Ntawv Nkauj 90:12
Nqe cim:
“Thov koj qhia kom peb paub hais tias peb txojsia luv kawg li, peb thiaj yuav xeev los ua neeg ntse.” (Ntawv Nkauj 90:12)
Nyeem ntxiv Phau Txhais Tshiab HMOWSV:
“Thov koj qhia kom peb paub suav peb txhua hnub, xwv peb lub siab thiaj muaj tswvyim.”
Lus nug xav:
– Vim li cas Mauxes thiaj thov kom tus Tswv qhia nws paub suav nws lub hnub nyoog?
– Xyoo 2025 no, peb siv peb lub sijhawm zoo li cas lawm?
– Peb kawm tau dabtsi hauv xyoo dhau los, thiab thov kom tus Tswv pab peb hloov qhov twg kom peb muaj kev txawj ntse nyob hauv tus Tswv?
Muaj ntau tus hauv peb yeej xav tsis thoob tias vim li cas Mauxes thiaj thov kom tus Tswv qhia nws paub suav nws lub hnub nyoog. Tibneeg lub neej ho ntev npaum li cas, es ho suav tsis tau! Tej menyuam mos muaj ib ob xyoos xwb twb kawm suav tau lawm, tabsis ua cas ib tug neeg tau kawm kev txawj ntse hauv Falaus tsev, paub deb dav zoo li Mauxes tseem ho suav tsis tau nws tej hnub nyoog ua neej? Tseeb tiag, Mauxes tau thov tus Tswv qhia nws “paub suav”, vim nws zeem paub hais tias nws tsuas paub thiab nkag siab thaum tau tus Tswv qhia xwb. Los ntawm Vaj Ntsujplig kev taw qhia, nws “lub siab thiaj muaj tswvyim”.
Tus txhais Vajluskub H.D.M. Spence tau txhais nqe Vajluskub no hais tias: “Thov tus Tswv qhia peb paub xav txog qhov luv luv ntawm tibneeg lub neej, kom peb thiaj muaj lub siab txawj ntse.” Ua ntej Mauxes thov Vajtswv qhia kom paub suav hnub nyoog, nws twb hais tias: “peb ua neej nyob tsis ntev, ces peb txojsia txawm yaj ntshis lawm” (Ntawv Nkauj 90:10). Tu siab kawg li uas coob tus tibneeg niaj hnub nimno tseem tsis tau totaub txog qhov uas yus lub neej luv kawg li. Lawv tseem niaj hnub nrhiav hwjchim, meej mom, nyiaj txiag, tiamsis tsis nco txog tias lub neej no luv heev, thaum tuag tsis nqa tau ib yam dabtsi mus, lawv thiaj tseem niaj hnub caum tej yam tsis muaj nqis ntawd qab. Tsuas yog thaum tibneeg to taub txog lub homphiaj tiag tiag ntawm lub neej thiab tig mus rau txojsia ib txhis, ces thiaj yuav tau qhov kev txawj ntse tseeb thiab tau txais txoj koob hmoov nyob mus ibtxhis.
Ua ntej yuav rhais ruam mus rau lub xyoo tshiab 2026, cia peb rov tig ntsia ib xyoo dhau los, ntau zaus peb tau ua tsis tiav, ua yuam kev, thiab cia tej sijhawm tsimnyog siv los ua tej yam zoo ploj mus tsis muaj qabhau. Peb kuj rov nco txog txhua yam koob hmoov uas Vajtswv tau pub, kom peb tau tsa suab ua Vajtswv tsaug. Thov Vaj Ntsujplig pab peb txhua tus paub siv lub sijhawm kom ua neej muaj kev txawj ntse. Paub tseg sijhawm los tu tus kheej txij sab nqaij tawv mus rau sab ntsujplig, kom niaj hnub tau hloov tshiab dhau ntawm Vajtswv Txojlus. Paub tseg sijhawm los nrog tsev neeg nyob ua ke kaj siab lwb lug, pab tu qhia tej menyuam loj hlob. Tshaj qhov ntawd, yog tseg lub sijhawm uas tus Tswv pub rau peb no los tshajtawm Tswv Yexus Txojmoo Zoo rau txhua tus tibneeg. Tswv Yexus hais tias: “Hauv kuv Txiv lub tsev muaj ntau chav, thiab kuv tabtom yuav mus tu chaw rau nej. Yog tsis muaj li ntawd, kuv yeej yuav tsis qhia li no rau nej. Thaum uas kuv tu tau chaw rau nej lawm, kuv yuav rov qab los thiab tos nej mus nrog kuv nyob; kuv nyob qhov twg nej yeej yuav nrog kuv nyob qhov ntawd” (Yauhas 14:2–3). Vim li ntawd, peb cia li tas siab tas ntsws thov Vajtswv pab kom peb muaj txojkev txawj ntse, tig mus rau Vajtswv lub hwjchim ci ntsa iab thiab txojsia ib txhis saum Ntuj Ceebtsheej.
Thov Vajtswv,
Tus Tswv, ua tsaug uas Koj tau tsomkwm thiab pub koob hmoov rau nyuam yaus ib lub xyoo dhau los. Thov Vaj Ntsujplig qhia nyuam yaus paub txog qhov luv luv ntawm tibneeg lub neej, kom nyuam yaus paub txog txojkev txawj ntse tseeb, coj nyuam yaus lub neej los rau txojsia nyob ntev dhawv mus ib txhis. Nyuam yaus tuav Yexus Khetos lub npe thov. Amees.
Peb thov kom tus Tswv qhia peb paub suav peb tej hnub nyoog li cas?
Vajluskub hauv peb lub xyoos: Tes Haujlwm 19
Kênh Youtube BHKTHN:
