I Timôthê 3:8-13
“Dah bơngai lui wă jang lăm hnam ‘Bok Kei-Dei, sư athei pơm mă ‘lơ̆ng tơpăt adrol ‘mơ̆i, ưh kơ et sik suai, ưh kơ hăt sa jên lơ păng trŏ tơdrong sư jang sư ‘nĕ kơ pơgŏ iŏk jên đe. Sư athei lui kiơ̆ tơdrong ‘Bok Kei-Dei mă tơpă.” (I Timôthê 3:8-9)
Nơ̆r jet tơchĕng pơwao:
– ‘Bok Pôl pơma gah tơdrong kiơ kơ Kră hnam yang kăl kơ đei?
– Kră hnam yang tơnăp bơ̆jang hăm jơhngơ̆m ‘lơ̆ng gô đei tơmam apah kiơ?
Pơih blŭng a trong 8, ‘bok Pôl yua nơ̆r “kư̆m” tơ’bôh tơdrong juăt gah lăm ‘bok bơtho păng hnam yang “kră hnam yang” lăm nơ̆r Grĕk wă khan “đĭch đam”. Lăm tơdrong pơjao tơdrong jang kră hnam yang blŭng a sơ̆ Tơdrong jang 6:1-6, tơdrong jang kră hnam yang ‘noh tơgŭm dah pơm “đĭch đam” wă wei lăng kăl wă gah sĕch akar păng đei tơdrong tơ’bưh tơduă bơngai lui. Mă khan lei ră, Sơ̆p hla bơar nơ̆r ‘Bok Kei-Dei lăm năr ‘nâu tơbăt ăn kơ lu bơ̆n pêng tơdrong phara pha.
Mă mônh, kơplah lăm Tơdrong jang 6 pơma hơđăl tơdrong jang kră hnam yang, na lăm âu, tơdrong ‘bok Pôl hiơ̆k noh tơdrong arih sa pơm ‘lơ̆ng. Sư pơma puăn tơdrong na minh ‘nu kră hnam yang kăl kơ đei “athei” pơm mă ‘lơ̆ng tơpăt, lui kiơ̆ tơdrong ‘Bok Kei-Dei mă tơpă, athei pơlong lăng sư ‘mơ̆i, pơgơ̆r ham dơnŏ sư mă ‘lơ̆ng (trong 8, 9, 10, 12) păng pêng tơdrong “ưh kơ gơh” ưh kơ et sik suai, ưh kơ hăt sa jên lơ, ‘nĕ kơ pơgŏ iŏk jên đe (trong 8).
Mă ‘bar: Chăl arih lăm hnam dơnŏ lu “kră hnam yang” đei pơma hơđăl. ‘Bok Pôl bơtho lu kră hnam yang athei arih đĭ chăl arih lăm ŭnh om, hiơ̆k bơngơ̆t dih băl lăm hnam dơnŏ păng gơh hơgei bơtho kon hơ’lơ̆p (trong 11-12). ‘Bônh dêh kơ lu kră hnam yang păng bơngai bơ̆jang ‘măn jơ năr, jơhngơ̆m pran kơ tơdrong jang lăm hnam akŭm, na achăng tŭk gah bơhngol, gah sĕch akar păng tơdrong hơpơi wă đơ̆ng kon akăn. Tuch luch pơm kơ kon hơ’lơ̆p ưh kơ lăp đon ơh sơ’ngon hăm Kră Yang păng truh mah hiong răm gah bơhngol; na tơdrong arih ŭnh om pơmat tat, tơdrong jang ưh kơ keh đang, klo kăn arih hơdai băl mălei arih ưh kơ hiôk rơnŭk, ưh kơ đei nơ̆r hiĕk chơt, pă đei tơgŭm păng pơlung dih băl.
Mă pêng, kră hnam yang, dah “đĭch đam” kră hnam yang trŏ kơ “sư athei lui kiơ̆ tơdrong ‘Bok Kei-Dei mă tơpă, wă khan hlôh hơđăl tơdrong tơpăt păng nơ̆r Kră Yang kư̆m thoi bơwei sư hăm jơhngơ̆m ‘lơ̆ng rơgoh. Dang ei, đei mơ’nah lăm bơngai lui hơdrin lăm tơdrong jang hlôh wao gah tơdrong pơjing lơ hloh kơ tơdrong hlôh băt nơ̆r Kră Yang. Mă khan lei ră, kră hnam yang blŭng a sơ̆ rơih iŏk kiơ̆ kơ “lui kơjăp tơpă păng sư ‘bĕnh blai kơ Yang Bơhngol ‘Lơ̆ng” (Tơdrong jang 6:5). Đon lui kơjăp yua iŏk đơ̆ng nơ̆r Kră Yang, păng Yang Bơhngol ‘Lơ̆ng bơih hơnă chông anhăk tơdrong jang Kră Yang lu kră hnam yang păng bơngai lăm hnam akŭm, kư̆m ưh kơ trŏ gơh hơgei dah hlôh wao pơjing.
Kon pơlei Kră Yang kăl kơ krao khan tơgŭm kơ lu kră hnam yang păng bơngai jang lăm hnam akŭm tơnăp bơ̆jang hăm jơhngơ̆m ‘lơ̆ng wă tơiung khul bơngai lui, rai wơ̆ ‘lŏ, păng lu sư noh bơih tơmam Kră Yang ăn đei pơyom păng ‘mêm, đon lui lăm Kră Yang rai pran kơjăp hloh (trong 13).
Kơkuh kơ Ih Kră Yang, apinh Ih tơgŭm lu kră hnam yang rim năr wơ̆ ‘lŏ lăm đon lui, tơdrong arih pơm ‘lơ̆ng, pơm kơ Kră Yang lăp đon lăm tơdrong arih ‘mêm băl lăm hnam dơnŏ wă kơ lu sư bơ̆jang kơ Ih đei yua, krao khan yua anăn Kră Yang Yêsu Krist, Amen.
Lu bơ̆n hăm đi krao khan tơgŭm kơ lu kră hnam yang păng bơngai jang lăm hnam akŭm ưh?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 1
Kênh Youtube BHKTHN:
