I Petus 3:8-12
Nqe cim:
“Nej tsis txhob ua phem pauj phem, yog leejtwg foom phem rau nej, nej tsis txhob foom phem pauj, tiamsis nej cia li thov Vajtswv foom koob hmoov rau nws. Rau qhov thaum Vajtswv hu nej los Vajtswv coglus tseg hais tias Vajtswv yuav foom koob hmoov rau nej.” (I Petus 3:9)
Lus nug xav:
– Timthawj Petus ntuas cov ntseeg kom ua neej txawv ntiajteb li cas? Vim li cas?
– Cov ntseeg yuav tsum ua neej txawv ntiajteb los ntawm tej yam dab tsi?
– Yam dab tsi txhawb peb lub siab kom ua neej txawv ntiajteb?
Nyob rau hauv lub ntiajteb uas muaj kev txhaum loj zuj zus tuaj, thaum raug lwm tus thuam, lossis ua tsis zoo, ib txwm tib neeg yeej siv lus cem, lus foom, lus saib tsis taus los ua pauj; lossis siv xovtooj cua los thuam, cem, thiab sib tawmtsam; lossis muaj tej yam ua ncaj qha lossis ua zais nkoos los ua pauj tsis xav txog teebmeem tomntej.
Tiamsis, nyob ntawm no, Timthawj Petus ntuas cov ntseeg kom ua neej txawv neeg ntiajteb, uas yog ua tej yam txawv neeg txojkev saib hlob tus kheej, kev qia dub, thiab kev tsis xav txog lwm tus. Qhov xubthawj, “nej yuav tsum ua ib lub siab…” vim “ib lub siab” lossis kev “sib koom siab” yog ib lo lus tshajtawm hais tias tsis muaj leejtwg yuav ua tau neej zoo li tus ntseeg yog tias tsis muaj kev koom siab kom zoo nrog nws cov kwv tij, uas yog kev koom siab ntawm Vaj Ntsujplig (Efexus 4:3); Pawg Ntseeg yuav tsis yog Vajtswv lub Pawg Ntseeg yog hais tias tseem muaj pab pawg, sib cais, lossis tsuas yog “sib koom siab” nrog nyias pab xwb! Qhov ob, “ib leeg hlub ib leeg ib yam li kwvtij sib hlub”, tus neeg uas hais tias nws hlub Vajtswv tiamsis tsis muaj kev hlub tshua thiab hlub nws cov kwv tij yog ib tus neeg dag (I Yauhas 4:20); Qhov peb, tus ntseeg uas loj hlob lawm yuav tsum “ib leeg pab ib leeg thiab ib leeg saib taus ib leeg” vim tus Tswv tau hlub tshua, coj tus qauv ua ib tug qhev los cawm peb, peb thiaj tsis muaj dab tsi yuav khav theeb tau (nqe 8).
Cov ntseeg yuav tsum ua lub neej txawv ntiajteb hauv ob seem. Hauv kev hais lus, “Nej tsis txhob ua phem pauj phem, yog leejtwg foom phem rau nej, nej tsis txhob foom phem pauj” (nqe 9), txhob ua rau lwm tus raws li lub siab pauj sib luag. Peb yim xav tau txojsia mus ibtxhis, xav pom Vajtswv txoj koob hmoov, ces peb haj yam yuav tsum tuav peb lub ncauj tsis txhob hais lus phem thiab tsis txhob hais tej lus dag (nqe 10). Rau qhov peb cov lus hais zoo li ib rab riam ntse, yuav ua rau tus mloog mob siab thiab mob cev nqaij daim tawv. Nyob hauv kev ua haujlwm, yuav tsum tso tej kev phem tseg thiab ua txoj zoo, muab siab rau nrhiav kev tau zoo nyob kaj siab lug nrog sawvdaws (nqe 11). Tsis txhob ua siab chim, cia li thov Vajtswv rau cov yeebncuab. Yuav tsum npaj txhij tsim kev thaj yeeb, daws tej kev tsis sib totaub los ntawm lub siab zoo, lub siab txo hwj chim, kom tiv thaiv tau txojkev sib koom siab ntawm Vaj Ntsujplig.
Vajtswv Txojlus txhawb zog rau txhua tus ntseeg uas txaus siab ua lub neej txawv ntiajteb hais tias, “Rau qhov Vajtswv yeej ntsia ntsoov cov neeg uas ncaj ncees, thiab nws niaj hnub mloog lawv tej lus thov; tiamsis nws tawmtsam cov neeg uas ua phem” (nqe 12). Peb txhua lo lus hais thiab txhua yam peb ua yeej tsis dim Vajtswv txojkev txiav txim ncajncees. Thov Vajtswv pub peb mloog Vaj Ntsujplig lus kom peb ua tau lub neej txawv ntiajteb raws li Vajtswv Txojlus qhia.
Thov Vajtswv,
Vajtswv tus uas muaj lub siab hlub, thov ua Koj tsaug uas Koj tau hlub tshua, ua siab ntev, thiab yeem tuag txhiv nyuam yaus tej kev txhaum. Thov Koj pub rau nyuam yaus muaj lub siab hlub, siab zoo, thiab txo hwj chim kom ua tau lub neej txawv ntiajteb hauv lub qab ntuj no, kom xwv Koj lub Npe tau koob meej dhau ntawm nyuam yaus. Nyuam yaus tuav Yexus Khetos lub npe thov, Amees.
Peb yuav tsum ua lub neej txawv ntiajteb zoo li cas?
Nyeem Vajluskub hauv peb lub xyoos: Hauxeyas 12
Kênh Youtube BHKTHN:
