2 Timautes 4:1-5
Nqe cim:
“Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia” (2 Timautes 4:2a)
Lus nug rau sawvdaws xav:
– Vim li cas timthawj Paulus ntuas Timautes yuav tsum qhia Vajtswv Txojlus hauv txhua lub tsamthawj?
– Peb kawm tau yam dabtsi hauv Paulus tej lus ntuas no?
Timthawj Paulus samhwm hauv nqe 1 hais tias tabmeeg ntawm Vajtswv thiab Yexus Khetos tus uas yuav los txiav txim rau cov neeg ciaj thiab cov neeg tuag. Timautes yuav tsum ua tes haujlwm tseemceeb yog qhia Vajtswv Txojlus, tshaj tawm Vajtswv Txojlus raws li Nws kev coj. Kev tshaj tawm Vajtswv Txojlus yog ib lub luag haujlwm tseemceeb thiab nyuaj heev, vim li ntawd Timautes yuav tsum tau nco ntsoov thov Vajtswv, cia Nws coj kev thiab foom koob hmoov.
Timthawj Paulus txhawb Timautes “Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia” los ntawm kev ua siab ntev thiab ua tib zoo qhia (nqe 2). Cia li siv Vajtswv Txojlus los “qhuab qhia”, kom pom qhov yuam kev, qhov ua tsis tau zoo thiab txoj kev txhaum; “qhuab ntuas” dhau los ntawm txoj kev ntuas muaj zog khov kho thiab “qhia” kom coj tau txoj xov uas zoo kawg nkaus txog txoj kev hlub, kev zam txim, lub siab hlub tshua, txoj koob hmoov, thiab qhov khoom plig uas yog txoj sia ibtxhis dhau los ntawm kev ntseeg tau kev cawmdim los ntawm Tswv Yexus kev tuag. Timautes yuav tsum tau ua tiav txhua yam no los ntawm kev ua siab ntev thiab muab siab rau qhia. Vim txoj xov zoo ntawm Txojmoo Zoo yog coj txoj kev zam txim, txojsia, kev cia siab, kev txhawb zog, kev kaj siab thiab kev zoo siab mus rau txhua tus dhau los ntawm Tswv Yexus.
Lub ntsiab ntawm tus tshaj tawm Txojmoo Zoo yog yuav tsum ncaj ncees qhia Vajtswv Txojlus rau txhua lub tsamthawj. Cov tub tshaj tawm Txojmoo Zoo txij tiam timthawj Paulus nyob los txog nim no tej uas lawv ntsib, kev txomnyem ntau dua li kev tau zoo, tiamsis lawv yeej tseem ncaj ncees mus txog thaum kawg, vim paub zoo hais tias lawv tabtom ua tes haujlwm cawm tibneeg tawm ntawm Vajtswv kev txiav txim. Feem ntau cov uas qhia Vajtswv Txojlus puavleej raug tibneeg tawmtsam tsis hais thaum ub lossis nim no “Lawv yuav tsis nyiam mloog Vajtswv Txojlus lawm. Lawv tsuas nyiam mloog tej dabneeg xwb” (nqe 4).
Thaum kawg, timthawj Paulus ntuas Timautes hais tias txawm yog muaj neeg coob leej tawmtsam “Tiamsis koj tsis txhob ua li lawv. Koj yuav tsum tswj koj lub siab txhua lub sijhawm, ua siab ntev nyiaj tej kev txomnyem mus qhia Txojmoo Zoo” (nqe 5). Tes haujlwm tshaj tawm Vajtswv Txojlus paub tseeb hais tias yeej yuav muaj kev txomnyem. Vim li ntawd, Timautes yuav tsum tau npaj nws lub siab ua haujlwm thiab ua kom tiav raws li Vajtswv tau pib rau nws. Timautes yuav tsum ua siab ntev thiab rau siab ua nws tes haujlwm.
Tes haujlwm qhia Vajtswv Txojlus, tshaj tawm Txojmoo Zoo, tsis yog cia rau Timautes hnub thaud xwb, tiamsis yog rau peb txhua tus niaj hnub nim no thiab. Txhua hnub peb pom ib ncig ntawm peb muaj coob tus neeg “ntsaws pobntseg tsis xav mloog qhov tseeb” tiamsis nyiam mloog tej dab neeg, tej zaj uas tsis muaj qabhau dabtsi. Thov Vajtswv pab peb tsis txhob hnyav siab tiamsis haj yam txiav txim siab tshaj tawm Txojmoo Zoo. Cia li thov Vaj Ntsujplig coj qhia, pub koob hmoov, pub dag zog kom peb ua tiav Nws lolus samhwm tshaj Txojmoo Zoo, kom peb tau txais kev zoo siab hnub uas ntsib Tswv Yexus.
Thov Vajtswv,
Tus Tswv, thov pab nyuam yaus ncaj ncees thiab ua siab ntev tshaj tawm Txojmoo Zoo rau txhua lub tsamthawj. Thov pab nyuam yaus muaj lub siab tawv thiab muaj siab tiv taus kev txomnyem vim Txojmoo Zoo, kom coj tau coob leej ntau tus los tau txais kev cawmdim. Nyuam yaus tuav Tswv Yexus Khetos lub npe thov, Amees.
Peb puas tas siab thov Vajtswv tshaj tawm Txojmoo Zoo rau txhua lub tsamthawj?
Siab ntev tshaj Txojmoo Zoo
Txawm yuav txomnyem tau zoo los xij
Mus raws Vajtswv kev txib
Sawv ruaj tshaj tawm Leej Txiv lub npe.
Nyeem Vajluskub hauv peb lub xyoos: Yelemis 52
Kênh Youtube BHKTHN:
