Klei Aê Diê Blŭ: I Y-Pêtrôs 3:8-12
Êlan kliăng: “Đăm bi wĭt klei jhat kơ klei jhat arăng ngă ôh, kăn bi wĭt klei dlao wač kơ klei arăng dlao wač rei; ƀiădah lĕ hơêč hmưi bĕ klei jăk jĭn, kyua kơ klei anăn Aê Diê iêô diih leh, čiăng kơ diih dưi dưn klei jăk jĭn” (I Y-Pêtrôs 3:9)
Klei êmuh ksiêm mĭn: Si Khua ƀĭng kna Y-Pêtrôs mtă kơ phung đăo brei hdĭp mdê hŏng lăn ala? Ya ngă? Phung đăo kơ Krist brei hdĭp mdê hŏng lăn ala hlăm ya bruă? Ya klei mđĭ ai drei hdĭp mdê hŏng lăn ala?
Hlăm lăn ala klei soh ƀrư̆ hruê ƀrư̆ đĭ, tơdah arăng ngă jhat, dôk dơ̆ng ƀơ̆ng huă hŏng pô amâo jăk, anak mnuih srăng yua klei blŭ ăl ngêñ, tăm pah, blŭ jhat čiăng rŭ ênua; amâodah yua hla pŏk web ala ƀuôn čiăng mưč mač, bi ngă hdơ̆ng pô; amâodah mâo bruă ngă klă anăp amâodah yua klei mkăn čiăng rŭ ênua amâo uêñ kơ ya boh jhat. Ƀiădah tinei, Khua ƀĭng kna Y-Pêtrôs mtă kơ phung đăo brei hdĭp mdê hŏng lăn ala, jing ya klei mdê hŏng klei mĭn hjăn kơ pô, čuôt klih, leh anăn klei amâo thâo uêñ kơ pô mkăn. Tal sa, “brei jih jang diih mâo klei mĭn bi mguôp…” kyua klei “bi mguôp” amâodah “sa ai” jing sa klei hưn mdah amâo mâo ôh hlei pô dưi hdĭp klei hdĭp phung đăo kơ Krist tơdah amâo sa ai djŏ klă hŏng ayŏng adei pô, jing klei sa ai mơ̆ng Yang Mngăt Jăk (Êphêsô 4:3); Phung Sang Aê Diê srăng amâo lŏ jing Phung Sang Aê Diê kơ Aê Diê ôh tơdah ăt dôk mbha êpul, bi kah mbha, amâodah knŏng “sa ai” hŏng êpul pô! Tal dua, brei “bi khăp hdơ̆ng ayŏng adei”, sa čô lač pô khăp kơ Aê Diê ƀiădah amâo pap leh anăn khăp ôh kơ ayŏng adei pô jing sa čô blŭ luar (I Y-Yôhan 4:20); Tal tlâo, phung đăo hriê kơ prŏng brei “mâo ai tiê jăk leh anăn klei mĭn luă gŭ”, kyua Aê Diê bŏ hŏng klei pap, jing leh dĭng buăl čiăng bi tui drei, snăn ya klei drei mâo čiăng ngă mgao (êlan 8).
Phung đăo brei dôk dơ̆ng ƀơ̆ng huă mdê hŏng lăn ala hlăm dua bruă. Hlăm klei blŭ, “Đăm bi wĭt klei jhat kơ klei jhat arăng ngă ôh, kăn bi wĭt klei dlao wač kơ klei arăng dlao wač rei…” (êlan 9), đăm dôk dơ̆ng ƀơ̆ng huă hdơ̆ng pô hlue si ai tiê bi rŭ ênua. Knư̆ drei êpa hmao klei hdĭp hlŏng lar, čiăng ƀuh klei jăk mơak Aê Diê snăn knư̆ brei drei răng kriê ƀăng êgei pô đăm blŭ ôh klei ƀai leh anăn klei hiu mplư (êlan 10). Kyua klei blŭ drei amâo mdê ôh hŏng sa ƀĕ dhŏng ƀơ̆ng, srăng bi êka kơ ai tiê leh anăn asei mlei pô mkăn. Hlăm bruă ngă, đăm ngă ôh klei jhat, brei jih ai tiê tui duah klei êđăp ênang hŏng grăp čô mnuih (êlan 11). Hrô kơ ngêñ, brei wah lač kơ pô roh pô. Brei mjing klei êđăp ênang, hưn mdah lăm lui klei amâo thâo bi djŏ hŏng ai tiê thâo pap, klei luă gŭ, čiăng kriê pioh klei sa ai mơ̆ng Yang Mngăt Jăk.
Klei Aê Diê Blŭ mđĭ ai grăp čô phung đăo brei mprăp ai tiê hdĭp mdê hŏng lăn ala, “Kyuadah ală Khua Yang dôk dlăng kơ phung kpă ênô, leh anăn knga ñu kăp hmư̆ klei digơ̆ wah lač. Ƀiădah ƀô̆ mta Khua Yang kăp bi kdơ̆ng hŏng phung ngă jhat” (êlan 12). Jih jang djăp klei blŭ, klei drei dôk dơ̆ng ƀơ̆ng huă amâo tlaih ôh kơ klei phat kđi kpă ênô Aê Diê. Akâo kơ Khua Yang đru drei gưt kơ Yang Mngăt Jăk čiăng dưi hdĭp mdê hŏng lăn ala hlue si Klei Aê Diê Blŭ mtô.
Si brei drei mđĭ lar knuih hdĭp mdê hŏng lăn ala?
Wah lač: Ơ Aê Diê bŏ hŏng klei pap, bi mni kơ Ih khăp, tŭ jih, săn asei djiê hrô kơ klei soh kâo. Akâo kơ Ama brei kơ kâo ai tiê thâo khăp, klei thâo pap, luă gŭ čiăng dưi hdĭp mdê hŏng lăn ala anei čiăng kơ Anăn Ih mâo klei guh kơang hlăm knuih hdĭp kâo. . Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Ôsê 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
