1 Xamuyees 8:1-9
Nqe cim:
“Koj yuav xav hais tias txhua yam uas koj ua yeej yog, tiamsis tus TSWV yuav txiav txim raws li tej uas koj ua lawm.” (Pajlug 21:2)
Lus nug rau sawvdaws xav:
– Cov Yixalayees hais tawm tej lus twg los pab rau lub tswvyim uas lawv xav tsa muaj ib tug vajntxwv kav lawv?
– Cia li ntaus nqi rau lawv tej lus ntawd?
– Peb pheej hais tawm tej lus twg los daws yus kev tsis mloog Vajtswv lus?
Cov Yixalayees hais tawm meej peb lo lus sib cav thiab thov Xamuyees txais yuav tsa ib tug vajntxwv rau lawv (nqe 5). Tim ib, Xamuyees twb laus lawm, tsis muaj txaus dag zog thiab meejpem coj lawv ntxiv. Tim ob, nws cov menyuam tsis muaj txaus txoj kev ua zoo los coj lawv. Tim peb, muaj ib tug qauv tabtom siv tau zoo ntawm lwm haivneeg.
Muaj qee yam peb yuav tsum ua zoo saib ua ntej uas ntaus nqi rau tej lus hais sib cav no yog lossis txhaum. Tim ib, cov Yixalyees tsuas siv lawv txoj kev txawj ntse los sib cav xwb tiamsis tsis nrhiav raws li Vajtswv siab nyiam. Txoj kev daws uas lawv sib cav tsuas vim tej nyuag teebmeem ib pliag xwb, tsis vim kev ntseeg ntawm Vajtswv.
Tim ob, Cov Yixalyees zeem tsis tau kev sib txawv ntawm Vajtswv haivneeg thiab lwm haivneeg. Muaj qee yam lwm haivneeg siv tau tiamsis Vajtswv haivneeg ces ua tsis tau. Ntau tus neeg coj cov qauv thiab tej kev daws teebmeem sab nraud los rau hauv Pawg Ntseeg thiab sib cav hais tias vim li cas peb tsis hloov pauv raws li lub teb lub chaw. Tsis yog Pawg Ntseeg yuav hloov pauv tshiab tsis tau lossis siv tsis tau tus qauv uas lub tebchaws siv tau zoo lawd, tiamsis yuav tsum meejpem zeem paub kev sib txawv ntawm Pawg Ntseeg thiab tibneeg ntiajteb. Pawg Ntseeg tau txhim tsa rau saum Vajtswv Txojlus, vim li ntawd, txhua txoj kev txiav txim siab ua yuav tsum saib ntawm Vajtswv Txojlus los.
Tim peb, Cov Yixayees tau hnov qab txoj kev kawm yav tas los lawm. Xamuyees lub tsev neeg zoo ib yam li tus Povthawj hlob Elis lub tsev neeg yav nram ntej, thaum ntawd Elis tsis nrhiav Vajtswv kev pab, tiamsis Xamuyees yeej tseem hwm Vajtswv thiab yog ib tug neeg thov Vajtswv. Thiab hauv Elis qhov teebmeem, Vajtswv tsis tsa ib tug vajntxwv tiamsis Nws tsa Xamuyees rov ua Thawjtswj hloov Elis chaw, yog li ntawd, vim li cas cov Yixalayees tsis cia siab rau Vajtswv thiab cia Nws coj sawvdaws kev?
Tim 4, Txoj kev ntxeev siab tawmtsam yog nqi zog ntawm lawv txoj kev khavtheeb thiab saib Vajtswv tsis tseemceeb (nqe 8). Yam uas lawv ntshaw tsis yog ib tug vajtswv twg yog lawv tus tswv tiamsis yog saib tus vajtswv twg pub tau yam lawv ntshaw. Lo lus “Xamuyees tsis pom zoo” (nqe 6) hauv lus Henplais muaj lub ntsiab muaj zog hais tias “yam kev phem kev qias hauv Xamuyees qhovmuag”.
Tig rov los rau hauv lo lus nug txog tej lus sib cav no yog lossis txhaum? Lo lus teb no qhia paub hais tias peb tabtom muab leejtwg saib tseemceeb, ua lub plag thiab txiav txim siab rau yus lub neej! Nco ntsoov hais tias: “Koj yuav xav hais tias txhua yam uas koj ua yeej yog, tiamsis tus TSWV yuav txiav txim raws li tej uas koj ua lawm” tus Tswv tib leeg xwb thiaj yog tus txiav txim siab tau rau yam twg yog lossis txhaum xwb! Cia li thov Vajtswv pab kom peb tsis poob mus ua yuam kev zoo li Vajtswv haivneeg hnub thaud.
Thov Vajtswv,
Vajtswv, thov zam txim rau nyuam yaus txoj kev ruam vim ntau zaug nyuam yaus xav hais tias nyuam yaus muaj cai txiav txim siab rau nyuam yaus lub neej, tsis zeem paub tej koob hmoov uas nyob hauv Koj kev coj, kev pab, kev hlub. thov pab nyuam yaus kom tsis poob mus yuam kev zoo li Koj haivneeg hnub thaud. Nyuam yaus tuav Tswv Yexus Khetos lub npe thov, Amees.
Peb puas pheej thov Vajtswv pab kom tsev neeg thiab Pawg Ntseeg muaj tej kev txiav txim siab raws Vajtswv siab nyiam?
Nyeem Vajluskub hauv peb lub xyoos: 2 Xwmtxheej Vajntxwv 11
Kênh Youtube BHKTHN:
