I Pêtrôs 2:6-8
“…Iĕm lăng Inh đei man minh pôm tơmo gĭt tơ Pơlei Siôn wă pơm hnam, tơmo noh gĭt tơpă na Inh iŏk Sư. Bu lui kơ tơmo noh huay kơ hli minh tơdrong kiơ ôh.” (I Pêtrôs 2:6)
Nơ̆r jet tơchĕng pơwao:
– Yua kơ kiơ lui kơ Kră Yang gô ưh kơ mơlâu kơ đe?
– Lu bơngai ưh kơ lui kơ Kră Yang,jơhngơ̆m tơdrong tơchĕng lu sư thoi yơ hăm Kră Yang?
– Bơ̆n arih thoi yơ wă tơ’bôh tơdrong arih bơ̆n chhôk yua kơ bơ̆n lui kơ Kră Yang bơih?
“Tơmo mum hnam đe rơih bơih gĭt dêh” mă ‘bok Pôl đei pao ‘bơm ‘nâu wă khan Kră Yang Yêsu Krist, sư đei pơtih thoi tơmo gĭt kăl gơh pơm kơ hnam kơjăp, ‘noh bơih tơmo mum hnam gĭt dêh,ưh kơ đei kiơ gơh tơplih kơ tơmo noh. “Bơngai mă lui kơ tơmo ei”, wă khan bơngai pơdơ̆ng hơnă (jrăng) đon lui sư ‘bơ̆t Kră Yang Yang Yêsu Tơ’ngla pơkă sĭt, lei bơngai noh gô ưh kơ mơlâu kơ đe. Nơ̆r “mơlâu wă khan pă đei hơmĕng yua kơ dan tơdrong lui ưh kơ trŏ kơ anih. Lui sơng iŏk Kră Yang Yêsu ưh kơ khan ưh kơ hơmĕng ôh, lui kơ Kră Yang Yêsu đei hơmĕng tih yua kơ Sư Tơ’ngla Dŏng pơklaih huai iŏk bơngai yoch (Rôm 10:11-13). Lu bơ̆n hơđơ̆ng jơhngơ̆m tơpă kơplah bơ̆n dan jơhngơ̆m lui bơ̆n‘bơ̆t Kră YangYê su “wă kơ mă bu bu lui kơ Sư, đei tơdrong arih ling-lang ngăl.” (Yôhan 3:15).
Lei na bơ̆n athei pơma pran thoi ‘bok Pôl, thoi âu: “Tơdrong ‘Nao Yêsu Krist kăl tơpă, na inh bơtho đe ưh kơ mơlâu.Tơdrong noh tơbăt ăn kơ bơ̆n ‘Bok Kei-Dei mơsêh mơyang tơpă pơklaih bơ̆n đơ̆ng tơdrong yoch na ăn kơ bơ̆n oei hiôk hăm Sư.Thoi noh dôm lu bơngai lui kơ tơdrong noh ‘Bok Kei-Dei pơklaih ngăl. Lu bơngai Ju đê lui hơdrol, đơ̆ng noh lu bơngai nai lui.”(Rôm 1:16). Pang nai dơ̆ng, yua kơ tơ ala teh âu ‘nguaih kơ Kră Yang Yêsu, ưh pă đei anăn bu nai dơ̆ng trŏ kơ bơ̆n lui na gơh klaih đơ̆ng yoch, minh ‘nu Kră Yang Yêsu đĕch (Tơdrong jang 4:12).
Mă-lei, hăm lu bơngai ưh kơ lui kơ Kră Yang Yêsu, lu sư lăng Kră Yang Yêsu nhen thoi tơmo mum hnam mă lu thơ̆ man hnam klơ̆m tŭk lê̆ bơih, ưh kơ gĭt kiơ ôh, “tơmo tih noh minh tăl kơ pơm kơ đe kơtơih pơ̆k đĕch” (tr.7). Tơdrong noh wă khan lu bơngai mă kuă kơ lui kơ Kră Yang Tơ’ngla Dŏng Pơklaih noh lu sư pơm yoch tih dêh lăm chăl arih lu sư. Lu sư tơwih rŏng,ưh kơ drơ̆ng kơ ‘Bok mă gơh dŏng pơklaih,Tơ’ngla mă ăn kơ chăl arih lu sư đei yua, kơlih kơ thoi noh na lu sư gô huŏng lăm ti ‘Bok Kei-Dei wă sek tơlang phak lu sư, yua kơ “Bơngai bu ưh kơ lui yom kơ Kon Sư, bơngai noh ưh kơ đei arih ling-lang ôh, Bok Kei-Dei hil kơ sư tơpă păng sĭt gô phak sư ning-mônh”(Yôhan 3:36).Tơdrong noh sĭt gô truh tơpă “…yua kơ lu sư kuă kơ lui kơ nơ̆r ‘Bok Kei-Dei pơma, na ‘Bok Kei-Dei ăn kơ lu sư kơtơih pơ̆k”(tr.8).
Bơ̆n bơngai lui, bơ̆n dan tơpă đon lui bơ̆n ‘bơ̆t hơnă Kră Yang Yêsu Krist kơjăp noh. Yua kơ thoi noh na bơ̆n athei tơ’bôh ăn kơ lu bơngai jih ‘ma ‘bôh bơ̆n chhôk ‘nă dêh yua kơ bơ̆n hlôi lui sơng iŏk Kră Yang Yêsu păng ăn kơ Sư pơm Yŏng Tơ’ngla pơgơ̆r chăl arih bơ̆n bơih. Bơ̆n kư̆m athei tơ’bôh tơdrong arih “chu yom kơ Nơ̆r ‘Bok Kei-Dei, tơ’bôh hăm tơdrong arih lui yom pơm kiơ̆ kơ Nơ̆r Sư,pơm kơ Sư lăp đon, ưh kơ hli, kư̆m ưh kơ mơlâu ‘bơ̆t anăp đĭ-đăng bơngai”. Yua kơ “’Nhĕt kro, pơkao hơlŭng: mă-lei nơ̆r Kră Yang ‘Bok Kei-Dei lu bơ̆n oei kơjăp ling-lang!”. (Êsai 40:8)
Ơ Kră Yang, ‘Bă mă oei tơ plĕnh ti, inh bơnê kơ Ih, yua kơ nơ̆r Ih tơ’blŏk kơ inh ưh kơ mơlâu ôh kơplah inh lui păng tơ’bôh Anăn Kră Yang Yêsu kơ lu bơngai jih ‘ma. Apinh Ih tơgŭm inh lui tơpă kơ Nơ̆r Ih pơkă sĭt wă kơ inh ling-lang chhôk ‘nă yua kơ inh jing kon Ih.Inh krao khan yua anăn Kră Yang Yêsu Krist, Amen!
Bơ̆n tơ’bôh bơih tơdrong arih ưh kơ mơlâu kơ đe, tơ’bôh bơih tơdrong bơ̆n chhôk dêh kơ bơ̆n đei anăn Kră Yang, bơ̆n tơ’bôh bơih tơdrong noh thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 32
Kênh Youtube BHKTHN:
