Mathiơ 23:27-33
“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai ‘bơ̆r đak klak ŭnh. Lăng akâu iĕm rŏ thoi bơsat đe ‘nao pơm, mă-lei lăm to đei atâu ôm.” (Mathiơ 23:27)
Nơ̆r jet tơchĕng pơwao:
– Kră Yang Yêsu khan kơ lu thây bơtho đe Juđê păng bơngai Pharisi gah tơdrong kiơ?
– Yua kơ kiơ Kră Yang khan kơ lu ‘bơ̆r đak klak ŭnh?
– Lu bơ̆n hăm nơ̆r Kră Yang khan noh thoi yơ?
Kră Yang Yêsu khan kơ thây bơtho đe Juđê păng bơngai Pharisi ‘bar tơdrong jô̆ lu sư bơngai bơ̆r đak klak ŭnh. Mă minh, lăng akâu lu sư “rŏ thoi bơsat đei ‘nao pơm, mălei lăm to đei atâu ôm” (trong 27). Đơ̆ng rŏng kơ bơyan ‘mi bơngai Juđê juăt kơ tơsơng hơmet ming lu bơsat, mă loi jum dăr Jêrusalem wă tơgŭm lu bơngai tơmoi đơ̆ng ataih năm huay kơ hơtŭt ‘bơm, yua kơ dah hơtŭt ‘bơm lei lu sư gô jing ‘mê̆ ‘mach lăm tơpơh năr (Jô̆ bơngai 19:16), na ưh kơ gơh năm akŭm năr phĕt tih. Kră Yang Yêsu oei pơma kơ tơdrong arih lu thây bơtho tơdrong juăt ăn kơ đe jơ̆ lu sư bơngai chă pơm ‘nguaih đĕch, khan trŏ wă pơklơ̆p lê̆ lăm jơhngơ̆m hơlĕnh, kơnê̆!
Mă bar, lu sư “pơm chă pơrŏ hơmet ming lu bơsat bơngai pơtruh nơ̆r ‘Bok Kei-Dei, păng bơsat lu bơngai ‘lơ̆ng tơpăt, wă kơ ‘lơ̆ng rŏ.” (trong 29). Wă khan lu sư pơm khan pơyom lu bơngai pơtruh nơ̆r ‘Bok Kei-Dei hăm tơdrong lu sư hơmet ming bơ̱sat lu bơngai ‘noh mă ‘lơ̆ng păng lu sư kư̆m pơma pơang khan: “Dah bơ̆n arih hơdai lu yă ‘bok bơ̆n sơ̆, bơ̆n ưh kơ pơlôch lu bơngai pơtruh nơ̆r ‘Bok Kei-Dei thoi lu sư ôh” (trong 30). Lu sư hơlĕnh dêh yua kơ lu sư oei pơma khan pơyom kơ lu bơngai pơtruh nơ̆r ‘Bok Kei-Dei mălei lu sư oei chă đon wă rôp Kră Yang Yêsu jơ̆ ‘Bok pơtruh nơ̆r ‘Bok Kei-Dei mă tih hloh! Lu sư kư̆m thoi lu yă ‘bok lu sư sơ̆ mơ̆n păng pơm yoch tih hloh dơ̆ng kơplah lu sư sơngah păng pơ̆ng pơlôh Kon ‘Bok Kei-Dei tơ ‘long pơglang. Kră Yang Yêsu jô̆ lu sư khan “adrĕch adrung ‘bih tur mak kang” (trong 33). Wă pơma kơ tơdrong arih lu bơngai pơgơ̆r tơdrong lui bơngai Juđê oei pơrăm drĕch sư kơdih kơplah lu sư oei hơnơ̆ng kơ ayăt kơ Kră Yang. Ưh kơ lui kơ Kră Yang Yêsu noh jơ̆ ‘Bok Mêsi mă hla bơar Pah so đei chih roi bơih. Thoi noh, ning mônh ‘Bok Kei-Dei phak lu sư lăm dơnâu ŭnh tơpă. Bơngai lui dang ei Kră Yang Yêsu kư̆m pơma kơ bơ̆n thoi noh mơ̆n. Dah bơ̆n oei arih lăm tơdrong yoch lăm jơhngơ̆m ‘bĕnh kơ tơdrong kơnê̆ ‘mê̆ ‘mach mălei gah ‘nguaih rŏ kơ bơngai pơm ‘lơ̆ng lei bơ̆n kư̆m dai bơngai ‘bơ̆r đak klak ŭnh mơ̆n, pơm ‘mê̆ ‘mach kơ lu bơngai tơ’bưh hăm bơ̆n. Dah bơ̆n ưh kơ ‘bôh tơdrong arih bơ̆n kơdih thoi yơ dah mă ‘bôh bơih ră tơdrong glăi bơ̆n kơdih mălei pơrơ̆ng arih thoi noh wă pơm kơ bơngai puh pơ̆k păng jing kơnê̆ ‘mê̆ ‘mach, dah bơ̆n pơma kơ đe hăm nơ̆r rơngơp, mălei ưh kơ trŏ kơ tơdrong tơpăt, hăm dôm tơdrong tơgŭm tơpă hloi mălei ưh kơ lĕch đơ̆ng tơdrong ‘mêm mơnat, pơma đĕch mă ưh kơ pơm… lei bơ̆n oei pơrăm ‘nhŏng oh, păng pơm kơ lu bơngai ‘nao mơ̆t lăm Khul bơngai lui hlôh hơwơ̆l gah Kră Yang Yêsu păng tơdrong ‘nao ‘lơ̆ng Sư. Apinh Kră Yang ăn kơ bơ̆n pơ’lơ̆ng lăm tơdrong arih wă kơ Kră Yang huay kkơ pơma kơ bơ̆n khan bơngai ‘bơ̆r đak klak ŭnh (Habakuk 2:15).
Ơ Kră Yang, apinh Ih tơgŭm inh arih mă trŏ, arih tơpăt hăm Kră Yang păng hăm bơngai nai wă kơ chăl arih inh ling lang Kră Yang lăp đon păng tơgŭm tơiung dih băl. Apinh Ih ăn nơ̆r pơma păng tơdrong jang inh huay kơ pơglăi lu bơngai jum dăr. Yua anăn Kră Yang Yêsu Krist, Amen.
Bơ̆n pơ’lơ̆ng lăm hơlen tơdrong arih bơ̆n oei ‘bơm ưh kơ ‘lơ̆ng dah ‘lơ̆ng hăm lu bơngai jum dăr bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: I Kôrintô 16
Kênh Youtube BHKTHN:
