Klei Aê Diê Blŭ: Klei Bi Hriêng 25:16-20
Êlan kliăng: “Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh” (Y-Markôs 12:31)
Klei êmuh ksiêm mĭn: Si Mtao Salômôn mtô anak brei hdĭp hŏng phung riêng gah? Si brei phung đăo hdĭp hŏng phung riêng gah? Si brei drei mđing mkŏ mjing klei bi mguôp hŏng phung riêng gah?
Mtao Salômôn mtô anak brei dôk hdĭp thâo mĭn hŏng phung riêng gah hlăm klei mâo hlăm klei hdĭp. Tal sa, brei anak mâo klei djŏ hnơ̆ng hlăm klei bi tuôm hŏng phung riêng gah. Boh blŭ “man hrăp” mñă kơ klei ƀuh hơăi mang, amâo mpŭ. Êa hnuê mmih, ƀiădah ƀơ̆ng lu đei snăn ƀlĕ ô̆, msĕ snăn mơh klei kriê dlăng, čuăn čhưn jing yuôm snăk, ƀiădah nao čuă čhưn lu đei amâodah sui đei, srăng ngă kơ phung riêng gah ƀuh êmăn (êlan 16-17). Kyua anăn klei hdĭp brei djŏ hnơ̆ng. Tal dua, hlăm klei bi mguôp hŏng phung riêng gah, brei sĭt suôr. Rup bi hmô kơ klei huĭ hyưt mơ̆ng sa klei bi mguôp amâo năng đăo knang. Klei hưn luar kơ phung riêng gah dưi bi hmô msĕ si klei jhat, bi êka mơ̆ng kdrăp bi blah, “kmŭt, đao gưm, amâodah ƀrăm knur”, hrô kơ mdjiê phung roh, snăn lŏ wĭt tlŏ ƀĭng găp. Hlăm hruê mâo klei truh, hrô kơ msĕ si êgei jăk suaih, đru kơ êsei mlei mâo mă mnơ̆ng tŭ jăk, snăn lŏ jing hĕ êgei ruă, ngă kơ asei mlei thiăm êmăn êmiêk; hrô kơ jơ̆ng suaih ktang mđĭ asei mlei awăt, snăn lŏ jing hĕ jơ̆ng êwiên êwu lĕ buh, hroh awăt kơ jih asei mlei. Klei bi mguôp “amâo sĭt suôr” snăn, knŏng ba klei ruă duam, ênguôt hnĭng. Knhal tuč, phung riêng gah brei mâo klei thâo bi pap, đru bi mđĭ ai hdơ̆ng pô. Phung kƀah klei bi pap dưi msĕ hŏng pô “mmuñ kơ mnuih mâo ai tiê ênguôt”, hrô kơ mđĭ ai snăn lŏ ngă kơ phung riêng gah thiăm klei êka, msĕ si mnuih êăt leh lŏ mă mđuĕ hĕ ao kpal êjai hruê êăt, leh anăn tuh êa msăm ti anôk êka
Klei bi mguôp hŏng phung riêng gah jing klei ngă dua nah, kyua anăn Mtao Salômôn mtô anak leh anăn phung riêng gah brei jing phung djŏ hnơ̆ng, sĭt suôr, leh anăn thâo pap brei.
Phung đưm mâo klei blŭ: “Čhĭ ayŏng adei kbưi, blei phung riêng gah giăm. Klei blŭ anei mtô amâo dưi dlăng hdjul ôh klei bi mguôp sa êrah ƀiădah mñă kơ grăp čô mđing mđĭ klei bi mguôp hŏng phung riêng gah. Jing phung đăo kơ Krist, brei drei hdĭp hŏng hnơ̆ng čuăn lu hĭn hŏng phung ka thâo Aê Diê. Khua Yang Yêsu klah čŭn kluôm klei bhiăn hlăm dua klei: “brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’ Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh” (Y-Markôs 12:30-31). Akâo kơ Khua Yang đru grăp čô drei mâo klei thâo mĭn, hdĭp hlue si Klei Aê Diê Blŭ mtô čiăng jing phung riêng gah năng đăo knang, mâo klei khăp, bi êdah klei hdĭp phung đăo, leh anăn bi guh kơang Anăn Aê Diê.
Si klei brei drei bi mlih hlăm klei bi blŭ hrăm hŏng phung riêng gah?
Wah lač: Ơ Khua Yang, bi mni kơ Ih khăp leh kơ kâo, pap brei klei soh kâo leh anăn brei kâo jing anak Ih. Akâo kơ Ih đru kâo hdĭp thâo khăp, djŏ hnơ̆ng, sĭt suôr, thâo pap hŏng phung riêng gah čiăng kơ lu mnuih thâo kral Ih hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 50
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
