Tơdrong Pơđơ̆k 25:16-20
“Na tơdrong juăt mă ‘bar thoi âu: Bơ̆n athei ‘mêm kơ bôl buăl thoi bơ̆n ‘mêm akâu kơdih. Ưh kơ đei tơdrong juăt ayơ mă kăl hloh kơ ‘bar tơdrong juăt âu.” (Markôs 12:31)
Nơ̆r jet tơchĕng pơwao:
– Pơtao Sôlômôn bơtho kơ kon hơ’lơ̆p athei arih gơh hơgei thoi yơ hăm bôl buăl?
– Bơngai lui athei arih sa hăm bôl buăl thoi yơ?
– Bơ̆n kăl kơ hiơ̆k tơdrong pơjing tơdrong tơ’bưh hăm bôl buăl thoi yơ?
Pơtao Sôlômôn bơtho kơ kon hơ’lơ̆p sư athei arih gơh hơgei đơ̆ng tơdrong arih sa hăm bôl buăl lăm rim tơdrong. Mă minh, ih athei arih sa mă trŏ lăm tơdrong arih sa hăm bôl buăl. Nơ̆r “bơ̆l hăl” đei pơma pơlơ̆k pơle wă pơma hơđăl kơ tơdrong lăng ưh kơ rơa kiơ, ưh kơ gĭt. Đak sut noh ‘ngam dêh, mălei dah sa lơ nhen thoi ‘bơ’blut ih gô hăk lê̆, lei lăI thoi tơdrong bơwei, năm ngôi pơlung noh gĭt dêh, mălei năm ngôi hơnơ̆ng dah đunh hnang, gô pơm kơ bôl buăl jing ưh kơ hiơ̆k bơ̆l hăl băl lap (trong 16-17). Kơlih kơ thoi ei tơdrong arih kăl kơ gơh gơ̆t. Mă ‘bar, lăm tơdrong tơ’bưh băl hăm bôl buăl mă ưh kơ lui ngeh. Nơ̆r pơm kơdranh hơlĕnh kơ bôl buăl đei pơting thoi tơdrong răm, tơdrong jĭ jăn đơ̆ng tơmam lăm năr tơblah, “long băl, thoi đao gưm dah thoi ‘brơ̆m suĕng” tơplih kơ tơdrong pơrăm bơngai ayăt, na ‘bet lê̆ buăl bơ̆n kơdih. Lăm năr gleh pơmat, tơplih kơ tơdrong nhen thoi hơnĕnh kơjăp ‘lơ̆ng, tơgŭm kơ akâu jăn đei jơhngơ̆m kơjăp pran, lei na jing jĭ hơnĕnh, pơm kơ jơhngơ̆m akâu jăn gleh lap rơmơ̆n, tơplih kơ tơpang jơ̆ng kơjăp tơgŭm kơ akâu rơdu, na tơpang jơ̆ng jo jing kơtơih pơ̆k, akâu jăn rơmơ̆n. Tơdrong tơ’bưh hăm “bơngai hơlĕnh pơdăr” thoi noh, đei tơdrong pơmat sơ’ngon, ưh kơ hiôk đĕch. Tuch luch, bôl buăl athei đei tơdrong mơnat, tơgŭm dih băl. Bơngai mă ưh kơ băt mơnat đei pơting thoi bơngai “hơri kơ đe năr đe ơh sơ’ngon, ưh kơ hiôk, thoi bơngai tơgiĕt bơih na plôh lê̆ ao hơbơ̆l sư dơ̆ng thoi tuh đak iŭ tơ jĭ rơka, ji hang rai dêh.
Tơdrong tơ’bưh hăm bôl buăl noh tơdrong tơ’bưh đơ̆ng ‘bar pah, thoi ei pơtao Sôlômôn bơtho kơ kon hơ’lơ̆p sư păng lu bôl buăl athei gơh gơ̆t, tơnap păng mơnat dih băl.
Bơngai kră sơ̆ đei nơ̆r pơma: “Tĕch lê̆ ‘nhŏng oh đơ̆ng ataih, răk bôl buăl jê̆ bơ̆n”. Nơ̆r pơma ‘nâu bơtho ‘nĕ kơ lăng hơi tơdrong tơ’bưh đơ̆ng ‘nhŏng oh adrĕch adrung bơ̆n kơdih mălei athei tơ’blŏk kơ rim bơngai lăng gĭt kơ tơdrong tơ’bưh hăm bôl buăl. Jing bơngai lui, bơ̆n athei arih mă trŏ hloh kơ bơngai tam mă băt kơ Kră Yang. Kră Yang Yêsu pơma pơyum tôm tơdrong juăt lăm ‘bar tơdrong: “Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng. Na tơdrong juăt mă ‘bar thoi âu: Bơ̆n athei ‘mêm kơ bôl buăl thoi bơ̆n ‘mêm akâu kơdih.Ưh kơ đei tơdrong juăt ayơ mă kăl hloh kơ ‘bar tơdrong juăt âu.” (Markôs 12:30-31). Apinh Kră Yang ăn kơ rim ‘nu lu bơ̆n đei tơdrong gơh hơgei, arih kiơ̆ thoi nơ̆r Kră Yang bơtho wă kơ jing bơngai mă bôl buăl bơ̆n lui ngeh, ‘mêm mơnat, tơ’bôh tơdrong arih bơngai lui, păng pơư pơang Anăn Kră Yang.
Kơkuh kơ Ih Kră Yang, bơnê kơ Ih ‘mêm mơnat pơklaih yoch inh păng ăn kơ inh jing kon Ih. Apinh Kră Yang ăn kơ inh băt arih ‘mêm mơnat, arih sa gơh gơ̆t, tơnăp, mơnat hăm bôl buăl wă kơ lơ bơngai băt kơ Kră Yang đơ̆ng tơdrong arih inh. Krao khan yua anăn Kră Yang Yêsu Krist, Amen.
Bơ̆n kăl kơ đei tơdrong tơplih ayơ lăm tơdrong arih sa hăm bôl buăl?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 50
Kênh Youtube BHKTHN:
