I Pêtrôs 3:8-12
“Mă đe pơm kơnê̆ kơ bơ̆n, bơ̆n ‘nĕ pơm tơwih kơ đe; mă đe pơma kơnê̆ kơ bơ̆n, bơ̆n ‘nĕ pơma tơwih kơ đe, bơ̆n rai krao khan apinh ‘Bok Kei-Dei mơnat kơ sư dơ̆ng. Bĭ ‘Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.” (I Pêtrôs 3:9)
Nơ̆r jet tơchĕng pơwao:
– ‘Bok Pêtrôs athei lu bơngai lui kăl kơ arih pha ra kơ bơngai ưh kơ lui thoi yơ? Yua kơ tơdrong kiơ?
– Lu Bơngai Lui kăl kơ arih pha ra kơ bơngai ưh kơ lui lăm dôm tơdrong kiơ?
– Tơdrong kiơ ba ăn tơdrong pơchŭt lu bơ̆n kăl kơ arih pha ra kơ bơngai ưh kơ lui?
Lăm teh đak mă tơdrong yoch rai dêh, kơplah bơngai nai đei pơma pơjăm, pơm ưh kơ ‘lơ̆ng kơ bơ̆n, bơngai bơ̆n gô tơl tơwih lăm tơdrong bley hiap, hiap pơtê̆, pơma kơnê̆ wă tơwih ăn; dah yua Internet đei chih tơwih kiơ̆ kơ tơdrong blĕk, pơrăm dih băl, kư̆m đei mơnah pơm tơpă lăm tơdrong tơwih dih băl mă khan đơ̆ng tơdrong noh ba ăn tơdrong răm ‘băm tơpă. Mă lei ‘bơ̆t jơ âu, Pêtrôs athei khul bơngai lui arih phara kơ bơngai ưh kơ lui, noh jơ̆ tơplơ̆ kiơ̆ kơlăm chăl arih dang ei. Mă mônh, “đĭ đăng kơ’nhŏng oh kăl kơ minh jơhngơ̆m đon…”, yua kơ “tơdrong minh jơhngơ̆m” tơdrong âu tơ’bôh ăn kơ bơ̆n bơ̆n ưh kơ gơh tơ’bưh hăm khŭl bơngai lui păng Yang Bơhngol ‘Lơ̆ng tơdah bơngai noh ưh kơ tơ’bưh hăm ‘nhŏng oh sư mă ‘lơ̆ng. (Êphêsô 4:3). Khul Bơngai Lui gô ưh kơ trŏ kơ Khŭl Bơngai Lui kơ Kră Yang tơpă tơdah oei đei tơdrong tơklah tơklang, dah lăp minh jơhngơ̆m đon lăm “khŭl kơdih đĕch”! Mă ‘bar: athei “’bĕnh blai tơdrong ‘mêm băl lăm ‘nhŏng oh”, minh ‘nu bơngai khan sư ‘mêm kơ Kră Yang mă lei tơdah ưh kơ đei ‘mêm kơ ‘nhŏng oh sư kơdih lei bơngai noh pơma hơlĕnh đĕch (I Yôhan 4:20); Mă pêng, Bơngai lui mă wơ̆ tơ̆l kăl kơ đei “tơdrong ‘mêm păng đei tơdrong iŏk akâu ala”, yua kơ Kră Yang ‘bĕnh tơdrong ‘mêm, sư jur nhen thoi bơngai đĭch wă dŏng pơklaih bơ̆n lei thoi yơ bơ̆n iŏk tơdrong pơang akâu kơdih (trong 8).
Lu bơngai lui kăl kơ arih hăm bơngai mă ưh kơ lui lăm ‘bar tơdrong. Lăm nơ̆r pơma, “’nĕ kơ iŏk tơdrong kơnê̆ tơblah hăm tơdrong kơnê̆, kư̆m ‘nĕ kơ iŏk tơdrong tơdrong hiap pơtê̆ na hiap pơtê̆…” (trong 9). ‘nĕ kơ arih dih băl hăm tơdrong pơm ‘mong dih băl . Lu bơ̆n kăl kơ đei rơhing kơ tơdrong arih ling lang, wă kơ đei tơdrong pŭn hiôk bơ̆n kăl kơ bơwei nơ̆r pơma bơ̆n nĕ kơ ăn ‘bơ̆r bơ̆n tơlĕch dôm nơ̆r kư̆ kă (trong 10). Yua kơ nơ̆r bơ̆n nhen thoi săng han dêh, gô pơm ăn tơdrong ưh kơ hiôk lăm jơ-hngơ̆m lu bơngai mă mơ̆ng bơ̆n pơma. Lăm tơdrong jang bơ̆n, kăl kơ weh ataih đơ̆ng tơdrong kơnê̆, kăl kơ chơ chă tơdrong hiôk ‘lơ̆ng hăm bơngai nai (trong 11). Tơplih kơ tơdrong tơl ăn kơ bơngai nai lăm tơdrong blĕk klai. Athei krao khan kơ bơngai ayăt kơ bơ̆n. Athei ling lang chơ chă tơdrong ba ăn tơdrong hiôk hơđơ̆ng, pơlung dih băl tơdah đei tơdrong ưh kơ tơproh hăm jơhngơ̆m ‘mêm mơnat, iŏk đon ala, wă kơ ba ăn tơdrong minh jơhngơ̆m đon lăm Yang Bơhngol ‘Lơ̆ng.
Nơ̆r pơchŭt kơ rim ‘nu bơngai lui athei krăng kơchăng arih phara kơ bơngai mă ưh kơ lui “Yua kơ ‘Bok Kei-Dei wei-lăng lu bơngai ‘lơ̆ng ling-lang, păng mơ̆ng tơdrong lu sư krao khan; gah lu bơngai pơm kơnê̆, ‘Bok Kei-Dei hil dêh.” (trong 12). Dôm kơ nơ̆r pơma, dôm kơ tơdrong bơ̆n pơm tơdrong noh gô ba ăn lăm tơdrong sek tơlang ‘lơ̆ng tơpăt đơ̆ng Kră Yang ‘Bok Kei-Dei. Apinh Kră Yang ăn kơ bơ̆n đei jơ-hngơ̆m chu yom Yang Bơhngol ‘Lơ̆ng wă kơ bơ̆n arih phara kơ bơngai mă ưh tam mă lui kiơ̆ thoi Kră Yang đei bơtho khan.
Kơkuh kơ Kră Yang tơ’ngla mă ‘bĕnh tơdrong ‘mêm, bơnê kơ Ih đei ‘mêm kơ inh, chu iŏk tơdrong hŭt akâu kơdih păng kĕ ĕnh wă kơ lôch tang tơdrong yoch inh. Apinh Ih ăn kơ inh đei jơhngơ̆m ‘mêm, iơ̆m dim, iŏk đon ala wă kơ arih phara kơ lu bơngai ưh tam mă lui lăm chăl arih âu wă kơ anăn Kră Yang đei ư-ang đơ̆ng chăl arih inh. Yua anăn Kră Yang Yêsu Krist. Amen
Lu bơ̆n kăl kơ adrin arih phara kơ bơngai ưh kơ lui thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 12
Kênh Youtube BHKTHN:
