Pajlug 26:11-12
Nqe cim:
“Tus neeg ruam uas ruam kawg li tseem zoo dua tus uas nws xav hais tias, nws ntse heev tiamsis nws twb tsis ntse” (Pajlug 26:12)
Lus nug xav:
– Tus neeg uas rov mus ua txhaum tau muab piv zoo li cas?
– Tus neeg ua raws li nws lub tswvyim ua neej li cas?
– Peb thov Vaj Ntsujplig pab rau yus yam dabtsi thaum kawm dhau zaj hnub no?
Lub tswvyim yog los ntawm Vajtswv los. Tus neeg ruam tsis ua neej raws li tus Tswv qhia: “Tus uas muaj tswvyim yog tus uas paub hwm tus Tswv” (Pajlug 9:10) yog li lawv tsis yuav tej lus ntuas thiab ua neej raws siab nyiam. Yog xav kom tau lub tswvyim ntawm tus Tswv ces yuav tsum muaj lub siab txo hwjchim thiab mloog lus. Vajntxwv Xalumoos muab ob tug duab tseemceeb hais hauv nqe Pajlug no:
Tim ib, ib tug dev rov mus noj dev ntuav (nqe 11) yog tus duab uas qias kawg nkaus. Raws li cov neeg Yudais kev coj, lawv saib dev tsis yog yam tsiaj huv. Ntuav yog muab tej uas pab tsis tau lub cev tso tawm, tiamsis dev tseem rov mus noj cov ntuav uas nws twb ntuav lawm, yog xav hais txog tus neeg ruam uas rov mus ua tej kev txhaum qub uas tau ua tas los. Tim ob, hauv nqe 12 tus uas sau hais txog tus neeg uas xwbtim suav tias nws muaj tswvyim tseem pheem dua tus neeg ruam thiab. Nov yog kev txhaum khavtheeb vim tus neeg zoo li ntawd tsis muaj leejtwg qhia, ntuas, lossis kho. Tus neeg khavtheeb ua neej xav tias nws thiaj yog xwb, yog li nws tsis kam mloog qhia, ntuas, thiab thaum kawg nws ua neej yuam kev ploog, lawv pom tias lawv tsis cheemtsum hloov.
Ntau leej rov mus ua tej kev txhaum qub, txojkev qub, txawm yog paub tias qhov ntawd ua hiam lawv thiab lwm tus. Yog ib tug ntseeg Yexus, peb yuav tsum txaus siab rau qhov uas Vaj Ntsujplig ntuas peb, vamkhom tus Tswv lub zog tso tseg, qaij deb tej haujlwm ua txhaum. Zoo ib yam li uas ntuav tej yam tsis zoo tawm mus, tej uas tsis zoo no yuav tsum muab tso tseg kiag. Dua li, yuav tsum kawm kev txo hwjchim vim khavtheeb txaus ntshai heev dua kev ruam. Tus neeg ruam paub qhov yuam kev, tiamsis tus neeg uas hais tias nws muaj tswvyim tsis zeem paub nws cheemtsum hloov. Khavtheeb tsis kam lees txim, tsis kam luag qhia, heev dua thiab ces yog tsis kam los txais yuav txojkev cawm dim. Vajtswv Txojlus hais tias: “Nej txhua tus yuav tsum txo nej lub hwjchim thiab ib tug pab ib tug; rau qhov Vajtswv txojlus hais tias, Vajtswv tawmtsam tus uas khavtheeb, tiamsis Vajtswv pub koob hmoov rau tus uas txo hwjchim” (I Petus 5:5). Thov Vaj Ntsujplig qhia rau peb paub tej kev txhaum uas peb ua thiab pab kom peb txav deb tej kev txhaum ntawd mus. Thov Vajtswv pab kom peb txo hwjchim, paub mloog lus, paub hloov ua zoo txhua hnub.
Thov Vajtswv,
Vajtswv, thov Koj tshuaj saib nyuam yaus lub siab thiab qhia tej kev ruam uas nyuam yaus pheej rov mus ua. Thov Koj zam txim, thov Vaj Ntsujplig pab kom tso tau kev txhaum, thiab pub muaj lub siab txo hwjchim txais yuav Koj tej lus qhia. Thov Koj qhia nyuam yaus paub txo hwjchim thiab vamkhom tus Tswv lub tswvyim. Nyuam yaus tuav Tswv Yexus lub npe thov, Amees.
Muaj yam tsis zoo twg uas peb pheej rov mus ua, txawm yog twb paub tias txhaum? Peb puas txaus siab mloog tej lus ntuas thiab xav rau qhov zoo?
Nyeem Vajluskub hauv peb lub xyoos: Exekees 16
Kênh Youtube BHKTHN:
