơ bơngai ‘noh rai ưh kơ chu. Bơngai pơnam tơpă tơdrong sư lui gơnang Kră Yang ăn kơ sư jơhngơ̆m pran păng rai wơ̆ tŏk tơ anăp, mă khan tơ’bơ̆p tơdrong anat pat.
Mă ‘bar, tơdrong hơlah rai pơhuach jơhngơ̆m pran na ưh kơ đei lĕch yua kiơ, ưh kơ đei phara kiơ kơ tơnang ‘măng lăp dăr kơtă đĕch ưh kơ gơh năm tơ nai (trong 14). Bơngai hơlah phŏ sư kư̆m gơh pơdăr mălei tơdrong arih sư ưh kơ wơ̆ ‘net. Minh pah dơ̆ng, bơngai hơlah chro ti lăm pơnhan, Kŭm hơnat pat pơmat dêh wă tah tơ lăm ‘bơ̆r (trong 15; Tơdrong Pơđơ̆k 19:24). ‘Nâu tơ’bôh kơ minh ‘nu bơngai hŭt lê̆ jơ năr, đei tơdrong tơgŭm lăm tơpang ti bơih mălei ưh kơ băt tơchĕng wă kơ pơkeh. Tơdrong hơlah pơm kơ sư ‘maih pơdơh, pơm kơ jơhngơ̆m sư pă kĕ, tơdrong arih gah bơhngol truh tơ sĕch akar jing rơdu dêh.
Mă pêng, tơdrong hơlah blŭng a đơ̆ng pơang. “Bơngai hơlah khan sư hlôh wao, Hloh mă đei tơpơh ‘nu tơl lăp kư̆m tim mă tam sư.” (trong 16). Bơngai hơlah ưh kơ trŏ kơ weh wer kơ tơdrong jang mă sư kư̆m sơngah kơ tơdrong bơtho tơ’bôh yua kơ sư tơchĕng khan sư hơgei hloh kơ bơngai nai. Tơdrong hơlah ưh kơ trŏ kơ pơhuach jơ năr đĕch mălei sư kư̆m bơngai arăng kơ̆l păng pơang. Tơdrong gơh hơgei tơpă iŏk đon ala, băt mơ̆ng nơ̆r bơtho tơ’bôh, chu hŏk pơhrăm, păng chu kiơ̆ Nơ̆r Kră Yang.
Sơ̆p hla bơar chăl kơđeh ‘nâu pơlong lăng wă kơ bơ̆n ‘bôh kơdih. Lơ wơ̆t phŏ lu bơ̆n pơma dŏng kơdih gah tơdrong hơlah khan bơ̆n hơgei hloh kơ bơngai nai. Pơtih gia bơ̆n khan bơ̆n hơgei hloh kơ mĕ ‘bă, bơngai yŏng tơ’ngla anih bơ̆n jang wă hơlah, wer kơ tơdrong jang. ‘Bok Pôl bơtho khan: “Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơhiôk Yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh.” (Kôlôssê 3:23). Tơdrong pơnam ưh kơ trŏ khan kơnhăm wă pơkeh đang tơdrong jang đĕch, mălei kư̆m ưang kơ ‘Bok Kei-Dei. Apinh Kră Yang ăn kơ lu bơ̆n hŭt lê̆ tơdrong hơlah păng yak kiơ̆ bơngai pơnam. Huay kơ pơma dŏng kơdih, athei lui gơnang kơ Kră Yang lăm tôm tơdrong, huay kơ pơang, athei yak kiơ̆ iơ̆m dim iŏk đon ala, mơ̆ng nơ̆r Kră Yang păng nơ̆r bơtho đơ̆ng lu bơngai gơh hơgei.
Ơ Kră Yang, apinh Ih ‘nĕ jô̆ yo kơ inh yua kơ lơ wơ̆t inh đei nơ̆r pơma dŏng kơdih akâu lăm tơdrong hơlah. Apinh Ih bơtho inh băt kơ pơnam tơdrong jang, ưh kơ trŏ yua wă pơkeh kơ inh đĕch, mălei wă ưang kơ Ih. Apinh Ih ăn kơ inh đei jơhngơ̆m pran gơh yak hlôi đơ̆ng tơdrong hơlah wă kơ inh đĭ jơhngơ̆m yak kiơ̆ iơ̆m dim lăm trong Kră Yang. Krao khan yua ană Kră Yang Yêsu Krist, Amen.
Lu bơ̆n hăm oei kơnơp đơ̆ng rŏng kơ nơ̆r pơma dŏng kơdih akâu wă pơhiôk tơdrong hơlah ưh?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 23
Kênh Youtube BHKTHN:
