Klei Aê Diê Blŭ: Klei Bi Hriêng 25:25-26
Êlan kliăng: “Ƀiădah hlei pô mnăm êa kâo brei amâo srăng lŏ mhao ôh; êa kâo brei srăng jing hlăm ñu sa bĭt akŏ êa bluh truh kơ klei hdĭp hlŏng lar” (Y-Yôhan 4:14)
Klei êmuh ksiêm mĭn: Si mblang “Klei Mrâo Mrang Jăk mơ̆ng čar kbưi”, leh anăn “akŏ êa arăng bi čhŏ”? Khua Yang Yêsu jing Êa Hdĭp si mblang? Si drei ba leh Klei Mrâo Mrang Jăk, êa hdĭp kơ pô mkăn?
Dua êlan Klei Bi Hriêng mđrĭng mbĭt čiăng bi msĕ akŏ êa jăk, êđăp hŏng akŏ êa arăng bi čhŏ mơ̆ng klei tuôm găn jăk leh anăn amâo jăk hlăm klei hdĭp. Klei mrâo mrang ti krĭng kbưi jing khăng hâo hưn kơ gŏ sang, amâodah klei hâo hưn kơ boh tŭ mơ̆ng kdrăn bi blah. “Klei Mrâo Mrang Jăk mơ̆ng čar kbưi” dưi bi hmô msĕ si “êa êđăp” lač kơ rup jăk, êđăp, bi hrăp kơ pô mâo mă êa hlăm boh klei êpa êa thu kŏng đŏk. Msĕ si klei mơak mơ̆ng kbưi truh, Klei Mrâo Mrang Jăk ăt ba kơ anak mnuih klei mơak, klei hrăp hlăm ai tiê.
Wăt tơdah snăn dưn, amâo djŏ ti ala čar bi mhao jih klei êpa êa kyua lu blư̆ tuôm hŏng êa arăng bi čhŏ, phŭn êa čhŏ djhan, amâodah khuôt thu. Hŏng sa čô tue dôk êpa êa, čang hmăng dưi ƀuh akŏ êa doh, ƀiădah tơdah ƀuh sa kbăng êa čhŏ, khuôt, srăng ngă kơ diñu luč jih klei čang hmăng. Dua êlan Klei Bi Hriêng msĕ si klei bi hmô lač kơ klei luč čang hmăng êlam snăk arăng ƀuh tơdah mnuih kpă ênô ngă soh. Arăng čang hmăng mnuih kpă ênô sĭt suôr nanao hŏng knuih jăk pô msĕ si čang hmăng akŏ êa doh, êđăp. Ƀiădah tơdah mnuih kpă ênô êbat ting ring, tŭ ư hŏng mnuih jhat, snăn ti lŏ mâo hĕ pô srăng mgang phung kpă ênô!
Khua ƀĭng kna Y-Yôhan lŏ yăl dliê klei anei, hlăk êjai hlue ngă bruă ti lăn, sa hruê adih, Khua Yang Yêsu bi tuôm hŏng sa čô mniê Samari ti djiêo kbăng êa, leh anăn bi blŭ hrăm, hlăk êjai akâo êa mnăm mơ̆ng pô anăn, Khua Yang hưn leh hŏng ñu mâo sa mta êa pia jing “êa hdĭp”. “Êa hdĭp” jing Khua Yang Yêsu. Hlei pô mă tŭ Khua Yang srăng dưi dưn klei hdĭp hlŏng lar. Hlei mnăm êa anăn srăng amâo lŏ êpa ôh, kyua êa hdĭp srăng jing sa akŏ êa hlăm mngăt, bluh truh kơ klei hdĭp hlŏng lar (Y-Yôhan 4:14).
Anak mnuih hlăm lăn ala dôk êgah êmăn hlăm kđeh asăr, êpa mhao hlăm mngăt. Ti anăp klei kpĭ hlăm klei hdĭp, lu mnuih duah leh kơ klei đăo, ƀiădah knhal tuč diñu tŭ klei êgah êmăn, thu krô hlăm mngăt, luč klei čang hmăng, rŭng răng hlăm klei hdĭp. Khua Yang Yêsu mtô: “Nao bĕ tar ƀar lăn ala leh anăn mtô klei mrâo mrang jăk kơ jih jang găp djuê mnuih” (Y-Markôs 16:15). Akâo kơ Khua Yang đru grăp čô drei gưt kơ Klei Aê Diê Blŭ jih ai tiê hiu hưn Klei Mrâo Mrang Jăk jing akŏ “êa êđăp”, ba klei êđăp hrăp kơ mngăt hlei pô dôk êmăn, rŭng răng kyua klei ktrŏ ti krah klei hdĭp. Akŏ êa hdĭp hlŏng lar Khua Yang hlăm drei amâo mdei hlăm asei mlei, gŏ sang ôh, ƀiădah brei jing akŏ êa hdĭp ba klei hdĭp hlŏng lar kơ lu mnuih.
Drei mprăp srăng hiu hưn Klei Mrâo Mrang Jăk leh anăn ba êa hdĭp kơ grăp čô mnuih leh mơ̆?
Wah lač: Ơ Khua Yang, kâo bi mni kơ Ama pap brei leh leh anăn brei kơ kâo êa hdĭp. Akâo kơ Yang Mngăt Jăk mtrŭt ai tiê kâo gĭr hiu hưn Klei Mrâo Mrang Jăk, bŏ hŏng êa hdĭp ba klei hdĭp hlăm mngăt kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
