Êsai 1:1-19
“Sư gô hơ-oei thoi bơngai jôr hu pơm rơgoh đĭ, Sư gô chhut lu kon drŏ-nglo Lêwi, pơm ăn kơ lu sư rơgoh thoi maih păng hu, lu sư gô pơyơ̆r tơmam soi kơ Kră Yang lăm tơdrong tơpăt” (Malachi 3:3).
Nơ̆r jet tơchĕng pơwao:
– Yua kơ kiơ Kră Yang bơtho pơjĭ kon pơlei Sư?
– Kră Yang bơtho pơjĭ kon pơlei Sư noh Sư kơnhăm wă pơm kiơ?
– Jơhngơ̆m bơ̆n thoi yơ mưh Kră Yang bơtho pơjĭ bơ̆n?
‘Bok Êsai jang tơdrong jang pơtruh nơ̆r ‘Bok Kei-Dei kơplah dang 740-686 A.K.., lăm lơ chăl lu pơtao đe Juđa pơgơ̆r (trong 1), păng dang 100 sơnăm hơdrol kơ dêh char Ju đa ‘nâu pơchah răm, Kră Yang yua Êsai pơtruh nơ̆r Sư khan Sư đei minh “khul kon hơ’lơ̆p”kăl kơ wei rong păng bơtho khan, mă-lei lu kon Sư noh ‘nhŏ mă hlôh băt ‘biơ̆ hloi, lu sư ling-lang kơ pơm kơnê̆, pơm ưh kơ tơpăt hơnơ̆ng,ưh kơ‘lơ̆ng trŏ…(trong 2-4). Lu sư pơm thoi noh, lĕch sư,‘Bok Kei-Dei ‘Bă tơ plĕnh bơtho pơjĭ lu sư kơdih kơdih, truh tơ teh đak lu sư hloi (trong 5-7). Kră Yang phak lu sư noh yua kơ kiơ̆ kơ tơdrong pơgơ̆p pơkă, Kră Yang athei lu sư kơkuh kơ minh ‘nu ‘Bok Kei-Dei đĕch păng arih tơpăt hơnơ̆ng ‘lơ̆ng trŏ, wă khan chu pơm kiơ̆ kơ khôi juăt Sư, jang pơm kiơ̆ kơ tơdrong tơpăt hơnơ̆ng (Bơtho khôi juăt 10:12-13; Mika 6:8). Tơdrong Kră Yang bơtho pơjĭ ‘nâu tơ’bôh tơdrong tơpăt hơnơ̆ng ‘lơ̆ng trŏ Sư noh.
Đei lơ bơngai jet wă kơ băt yua kơ kiơ adrĕch Isơrael ‘nâu Kră Yang rơih bơih,mă-lei tă-tơ pŭ iŏk tơdrong Kră Yang bơtho pơjĭ lơ dêh hnang! Kră Yang bơtho pơjĭ lu sư kơlih yua kơ ‘bar tơdrong tơ ala âu: Mă minh, đei roi rơđah lăm trong 2 khan yua kơ lu sư plơ̆ blah Kră Yang: Kră Yang khan: “Inh wei rong lu kon hơ’lơ̆p Inh, dĭng truh kơ ‘lŏ mă-lei lu sư plơ̆ blah Inh.” Mă ‘bar,yua kơ mă bu bu kư̆m băt: Tơmo gĭt noh tơ’ngla sư khŏm pat đunh dêh ‘mơ̆i, hu maih kư̆m lei lăi mơ̆n, tơ’ngla sư khŏm ‘buh hling tơ ŭnh mă rơgoh ‘mơ̆i na hu maih noh jing rai gĭt. Kră Yang khan: “Inh gô yơ̆r ti pơm tơwih, Inh pơgoh lê̆ ‘bruih ‘brăm đơ̆ng ih, păng iŏk hŭt lê̆ rơ̆m rĕk ih” (Êsai 1:25; Malachi 3:3).
Mă khan lei ră, kơplah Kră Yang bơtho pơjĭ, Sư ưh kơ lê̆ lu sư pŭ hloh kơ jơhngơ̆m lu sư kĕ ôh, Nơ̆r Sư khan thoi âu: “…Inh gô phak iĕm kiơ̆ kơ tơdrong trŏ, Inh ưh kơ lê̆ ôh phak lu iĕm” (Jêrêmi 30:11 b). Mưh kon pơlei Kră Yang pơhrăm băt tơdrong‘lơ̆ng tơpăt Kră Yang bơih lei Kră Yang wă kơ lu sư khŏm tơbral tơdrong yoch, wih brŏk dơ̆ng tơ Sư păng arih tơplih wă kơ jơhngơ̆m lu sư đơ̆ng yoch “jing kok thoi prĕl”păng “gô sa tơmam ‘lơ̆ng hloh lăm teh âu” (trong 18-19). Kư̆m lei lăi thoi nơ̆r Êsêkiên bơngai khan lê̆ hơdrol đơ̆ng rŏng Êsai ‘nâu 100 sơnăm,sư khan: “ Ơ adrĕch Isơrael, Inh gô sek tơlang lu iĕm rim ‘nu kiơ̆ kơ tơdrong lu sư đei pơm. Athei wih tơbral bĕ păng hŭt dôm tơdrong yoch kơnê̆ lu iĕm, wă kơ tơdrong kơnê̆ huay kơ pơgăn pơrăm lu iĕm” (Êsêkiên18:30). Kon pơlei Kră Yang đei tơdrong hơmĕng tih dêh đơ̆ng rŏng kơ Kră Yang bơtho pơjĭ. “Bĕ bơ̆n, jah wih brŏk tơ Kră Yang, Sư hek lê̆ lu bơ̆n bơih, mă-lei Sư gô pơklaih bơ̆n; Sư đei teh pơjĭ bơ̆n, mă-lei Sư gô ming rơka noh” (Hôsia 6:1). Lăm Hla bơar Êsai 1:20-31, Êsai bơngai pơtruh nơ̆r ‘Bok Kei-Dei kư̆m tơbăt wă kơ lu sư kơchăng khan tơdrong tơpăt hơnơ̆ng Kră Yang noh gô teh bơtho lu sư tơdah lu sư hơlơ̆k pơm yoch dơ̆ng (trong 20-25, 28-31). Na tơdah lu sư arih tơpăt hơnơ̆ng ‘lơ̆ng trŏ lei Kră Yang gô pơklaih lu sư (trong 27). Kră Yang ling-lang jôr, pat hơmet lu kon pơlei Sư wă kơ jing rai ‘lơ̆ng hloh dơ̆ng, đei yua ăn kơ Kră Yang hloh dơ̆ng. Bơ̆n kăl praih hơdrăl băt kơnăl kơ tơdrong ‘mêm ‘Bă bơ̆n tơ plĕnh’bơ̆t Sư bơtho pơjĭ bơ̆n; bơ̆n kăl kơ băt tơdrong tơpăt hơnơ̆ng‘lơ̆ng trŏ Sư noh teh bơtho bơ̆n wă kơ bơ̆n jah tơbral kơplah jơ oei tam, mưh hiơ̆, klui lei ưh pă tam bơih.
Ơ ‘Bă mă ‘mêm mơnat tơpăt hơnơ̆ng! Bơnê kơ Ih ling-lang jôr hơmet inh wă kơ inh jing ‘lơ̆ng rơgoh hloh dơ̆ng. Apinh Ih bơtho hơmet inh rim wơ̆t inh yak năm jrok glăi wă kơ rim năr inh kang rai nhen Ih, arih rai ‘lơ̆ng tơpăt,’lơ̆ng rơgoh hloh dơ̆ng. Inh krao khan yua Anăn Kră Yang Yêsu Krist, Amen!
Bơ̆n hăm băt kơnăl tơdrong Kră Yang bơtho pơjĭ na jah tĕnh tơbral ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 85-86.
Kênh Youtube BHKTHN:
