Tơdrong Pơđơ̆k 25:25-26
“Bơngai bu nhă đak đơ̆ng Inh ăn, kơnh sư huay pă rơhing boih. Đak mă Inh ăn kơ sư thoi lĕ đak mơlĕch, sư ro jur suŏn lăm to bơngai mă nhă ‘noh, pơm kơ bơngai noh gơh arih ling lang.” (Yôhan 4:14)
Nơ̆r jet tơchĕng pơwao:
– “Tơdrong ‘nao tơbăt ‘lơ̆ng đơ̆ng dêh ataih truh” păng “ Đak glung đe pơpŭk lê̆ gơsŏk đĭ” wă khan kiơ?
– Kră Yang Yêsu noh bơih Đak Arih, wă khan thoi yơ?
– Bơ̆n hlôi ba ăn kơ đe Tơdrong ‘Nao ‘Lơ̆ng păng đak arih thoi yơ bơih?
‘Bar nơ̆r pơđơ̆k tơ kơpal ‘noh hei đe chih tơtil băl noh wă pơting tu đak hlăng ‘lơ̆ng rơngơp hăm tu đak đe pơpŭk lê̆ gơsŏk đĭ, pơting thoi noh yua kơ đơ̆ng đêl mơn đei tơdrong ’lơ̆ng hơtŏk tơiung păng tơdrong ưh kơ ‘lơ̆ng ưh kơ hơtŏk tơiung. Đe chĕp ba tơdrong đơ̆ng dêh hơtaih năm roi tơ âu tơ to na kơtơ̆ng ang truh tơ bơ̆n, tơdrong đe roi ‘nei juăt sư noh tơdrong gah hnam dơnŏ dah mă tơdrong đêl tơblah kĕ jei, lu tơdrong ‘noh bơih bơ̆n juăt kơ kơtơ̆ng ang đe roi. Tơdrong ‘lơ̆ng đơ̆ng dêh ataih mă đe roi tơbăt kơtơ̆ng truh tơ bơ̆n noh” đe pơtih thoi “đak rơngơp” noh tơ’bôh ăn kơ bơ̆n rup minh ‘nu bơngai đơ̆ng ol kơ đak,kro hơlŏng, rơhing ‘maih nhă đak na ‘bôh hĭ đak hlăng rơngơp noh,iŏk nhă jơhngơ̆m bơngai noh mơn praih hơdrăl, rơngơp hiôk, klaih rơhing,hiôk breh hreh hrăp yua kơ đơ̆ng nhă đak hlăng rơngơp ei. Tơdrong hiôk chơt đơ̆ng dêh ataih mă đe roi tơbăt kơtơ̆ng truh tơ bơ̆n,bơ̆n mơn chhôk ngă ‘nă hal thoi yơ bơih noh, Tơdrong ‘Nao ‘Lơ̆ng Kră Yang đơ̆ng plĕnh kư̆m ba truh tơ kon bơngai bơ̆n lăm teh đak âu ba ăn jơhngơ̆m kon bơngai chhôk ngă ‘nă hal, hiôk breh hreh hrăp,tôm hloh kơ tơdrong hiôk chơt đơ̆ng tơduă kon bơngai ba truh noh hei dơ̆ng.
Mă khan lei ră, ưh kơ trŏ khan mă đak kiơ kiơ kư̆m gơh pơm kơ bơ̆n klaih rơhing ngăl đơ̆ng ol kơ đak ôh, yua kơ lơ wơ̆t bơ̆n tơ’bơ̆p đei đak gơsŏk, tu đak đei ‘bơm pơgang dah tơmam bơnhŭl, dah mă hrơ̆ noh. Hăm lu tơmoi năm rok trong tŏk-bŏk ol, rơhing ‘maih nhă đak, lu sư hơpơi dêh ‘maih nhă đak hlăng rơgoh, mă-lei mưh tơ’bơ̆p ‘bôh đak ‘mê̆, đei tơmam bơnhŭl lei lu sư pă đei hơmĕng hloi bơih.’Bar nơ̆r pơđơ̆k tơ kơpal ‘nâu hei nhen thoi minh tơdrong pơtih wă pơma kơ tơdrong ưh kơ hơmĕng dêh mưh bơ̆n ‘bôh minh ‘nu bơngai ‘lơ̆ng tơpăt bơih mă thuơ kơ tơdrong kơnê̆, chu kiơ̆ tơdrong kơnê̆. Lu bơngai ‘lơ̆ng tơpăt noh đe chang dêh wă kơ lu sư ling-lang kơ tơnăp kơjăp hăm jơhngơ̆m ‘lơ̆ng, tơdrong arih ‘lơ̆ng sư noh nhen thoi chang rŏ kơ ‘bôh tu đak hlăng rơgoh, rơngơp. Mă-lei mưh bơngai đơ̆ng‘lơ̆ng tơpăt jing arih yak năm grê tơ ‘ma, tơ ‘ngieo, thuơ kơ lu bơngai kơnê̆, lei wă bu dơ̆ng gơh bơ̆ng, gơh pơma dŏng bơngai ‘lơ̆ng!
‘Bok Yôhan đei roi hơ’mon đêl Kră Yang Yêsu jang tơdrong jang Sư kơplah Sư oei tơ teh đak, đei minh năr ei Kră Yang Yêsu tơ’bơ̆p minh ‘nu drŏ-kăn bơngai Samari ‘bơ̆t cheng đak sơlŭng, kơplah Sư pơma dơnuh hăm bơngai drŏ-kăn ei, ‘bơ̆t Sư apinh đak nhă noh, Sư yua iŏk ‘bơ̆t doh Sư roi ăn kơ duch ei băt đei pha dơ̆ng noh anăn sư “đak arih”. “Đak Arih” noh Kră Yang Yêsu. Bu lui sơng iŏk Kră Yang gô đei tơdrong arih ling-lang. Bu nhă đak ‘noh sư hrăp ưh kơ layơ rơhing ‘maih nhă dơ̆ng, yua kơ đak arih noh gô jing thoi đak mŏng ro lăm jơhngơ̆m, đak arih pran ro blai ling-lang ling-lang (Yôhan 4:14).
Kon bơngai tơ ala teh âu hơtai oei gleh gah akâu akar, oei pơngot rơhing gah tơdrong arih gah bơhngol. Kon bơngai bơ̆n arih lăm teh đak âu, đei lơ tơdrong pang ‘nâu pang ‘noh kơtĭt pơjuă bơ̆n pơm kơ bơ̆n gleh lap, bơ̆l hăl, na lơ bơngai tơkan tơ tơdrong lui chă yang,lui kiơ̆ khul ‘nâu khul ‘noh, mă-lei tuch luch sư, lu sư tă tơ mơn rai gleh lap, bơ̆l hloh, gah bơhngol rai hrĕng kro hloh dơ̆ng, chăl arih rai pă hơmĕng hloh dơ̆ng. Kră Yang Yêsu bơtho: “Iĕm athei năm jơ̆p-jang kơ teh đak bơtho Tơdrong ‘Nao ‘Lơ̆ng kơ đĭ-đăng bơngai.” (Markôs 16:15). Apinh Kră Yang tơgŭm bơ̆n chu pơm kiơ̆ Nơ̆r Sư,năm bơtho ră roi Tơdrong’Nao ‘Lơ̆ng “đak rơngơp” ba ăn tơdrong rơngơp hiôk kơ bơhngol lu bơngai mă oei pŭ trăp,gleh lap lăm chăl arih ‘nâu. Tu đak tơdrong arih ling-lang đơ̆ng Kră Yang ro bơih lăm bơ̆n noh ưh kơ dơ̆ng lăm jơhngơ̆m akâu bơ̆n, lăm hnam dơnŏ bơ̆n kơdih đĕch ôh, mă-lei đak arih noh athei khŏm jing thoi đak mơlĕch ro tơ bơngai nai dơ̆ng, ba ăn kơ lơ bơngai lăm teh đak âu đei tơdrong arih ling-lang.
Ơ Kră Yang, ‘Bă inh ơi, inh bơnê kơ Ih, yua kơ Ih mơnat na ăn kơ inh Đak Arih.Apinh Yang Bơhngol ‘Lơ̆ng Ih hơtŭt pơdrŭt jơhngơ̆m inh hưch hanh bơtho ră roi Tơdrong ‘Nao ‘Lơ̆ng đak arih gah bơhngol ‘bĕnh blai ba ăn kơ lơ bơngai đei tơdrong arih gah bơhngol. Inh krao khan yua anăn Kră Yang Yêsu Krist, Amen!
Bơ̆n hăm pre jơhngơ̆m lăp đon ră roi, tơbăt Tơdrong ‘Nao ‘Lơ̆ng, păng ba ăn đak arih kơ lơ bơngai ưh?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong jang 16
Kênh Youtube BHKTHN:
