Pajlug 10:4-5
Nqe cim:
“Tus uas muaj tswvyim, nws mob siab sau qoobloo rau thaum tej qoob siav, tiamsis tus uas pw thaum lub caij sau qoob yuav tau kev txajmuag” (Pajlug 10:5)
Lus nug rau sawvdaws xav:
– Vajntxwv Xalumoos hais txog yam twg ntawm tus neeg ntse thiab tus neeg ruam?
– Tej yam no muaj lub ntsiab li cas?
– Peb siv zaj kawm no li cas rau hauv peb lub neej?
Vajntxwv Xalumoos pib ntawm Pajlug 10 hais txog lub tsev neeg yog qhov chaw uas leej niam leej txiv ua neej hwm Vajtswv thiab qhia Vajtswv Txojlus rau yus cov menyuam, thiab ntawd kuj yog qhov chaw uas cov menyuam mloog Vajtswv thiab niam txiv lus. Hauv lub tsev neeg ntawd txhua tus yuav tsum ua tib zoo ua ncajncees thaum mus nrhiav noj nrhiav haus thiab ua haujlwm (Pajlug 10:1-3). Thiab ntawm no, vajntxwv hais txog yam ntxwv ntawm ib tug neeg txawj ntse. Ob nqe pajlug hnub no qhia pom yam ntxwv muaj nqis dua tes haujlwm. Tus neeg ruam ces tubnkeeg thiab cia lub sijhawm dhau mus, tiamsis tus neeg txawj ntse ces nquag thiab paub siv lub sijhawm los ua haujlwm.
Ntawm no peb pom Vajtswv kev tsomkwm thiab pub txhua yam rau tus neeg txawj ntse uas tsis tso yus tes haujlwm tseg. Los ntawm seem Vajtswv, Nws “yuav tsis cia tej neeg ncaj ncees tshaib nqhis” (nqe 3a), tiamsis los ntawm seem tibneeg, yuav tsum nquag thiab muaj homphiaj ua tiav haujlwm rau tej zoo sijhawm uas Vajtswv pub (nqe 4b-5a). Nov kuj yog txoj kevcai tseemceeb coj ntawm sab ntsujplig kom ib tug neeg paub hwm Vajtswv thiab zeem pom Vajtswv txoj kev tsomkwm, paub ua Nws tsaug thiab rov pauj Vajtswv txiajntsig los ntawm kev siv zog ua haujlwm (1 Kauleethaus 15:10; 2 Petus 1:3-7).
Tsis tas li ntawd, ob nqe pajlug no kuj qhia pom tus neeg tubnkeeg tsis yog tsis ua dabtsi xwb tiamsis kuj yog tsis siv zog ua haujlwm kom tiav tes haujlwm uas tau muab cob rau lawd thiab cia tej zoo sijhawm dhau mus tas. Tus neeg ruam tsis yog “pw” xwb (nqe 5) tiamsis tseem yog tus neeg “tubnkeeg” ua haujlwm (nqe 4a). Niaj hnub no, peb tubnkeeg tsis tas siab lossis tso dhau Vajtswv tes haujlwm uas Nws twb cob rau peb lawd.
Timthawj Paulus tau ntuas hais tias: “Nej yuav tsum siv txhua lub sijhawm kom muaj nqis, rau qhov niaj hnub no tej neeg ua phem kawg li” (Efexus 5:16). “Siv txhua lub sijhawm” kuj muaj lub ntsiab hais tias “cia li txhiv rov los” lossis “siv tas txhua lub sijhawm” yus muaj. Raws li lub ntsiab no ces yog timthawj Paulus ntuas kom peb yuav tsum ua neej txawjntse, zeem paub lub zoo sijhawm, caijnyoog uas yus tabtom ua neej. Txoj kev txawj ntse no tau muab los piv rau txoj kev ruam. Tus neeg ruam ua neej vim yus, tus neeg txawj ntse ua neej rau Vajtswv thiab vim Vajtswv. Thaum uas peb paub li no, peb yuav ua tib zoo hloov peb kev ua neej li cas kom muaj nqis rau Vajtswv. Cia li nquag thiab siv zog siv txhua lub zoo sijhawm uas Vajtswv pub los kawm thiab fij yus tus kheej rau Nws tes haujlwm “rau qhov niaj hnub no tej neeg ua phem kawg li”. Lub ntiajteb uas peb tabtom ua neej no yim hnub yim phem thiab puas tsuaj zuj zus, vim li ntawd peb yuav tsum siv zog tshaj tawm Txojmoo Zoo, ua neej muaj kev hlub thiab nthuav dav Vajtswv lub tebchaws rau lub ntiajteb no.
Thov Vajtswv,
Vajtswv, nyuam yaus ua Koj tsaug rau txoj kev cawmdim thiab tej koob hmoov zoo kawg nkaus uas Koj pub rau nyuam yaus. Thov pab nyuam yaus ua neej ntse, siv zog siv tej zoo sijhawm uas Koj pub los ua tiav tej haujlwm uas Koj cob lawd, kom muaj nqis coj tau tibneeg coob leej los cuag Koj. Nyuam yaus tuav Tswv Yexus Khetos lub npe thov, Amees.
Zaj kawm hnub no ntuas peb yuav tsum tau hloov tej yam twg hauv peb lub neej?
Nyeem Vajluskub hauv peb lub xyoos: Ntawv Nkauj 76-77
Kênh Youtube BHKTHN:
