Hauxeyas 11:1-11
Nqe cim:
“Kuv ua tib zoo rub lawv los cuag kuv thiab kuv hlub lawv kawg.” (Hauxeyas 11:4a)
Lus nug xav:
– Tus Tswv hlub Nws haivneeg li cas thiab lawv ua li cas rov rau tus Tswv?
– Vim licas tus Tswv chim tiamsis Nws tsis rhuav tshem lawv mus ibtxhis?
– Peb yuav tsum muaj tus cwjpwm li cas thaum paub tias tus Tswv yog tus uas hlub tshua thiab niaj hnub tos peb tig rov los?
Tus Cevlus Hauxeyas nyob rau tiam tim 8 UY (kwvlam xyoo 755-725 UY), nws qhuab qhia Vajtswv Txojlus rau lub tebchaws Yixalayees sab qaum teb uas tabtom yuav puastsuaj. Lub sijhawm ntawd, Vajtswv haivneeg txojkev ntseeg qaug zog heev rau qhov lawv mus pe mlom thiab ua neej li lwm haivneeg uas tsis ntseeg. Cov vajntxwv sib txeeb lub zwm txwv, mus koom siab thiab tomqab ntawd ntxeev siab rau cov tebchaws Axilias thiab Iziv. Tus Tswv tau txib tus Cevlus Hauxeyas mus nqua hu Nws haivneeg kom hloov siab thiab tig rov los cuag Tus Tswv uas hlub lawv zoo li leej txiv hlub menyuam. Tiamsis Nws kuj ceebtoom hais tias lawv yuav raug txiav txim yog tias lawv tseem ntxeev siab ntxiv, rau qhov Nws yog tus ncaj ncees. Tus Tswv siv xeem Efalayees uas muaj lub tuamceeb nroog Xamalis los nqua hu tagnrho lub tebchaws sab qaum teb (nqe 3-9).
Tus Tswv rov hais txog Nws txojkev hlub thaum Nws cawm lawv tawm hauv tebchaws Iziv los, coj lawv mus rau hauv Lub Tebchaws Coglus kom lawv tau pehawm Nws, raws nraim li tej lus cogtseg uas tau tsim muaj nyob ntawm lub roob Xinais (nqe 1). Tsimnyog yuav tsum hlub thiab pehawm tus Tswv, tiamsis lawv yim hnub yim mus deb ntawm tus Tswv thiab mus pehawm tej mlom (nqe 2). Tus Tswv txiav txim rau Nws haivneeg raws li Nws txojkev ncaj ncees, tiamsis tomqab ntawd, Nws yuav kho lawv zoo ib yam li leej txiv qhia menyuam rhais ruam mus kev (nqe 3). Tus Tswv nplawm kom lawv kheev hlob hauv txojkev ntseeg. Tiamsis, Nws kuj tau siv txoj hlua khuvleej thiab txojkev hlub khi lawv, Nws ua zoo rau lawv ib yam li Tus Tub Yug Yaj uas maj mam “tsaws hlo lawv los puag” npuab Nws lub plhu lossis zoo li Leej Txiv hlub tshua uas “tu lawv thiab pub mov rau lawv noj”. Tseeb tiag, tsis muaj ib yam dabtsi loj npaum tus Tswv txojkev hlub! Tiamsis Vajtswv haivneeg muaj lub siab tawv tsis kam tig rov los cuag Nws. Vim tus Tswv muaj mojyam ncaj ncees, Nws yuav tsum txiav txim dhau ntawm qhov uas tso lawv rau tus vajntxwv Axilias sab qaum teb (nqe 5-7). Tus Tswv txojkev ncaj ncees tsis cia lawv pheej ua txhaum lossis tso siab dhau hwv rau Leej Txiv lub siab hlub tshua. Thaum tabtom txiav txim, tus Tswv txib cov Cevlus tuaj ntuas lawv tiamsis tsis muaj ib leej tug twg lees kev txhaum, lawv “tawv ncauj thiab khiav tawm” ntawm tus Tswv mus (nqe 7)!
Txawm yuav txiav txim rau ib haivneeg uas ntxeev siab thiab muaj lub siab tawv, los tus Tswv tsis xav rhuav tshem lawv li lub nroog Xenpauyees thiab Amas, yog ob lub nroog ua txhaum uas raug puastsuaj nrog lub nroog Xaudoos thiab Kaumaulas (Teev Npe 29:23). Tus Tswv yog Tus ncaj ncees tiamsis Nws kuj yog Tus hlub tshua, vim li ntawd Nws thiaj “tsis rau txim” thaum Nws chim thiab “tsis los cuag” lawv thaum Nws npautaws (nqe 9). Tus Tswv yuav nqua hu lawv tig rov los zoo li cov nquab uas ya deb los niaj hnub nrhiav kev rov los rau hauv zes. Thaum kawg tus Tswv hais tias: “Kuv yuav coj lawv rov los nyob hauv lawv tej vajtse dua. Kuv yog tus TSWV uas hais li ntawd” (nqe 11).
Txawm tus Tswv yuav txiav txim hnyav vim Nws yog Tus ncaj ncees, los Nws kuj yog Tus hlub tshua. Thov tus Tswv pab kom peb paub hloov siab thiab tig rov los cuag Nws thaum hnov tej lus ceebtoom thiab qhuab ntuas ntawm tus Tswv.
Thov Vajtswv,
Leej Txiv uas hlub tshua! Nyuam yaus paub tias ntau zaus nyuam yaus twb mus yuam kev thiab ua txhaum rau Koj lawm. Nyuam yaus lees kev txhaum thiab thov Koj zam txim rau nyuam yaus, coj nyuam yaus tig rov los kom nyuam yaus tau nyob hauv tsev neeg uas Koj hlub. Nyuam yaus tuav Yexus Khetos lub npe thov, Amees.
Peb puas nrawm nroos lees kev txhaum thaum ua txhaum lossis peb tseem muaj lub siab tawv tabmeeg tus Tswv txojkev hlub tshua?
Nyeem Vajluskub hauv peb lub xyoos: Exekees 1
Kênh Youtube BHKTHN:
