Amôt 5:21-27
“Kơtrơ̆m jah lê̆ lu tơdrong ‘lơ̆ng tơpăt sĭt ro thoi đak păng tơdrong tơpăt kơkhŭr thoi đak glung ro ling lang.” (Amôt 5:24)
Nơ̆r jet tơchĕng pơwao:
– Amôt bơngai pơtruh nơ̆r ‘Bok Kei-Dei,sư arih ‘bơ̆t chăl ayơ ei sơ̆?
– Kră Yang jao ăn kơ sư tơdrong gĭt dêh gah bơhngol noh tơdrong jang kiơ?
– Kră Yang đei pơm keh nơ̆r tơbăt noh thoi yơ?
– Bơ̆n đei pơhrăm iŏk tơdrong kiơ đơ̆ng nơ̆r Amôt khan lê̆ hơdrol noh?
Amôt bơngai pơtruh nơ̆r ‘Bok Kei-Dei,sư ‘nâu arih kơplah 800 sơnăm A.K (Adrol kơ Kră Yang Yêsu). Dêh char đe Isơrael sơ̆ đêl minh pôm dêh char ră, mă-lei đơ̆ng rŏng kơ pơtao Salơmơn lôch, lu sư ưh kơ pôm jơhngơ̆m đon, đei tơblah tơhil, ưh kơ chu ala dih băl na tơklah jing‘bar tŏ dêh char, minh puăt gah gơal, minh puăt gah yă nơ̆m. Dêh gah gơal noh anăn dêh char Juđa, pơtao pơgơ̆r, anăn sư Hôsia; dêh gah yă nơ̆m noh anăn dêh char Isơrael, pơtao pơgơ̆r, anăn sư Jêrôbôam II. Amôt bơngai pơtruh nơ̆r ‘Bok Kei-Dei, sư arih oei tơ Thêôka, minh pôm pơlei iĕ lăm dêh Juđa. Tơdrong jang sư noh wei triu păng bơwei lu‘long hơra. Sư ‘nâu ưh kơ trŏ kơ kon sâu lu bơngai pơtruh nơ̆r‘Bok Kei-Dei ôh, kư̆m ưh kơ trŏ kơ kon sâu lu ‘bok soi mơ̆n. Kơplah Amôt oei wei triu tơ Thêôka, dêh Juđa,’Bok Kei-Dei krao Amôt jing bơngai pơtruh nơ̆r Sư. Amôt ưh kơ đei hơmet lê̆ hơdrol ôh kơplah Kră Yang krao jang tơdrong pơtruh nơ̆r Sư noh (Amôt 7:14-15).
‘Bơ̆t chăl Amôt jang pơtruh nơ̆r’Bok Kei-Dei noh sơ̆, dêh char sư hiôk hian ưh kơ đei tơblah wang,’bar tŏ dêh char noh tơdrong jang sa mir ‘ba sư wơ̆ mơdrŏng dêh. Lu ‘bok pơgơ̆r dêh char Isơrael jing rai mơdrŏng rai mơdrŏng, arih pơang, pơhuach pơ’mêm jên tơmam, yua jên tơmam kư̆ kă mơ̆ng kơ hơ̆r. Gah tơdrong lui, ‘bôh gah ‘nguaih, dôm lu tơdrong kơ̆m giĕng noh lu sư wei, lu sư lăng nhen thoi gĭt, nhen thoi pơyom dêh (trong 21-23).
Mă-lei pang gah đon’lơ̆ng noh lu sư ưh kơ đei, lu sư arih pơang, pơhuach jên tơmam kư̆ kă, pơgŏ pơđep pơkep pơjuă lu bơngai dơnuh hin pơmat tat (Amôt 2:6-7;4:1;5:11-12). Yua kơ ‘noh bơih na Kră Yang wơh Amôt năm tơ Bêthel anih tŏk-bŏk, anih tơm lăm dêh Isơrael, anih mă lu sư akŭm kơkuh, Amôt bơtho lu nơ̆r trăp dêh, khan: Kră Yang areh lu tơmam soi, Kră Yang ưh kơ lăp đon dôm tơdrong lu sư pơm phĕt akŭm bơngai tơpôl lơ, Kră Yang ưh kơ iŏk tơmam lu sư pơyơ̆r, Kră Yang kuă kơ mơ̆ng nơ̆r lu đe ei hơri ư-ang kơ Sư…(trong 21-23). Amôt yua anăn Kră Yang khan lê̆ hơdrol tơbăt kơ lu ‘bok pơgơ̆r, mưh pơm kơnê̆ gô răm, athei tơbral,’nĕ pă pơjuă pơkep lu bơngai dơnuh hin,oei sa mă hơtŏ hơnơ̆ng, ưh kơ pơdê bơngai âu gĭt kơ bơngai to, na tơdrong sek wă apah dah sek wă phak lu kon pơlei pơla kư̆m lei lăi mơ̆n, mă bơngai mơdrŏng dah dơnuh, pơm tih dah kon pơlei hmă, athei sek mătơpăt hơnơ̆ng, bơngai bu pơm ‘lơ̆ng kiơ̆ kơ sư pơm‘lơ̆ng, bơngai bu pơm kơnê̆ apah kiơ̆ kơ tơdrong sư pơm kơnê̆ (trong 24). Lu bơngai pơgơ̆r đe Isơrael‘nâu hei, dah lu sư ưh kơ tơbral lei Kră Yang gô ăn lu bơngai đơ̆ng char nai rôp lu sư chông ba pơm bơnă tơ char lu đe ei (trong 27). Kră Yang yua Amôt tơbăt Nơ̆r Sư khan mưh pơm kơnê̆ gô răm, mă-lei lu ‘bok pơgơ̆r ei oei hơnơ̆ng kơ pơm kơnê̆ đĕch na Kră Yang pơm keh Nơ̆r Sư tơbăt noh‘blep thoi Sư khan. Lăm sơnăm 722 A.K (Adrol kơ Kră Yang Yêsu), dêh char tih pran Asiri tơ gah yă nơ̆m năm blah tơgar iŏk dêh char Isơrael, rôp pơđĭ lu ‘bok pơgơ̆r,lu bơngai jang hơdai lu sư, chông ba pơm bơnă tơ dêh char Asiri, oei lon lăi pôm lu bơngai dơnuh hoh lê̆ lu sư arih lăm dêh Isơrael noh. ’Noh Kră Yang phak bơtho hăm tơdrong tơpăt hơnơ̆ng Sư, mă khan lei ră, Sư kư̆m pơkă minh năr tơ anăp ei kơnh, Sư gô chông kon pơlei Sư wih brŏk, Sư pơtăm kon pơlei Sư tơ teh char lu sư kơdih, oei tơ noh linglang ưh kơ đei bu kĕ bŭch lu sư đơ̆ng teh char mă Kră Yang ăn kơ lu sư noh (Amôt 9:11-15).
Amôt bơngai pơtruh nơ̆r’Bok Kei-Dei pơma rơđah khan ‘Bok Kei-Dei bơih Tơ’ngla pơgơ̆r đĭ-đăng kon bơngai lăm teh đak âu, Sư Tơ’ngla tơpăt hơnơ̆ng, Sư lăng đĭ-đăng kon bơngai atŏ hơnơ̆ng đĕch ưh kơ atŏk bu pơjuă bu,Sư kư̆m Tơ’ngla ‘mêm mơnat, Sư oei sa pơma dơnuh hăm kon bơngai bơ̆n hiôk’lơ̆ng dêh,gơh găt dêh. Bơ̆n âu kon Sư, bơ̆n kư̆m athei oei sa hăm lu bơngai jih ‘ma iŏk jơhngơ̆m ‘mêm,dim găt,tơpăt ‘lơ̆ng đơ̆ng ‘Bă bơ̆n noh, pơchrang hơdah ăn lu sư. Apinh Kră Yang tơgŭm bơ̆n arih tơpăt hơnơ̆ng’lơ̆ng trŏ thoi tơdrong Sư hơgăt đei bơtho lăm Sơ̆p Hla bơar Sư păng kư̆m arih ‘mêm mơnat thoi Kră Yang hlôi ‘mêm kơ bơ̆n bơih noh. Hơpơi wă dêh kơ tơdrong arih bơ̆n ư-ang pơchrang hơdah Anăn Kră Yang Tơ’ngla mă bơ̆n hơtai oei kơkuh’nâu.
Ơ ‘Bă mă ‘mêm mơnat găt dim, apinh Ih tơgŭm inh đei jơhngơ̆m hưch hanh’maih hŏk pơhrăm Nơ̆r Ih rim năr wă kơ Nơ̆r Ih hơmet ming inh, phak bơtho inh năr inh yoch glăi,bơtho inh arih pơchrang hơdah tơdrong ‘mêm mơnat tơpăt hơnơ̆ng đơ̆ng Ih noh kơ đĭ-đăng bơngai, pơchrang hơdah hăm tơdrong inh arih sa rim năr. Inh krao khan yua Anăn Kră Yang Yêsu Krist, Amen!
Bơ̆n tam arih ‘mêm mơnat tơpăt hơnơ̆ng’lơ̆ng trŏ thoi Nơ̆r Kră Yang bơtho ưh?
Đŏk Sơ̆p Hla bơar’Bok Kei-Dei lăm pêng sơnăm: Êsêkiên 2-3.
Kênh Youtube BHKTHN:
