Klei Aê Diê Blŭ: II Y-Timôthê 4:1-5
Êlan kliăng: “Mtô klei Aê Diê blŭ, brei ih gĭr thâodah mông găl amâodah amâo găl ôh” (II Y-Timôthê 4:2a)
Klei êmuh ksiêm mĭn: Ya ngă Khua ƀĭng kna Y-Pôl mtă kơ Y-Timôthê brei mtô Klei Aê Diê Blŭ hlăm jih jang klei truh? Ya klei bi hriăm drei mơ̆ng klei mtă anei?
Khua ƀĭng kna Y-Pôl hưn mdah klei mtă hlăm êlan 1 ti anăp Aê Diê leh anăn Khua Yang Yêsu Krist jing Pô srăng lŏ hriê phat kđi phung hdĭp leh anăn phung djiê. Brei Y-Timôthê ngă bruă jao yuôm bhăn jing “mtô Klei Aê Diê Blŭ” jing klei mtô hưn Klei Blŭ Khua Yang, hưn klei đăo kơ Khua Yang, tui si klei Khua Yang atăt gai. Mtô hưn Klei Aê Diê blŭ jing sa bruă klam yuôm, dleh kyuanăn yơh ñu wah lač nanao čiăng akâo klei atăt gai, klei pap mơ̆ng Khua Yang.
Khua ƀĭng kna Y-Pôl mtrŭt Y-Timôthê “mtô klei Aê Diê blŭ, brei ih gĭr thâodah mông găl amâodah amâo găl ôh” hŏng klei gĭr leh anăn klei răng (êlan 2). Yua Klei Aê Diê Blŭ kăp pioh “ƀuah”, ktrâo ti anôk jing soh čhuai, anôk kƀah leh anăn klei soh; “mkra”, hŏng klei ƀuah khăng ktang; leh anăn “mđĭ ai”, čiăng ba klei mtô hưn mmih jăk kơ klei khăp, klei pap brei klei soh leh anăn mnơ̆ng brei jing klei hdĭp hlŏng lar hŏng klei đăo kơ klei bi mtlaih kyua klei săn asei mlei Khua Yang Yêsu. Brei Y-Timôthê bi leh klă kluôm klei anei hŏng jih ai tiê gĭr leh anăn mtô. Kyuadah klei mtô hưn Klei Mrâo Mrang Jăk yuôm bhăn ba hriê klei khăp klei pap, klei hdĭp, klei čang hmăng, klei bi mđĭ ai leh anăn klei hơ̆k mơak hlăm Khua Yang Yêsu Pô Bi Mtlaih.
Klei kñăm kơ pô hiu hưn Klei Mrâo Mrang Jăk brei dôk sĭt suôr mtô Klei Aê Diê Blŭ hlăm jih jang klei truh. Pô mtô klei đăo dơ̆ng mơ̆ng ênuk Khua ƀĭng kna Y-Pôl thâo kral leh klei bi kdơ̆ng jing lu hĭn kơ klei êlưih găl, ƀiădah digơ̆ ăt dôk sĭt suôr tơl truh knhal tuč, kyuadah digơ̆ thâo klă digơ̆ dôk ngă bruă bi mtlaih mnuih mơ̆ng klei Khua Yang phat kđi. Păt čiăng jih jang phung mtô hưn Klei Aê Diê Blŭ tuôm găn sơăi hŏng klei phung mnuih bi kdơ̆ng, dơ̆ng mơ̆ng ênuk đưm hlŏng truh kơ hruê anei, “Diñu srăng hngah hmư̆ klei sĭt nik leh anăn wir tui hlue klei yăl dliê đưm amâo sĭt ôh” (êlan 4).
Ti knhal tuč, Khua ƀĭng kna Y-Pôl lŏ mñă kơ Y-Timôthê snei, wăt tơdah lu mnuih bi kdơ̆ng dưn, “Ƀiădah bi kơ ih, brei ih jing djŏ hnơ̆ng hlăm jih jang mnơ̆ng, gĭr tŭ klei knap mñai, mă bruă sa čô hiu hưn klei mrâo mrang jăk, bi leh klă bruă ih” (êlan 5). Bruă mtô hưn Klei Aê Diê Blŭ sĭt nik srăng mâo lu klei knap mñai. Kyuanăn, brei ñu mprăp ai tiê klei mĭn kăp mă bruă leh anăn bi leh jih ya klei Aê Diê kčưm dơ̆ng leh. Brei Y-Timôthê tŭ gĭr leh anăn dôk sĭt suôr bi leh klă kluôm bruă jao kơ pô.
Bruă mtô Klei Aê Diê blŭ, hưn Klei Mrâo Mrang Jăk amâo pioh knŏng kơ Y-Timôthê mphŭn dô ôh, ƀiădah ăt jing bruă jao kơ grăp čô drei hruê anei msĕ mơh. Grăp hruê drei ƀuh jŭm dar drei mâo lu mnuih “hngah hmư̆ klei sĭt nik” ƀiădah khăp dôk hmư̆ klei yăl dliê hơăi mang amâo sĭt ôh. Akâo kơ Khua Yang đăm lui drei jing êdu ai ôh, ƀiădah čuăn ai tiê hiu hưn Klei Mrâo Mrang Jăk kdlưn hĭn. Brei hŏng jih ai tiê wah lač akâo Yang Mngăt Jăk atăt gai, brei klei pap, leh anăn thiăm brei klei thâo čiăng đru drei dưi ngă bi leh klei mtă prŏng mơ̆ng Khua Yang, čiăng kơ drei dưi hơ̆k mơak hlăm hruê bi tuôm hŏng Khua Yang Yêsu.
Si ngă drei hŏng jih ai tiê wah lač, hiu hưn Klei Mrâo Mrang Jăk hlăm jih jang klei truh mơ̆?
Wah lač: Ơ Khua Yang, akâo Khua Yang đru kâo dôk sĭt suôr leh anăn gĭr hiu hưn Klei Mrâo Mrang Jăk hlăm mmông găl amâodah amâo găl. Akâo Khua Yang brei kâo mâo ai tiê jhŏng leh anăn kăp tŭ gĭr klei dleh knap kyua Klei Mrâo Mrang Jăk čiăng dưi ba klei bi mtlaih truh kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 52
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
