Klei Aê Diê Blŭ: Klei Bi Hriêng 26:11-12
Êlan kliăng: “Tơdah ih ƀuh sa čô mnuih yap ñu pô jing mnuih thâo mĭn, mnuih mluk jing yuôm hĭn kơ ñu” (Klei Bi Hriêng 26:12)
Klei êmuh ksiêm mĭn: Mnuih lŏ wĭt ngă klei soh ñu ngă leh, si arăng bi msĕ ñu? Mnuih yap ñu pô jing mnuih thâo mĭn jing mnuih si ñu hdĭp? Ya klei drei srăng akâo kơ Yang Mngăt Jăk đru drei mơ̆ng klei hriăm hruê anei?
Klei thâo mĭn kbiă hriê mơ̆ng Aê Diê. Mnuih mluk hdĭp bi klăk hŏng Klei Aê Diê Blŭ: “Klei huĭ mpŭ kơ Yêhôwa jing klei kčưm kơ klei thâo mĭn” (Klei Bi Hriêng 9:10) kyuanăn diñu hngah kơ klei bi hriăm leh anăn hdĭp tui si klei mĭn diñu pô. Čiăng dưi mă tŭ klei thâo mĭn mơ̆ng Aê Diê brei mâo ai tiê luă gŭ leh anăn gưt asăp. Mtao Salômôn yua dua rup bi msĕ ênưih hdơr snăk hlăm dua êlan Klei Bi Hriêng ti dlông:
Tal sa, sa drei asâo lŏ wĭt ƀơ̆ng mnơ̆ng ñu ô̆ leh (êlan 11) jing sa klei bi hmô čhŏ mrŏ. Hlăm klei bhiăn phung Yuđa đưm, diñu amâo khăp ôh kơ asâo, ƀiădah diñu yap digơ̆ jing mnơ̆ng čhŏ. Ô̆ jing bi kbiă hĕ ya mnơ̆ng bi jhat kơ asei mlei, ƀiădah asâo lŏ wĭt ƀơ̆ng ya mnơ̆ng ñu ô̆ leh, čiăng lač mnuih mluk lŏ wĭt ngă klei soh ñu tuôm ngă leh bi knap kơ diñu. Tal dua, pô čih Klei Bi Hriêng lŏ blŭ klei bi kčŭt hĭn tơdah lač sa čô yap ñu pô jing mnuih thâo mĭn jing jhat hĭn kơ mnuih mluk. Anei jing klei soh mgao kyuadah mnuih msĕ snăn amâo mâo pô dưi mtô lač leh anăn bi hriăm mjuăt ôh. Mnuih mgao bi mĭn ƀuh kơ ñu jing djŏ nanao kyuanăn ñu amâo čiăng mă tŭ ôh klei mtô, bi hriăm, leh anăn atăt truh kơ boh jhat jing ngă soh ƀiădah amâo thâo ôh kơ ñu jing soh kyuanăn ñu hngah amâo čiăng kơ klei bi mlih ôh.
Mâo lu mnuih lŏ wĭt nanao kơ klei soh, kơ klei mưng jhat, kơ klei bi mguôp amâo mâo jăk, wăt tơdah thâo klei anăn dưi bi knap kơ diñu leh anăn pô mkăn dưn. Jing phung đăo kơ Krist, brei drei mă tŭ klei Yang Mngăt Jăk ƀuah hŏng jih ai tiê, knang kơ klei ktang Khua Yang čiăng lui hĕ, amâo lŏ wĭt ngă soh ôh. Msĕ si ô̆ jing bi kbiă hĕ mnơ̆ng ruă, jih jang bruă ngă soh ăt mdei mơh. Mbĭt hŏng klei anăn, brei drei hriăm ngă klei luă gŭ kyuadah klei mgao jing klei huĭ hĭn kơ klei mluk. Mnuih mluk thâo kral klei soh, ƀiădah mnuih yap ñu pô jing mnuih thâo mĭn amâo thâo ôh kơ ñu čiăng mâo klei bi mlih hĕ. Klei mgao ghă mnuih kmhal kơ klei soh leh anăn mă tŭ klei mkra mjuăt, wăt ghă digơ̆ hriê kơ klei bi mtlaih msĕ mơh. Klei Aê Diê Blŭ lač: “Brei jih jang diih hơô klei luă gŭ êjai hdĭp hdơ̆ng diih, kyuadah Aê Diê bi kdơ̆ng hŏng phung mgao, ƀiădah brei klei pap kơ phung luă gŭ” (I Y-Pêtrôs 5:5). Akâo Yang Mngăt Jăk ƀuah ya klei soh drei ngă leh, leh anăn lui hĕ klei soh anăn hlŏng lar. Akâo Khua Yang đru drei thâo luă gŭ, thâo dôk hmư̆, thâo bi mlih hĕ čiăng jing mnuih klă ênŭm grăp hruê.
Mâo mơ̆ klei jhat drei ngă nanao wăt tơdah thâo kơ klei anăn jing soh? Drei srăng hmư̆ klei bi hriăm hĕ amâodah mĭn kơ drei pô jing djŏ nanao?
Wah lač: Ơ Khua Yang, ksiêm bĕ ai tiê kâo leh anăn ktrâo brei ya klei soh kâo lŏ wĭt ngă. Pap brei kơ kâo. Akâo Yang Mngăt Jăk đru kâo ngă khut khat hŏng klei soh, leh anăn brei kơ kâo ai tiê luă gŭ čiăng mă tŭ klei Ih bi hriăm. Đru kâo lui hĕ klei mgao leh anăn knang kơ klei thâo mĭn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
