Hôsia 11:1-11
“Inh đei yua boih tơdrong mơnat thoi tơlei akar, păng yua tơlei tơ̆n akar tơdrong ‘mêm dui lu sư. (Hôsia 11:4a)
Nơ̆r jet tơchĕng pơwao:
– Kră Yang ‘mêm kơ kon pơlei Sư thoi yơ păng lu sư oei sa hăm Kră Yang thoi yơ?
– Yua kơ kiơ Kră Yang ơh blĕk ră mă-lei Sư ưh kơ pơrăm lê̆ lu kon pơlei Sư ling-lang khŏm khŏm?
– Bơ̆n gô đei jơhngơ̆m thoi yơ kơplah bơ̆n băt kơ Kră Yang dim găt băt ‘mêm mơnat pre jơhngơ̆m răp sơng bơ̆n wih brŏk tơ Sư?
Hôsia bơngai pơtruh nơ̆r ‘Bok Kei-Dei, sư arih kơplah sơnăm 755-725 A.K (Adrol kơ Kră Yang Yêsu), sư bơtho Nơ̆r Kră Yang tơ dêh char Isơrael gah yă nơ̆m, kơplah ei dêh char đĭ prôch wă răm bơih. Kơplah noh, tơdrong arih gah bơhngol kon pơlei Kră Yang jruh tơpă, kơnê̆ tơpă yua kơ lu sư kơkuh kơ rup yang păng arih thoi lu bơngai tơmoi char ‘nguaih. Lu pơtao tơgar băl anih pơtao, pơgơ̆p pôm ‘bơ̆r đon hăm bơngai Asiri păng bơngai Êyiptơ, na blah plơ̆ Kră Yang. Yua kơ ‘noh bơih, Kră Yang wơh Hôsia bơngai pơtruh nơ̆r Sư krao athei kon pơlei tơbral wih brŏk tơ Kră Yang Tơ’ngla mă ‘mêm mơnat kơ lu sư thoi ‘bă ‘mêm kơ kon. Mă-lei, Kră Yang kư̆m tơbăt khan wă phak hơmet tơdah lu sư oei hơnơ̆ng blah plơ̆ Kră Yang, yua kơ Kră Yang tơ’ngla tơpăt hơnơ̆ng. Kră Yang yua anăn adrĕch Êphraim pơm anăn dêh char gah yă nơ̆m ei,đei pơlei Samari pơlei tih tơm lăm dêh char noh (trong 3-9).
Kră Yang tơ’blŏk dơ̆ng tơdrong ‘mêm Sư kơplah Sư dŏng pơklaih, ăn lu kon pơlei Sư lĕch đơ̆ng dêh Êyiptơ sơ̆, chông ba lu sư mơ̆t tơ dêh Kanaan, dêh mă Sư pơkă wă ăn kơ lu kon pơlei Sư noh wă kơ lu kon pơlei Sư kơkuh kơ Sư tơ noh, thoi Sư đei pơgơ̆p pơkă bơih tơ kông Sinai (trong 1). Trŏ sư, lu sư ‘mêm păng kơkuh kơ Kră Yang, mă-lei lu sư tă tơ rai đunh rai weh ataih đơ̆ng Kră Yang păng kơkuh kơ rup yang (trong 2). Kră Yang phak hơmet kon pơlei Sư kiơ̆ kơ tơdrong tơpăt hơnơ̆ng ’lơ̆ng trŏ Sư, mă-lei đơ̆ng rŏng kơ ‘noh, Sư kư̆m oei pơklaih lu sư thoi bơngai ‘bă pơtơ̆p pơjuăt kon sư oei’lơ̆p yak năm đơng-đơ̆,đơng-đơ̆ noh (trong 3). Kră Yang phak hơmet lu sư wă kơ lu sư wơ̆ ‘lŏ lăm tơdrong arih lui yom kơ Sư. Mă khan lei ră, Kră Yang kư̆m hlôi yua tơlei dim găt, yua glang ‘mêm mơnat oei sa ‘mêm mơnat gơh găt hăm lu sư thoi Bơngai Wei triu iŏk ti rơngơp hơbôn “plôh ‘long ăt đơ̆ng ako lu sư”, kư̆m thoi bơngai ‘bă ‘mêm mơnat “pôk ăn tơmam sa ‘me‘bơ̆t ‘bơ̆r lu sư”. Tơpă ưh kơ đei tơdrong ‘mêm bu atŏ dang tơdrong ‘mêm Kră Yang! Mă-lei kon pơlei Sư arăng kơ̆l dêh kuă kơ wih brŏk tơ Sư. Thoi noh yua kơ jơhngơ̆m Kră Yang tơpăt hơnơ̆ng ’lơ̆ng tôm, lei na Sư khŏm phak bơtho lu kon pơlei Sư, jao lu sư kơ pơtao đe Asiri char gah yă nơ̆m ei (trong 5-7). Yua kơ Kră Yang‘lơ̆ng tơpăt noh, Sư ưh kơ ăn lu kon pơlei Sư pơm yoch, păng Sư ưh kơ wă lu kon pơlei Sư yua iŏk tơdrong ‘mêm Sư ‘noh, yua hloh hnang, pơm yoch bưh, khan Sư oei mơnat mơ̆n, ’Bok Kei-Dei ‘Bă ‘mêm mơnat găt dim ưh kơ wă kơ kon pơlei Sư pơm thoi noh ôh. Kơplah Sư phak hơmet, Sư wơh bơngai pơtruh nơ̆r Sư năm bơtho khan kơ lu sư, mă-lei lăm lu sư ưh kơ đei bu tơbral hloi, lu sư “nhơnhit pơkă wă achăng lê̆ Kră Yang ngơ-ngei” (trong 7).
Kră Yang, mă khan Sư khŏm bơtho hơmet khŭl kon pơlei Sư ưh kơ pơm kiơ̆ kơ nơ̆r pơgơ̆p pơkă, mă khan tơ’bơ̆p minh khul kon pơlei arăng kơ̆l ră mă-lei Kră Yang kư̆m ưh kơ wă pơrăm lu sư thoi Sư đei pơrăm bơih pơlei tih Sêbôim păng pơlei Atma hơdai hăm pơlei Sôđôm Gômôrơ sơ̆ yua kơ lu sư pơm yoch tih dêh noh (Bơtho khôi juăt 29:23). Kră Yang Sư Tơ’ngla tơpăt hơnơ̆ng, mă-lei Sư kư̆m Tơ’ngla ‘mêm mơnat găt dim, yua kơ ‘noh bơih na Sư khan“Inh pơgơ̆t jơhngơ̆m tơtŏ Inh” păng “ưh kơ wă pơlôch pơrăm lu sư” (trong 9). Kră Yang gô krao lu sư wih brŏk thoi khul sem pơgâm đơ̆ng tơklah ataih ră mă-lei oei wih brŏk tơ khul tơpôl sư dơ̆ng mơ̆n; wă kơ tuch luch sư, thoi nơ̆r Kră Yang khan: “wă kơ Inh ba lu sư wih brŏk tơ hnam lu sư dơ̆ng.”
Yua kơ Kră Yang Tơ’ngla lơ̆ng tơpăt, mưh ‘bôh bơngai pơm kơnê̆ noh Sư hil tơpă hloi, ưh kơ lê̆ ôh; lei ră, mă-lei Sư kư̆m oei ling-lang tơ’bôh jơhngơ̆m ‘mêm mơnat găt dim Sư noh mơ̆n. Apinh Kră Yang tơgŭm bơ̆n tơbral hloi yoch bơ̆n kơplah bơ̆n kơtơ̆ng ‘bơ̆r Sư hil, tơbăt tơ’blŏk kơ bơ̆n.
Ơ ‘Bă mă‘mêm mơnat găt dim! Inh băt lơ wơ̆t inh yak năm wơ̆l jrok, pơm yoch hăm Ih. Âu inh tơbral, apinh Ih mơnat pă jô̆ yo tơdrong yoch glăi inh, dui ba inh wih brŏk wă kơ inh arih oei lăm hnam Ih Tơ’ngla‘mêm mơnat. Inh krao khan yua anăn Kră Yang Yêsu Krist, Amen!
Mưh bơ̆n pơm yoch, bơ̆n tơbral hloi dah oei hơnơ̆ng kơ arăng kơ̆l ‘bơ̆t anăp Kră Yang Tơ’ngla ‘mêm mơnat?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 1.
Kênh Youtube BHKTHN:
