I Samuel 8:1-6
“Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt ol, yua kơ Sư wei-lăng bơ̆n.”
(I Pêtrôs 5:7)
Nơ̆r jet tơchĕng pơwao:
– ‘Bok Samuel đei tơ’bơ̆p tơdrong anat yua kơ đơ̆ng hnam dơnŏ sư păng tơdrong anat đơ̆ng kon pơlei Isơrael, tơdrong anat yua kơ đơ̆ng lu đe ei pơm noh ‘bơm truh tơ ‘bok Samuel thoi yơ?
– Jơhngơ̆m ‘bok Samuel tơwih kơ tơdrong anat noh thoi yơ?
– Bơ̆n hŏk iŏk tơdrong kiơ đơ̆ng jơhngơ̆m ‘bok Samuel tơwih kơ tơdrong anat noh?
Hla bơar I Samuel 7 sư tôch ‘bơ̆t tơdrong sư chih pơma pơtôm lê̆ tơdrong jang sư mă ‘bĕnh kơ tơdrong mơnat đơ̆ng ’Bok Kei-Dei, kư̆m tôch ‘bơ̆t tơdrong jang sư mă đei yua tih noh. Mă-lei lăm chăl 8 ‘nâu sư pơih nơ̆r pơma roi tơdrong sơ’ngon lăm hnam dơnŏ sư păng tơdrong jang sư.Dôm tơdrong đei tơpă’nâu ưh kơ pôm tôch lê̆ tơdrong jang sư pơm ‘bok sek tơlang noh đĕch ôh, kư̆m tôch hloi jơhnơr ‘Bok sek tơlang đunh dêh truh tơ 500 sơnăm hloi.
Tơdrong sơ’ngon blŭng a noh, sơ’ngon kơ đêl bre kon sư, anăn bre kon sư ei Jôel hăm Abija,bre sư arih ưh kơ hli yom kơ Kră Yang,ưh kơ rok kơmĭl ‘bă bre sư (tr.1-3).’Bok Samuel âu sư hloh kơ lu bơngai nai, yua kơ sơ̆ kơplah sư oei ‘lơ̆p sư lăng ‘bôh tơdrong sơ’ngon jĭ jơhngơ̆m ‘nâu lăm hnam dơnŏ ‘bok Hêli ‘Bok Soi tơm. Sĭt ‘bok Samuel ưh kơ wă lăng ‘bôh ôh tơdrong rơdu tơrăn bre kon sư ‘nâu kơplah sư lăng ‘bôh tơdrong ‘Bok Kei-Dei bơtho pơjĭ phak hơmet hnam dơnŏ ‘bok Hêli ‘Bok Soi tơm ei sơ̆.’Bok Samuel hlôi pơm tơpăt păng hli yom kơ Kră Yang đĭ chăl arih, lăm tơdrong arih sa păng lăm tơdrong sư bơ̆jang kơ Kră Yang hai, yua kơ đơ̆ng sư lăng‘bôh tơm măt sư tơdrong ‘Bok Kei-Dei bơtho pơjĭ phak hơmet hnam dơnŏ ‘bok Hêli‘Bok Soi tơm noh sơ̆.( Isamuel 12:1-5). Mă-lei, tơdrong mă đon sư ưh kơ hơdơ̆r’bơ̆r sư ưh kơ hơpơi noh tă tơ hlôi truh tơ sư pơm kơ sư sơ’ngon jĭ jơhngơ̆m jrŭ hlom.
Tơdrong sơ’ngon mă’bar, thoi lu bơngai nai mơ̆n, ‘bok Samuel kư̆m chang bôl buăl jih ‘ma, lu kon pơlei pơla jum dăr hlôh ăn, mơnat kơ sư, pơlung tơiung sư kơplah sư sơ’ngon jĭ jơhngơ̆m yua kơ đơ̆ng hnam dơnŏ sư noh.’Bok Samuel âu sư hlôi ‘măn đĭ chăl arih sư ‘mêm kơ kon pơlei Isơrael, chông anhăk,chu hiong tơdrong sư kơdih yua kơ wă dŏng kon pơlei Isơrael.Mă-lei tơdrong mă sư hơpơi wă kơ kon pơlei đei jơhngơ̆m pơlung tơiung năr sư sơ’ngon jĭ jơhngơ̆m ei ưh kơ đei bơih, tơplơ̆ kơ nơ̆r pơlung, kon pơlei Isơrael tă tơ oei sa pơma dơnuh hăm ‘bok Samuel pha kơ sơ̆ ki bơih,blah plơ̆ sư,pơma pơjăm tơdrong sư pơgơ̆r kư̆m pơjăm plơ̆ bre kon drŏ-nglo sư mơ̆n.(tr.5). Kon pơlei blah plơ̆ tơdrong’bok Samuel pơgơ̆r noh yua kơ bre kon sư arih ưh kơ ‘lơ̆ng gah jên tơmam, bre sư sa pơgơ̆m jên tơmam đe,kon pơlei kư̆m ‘maih tơweh lê̆ ‘bok Samuel hai ‘mơ̆i ‘bơ̆t lu sư khan Samuel kră pă kĕ bơih,kơ̆l ‘ngok kư̆m đĭ ngek ngok, wă pơgơ̆r pă gơh bơih noh.Hloh kơ ‘noh dơ̆ng, tơdrong kon pơlei Isơrael apinh wă kơ đei minh ‘nu pơtao pơgơ̆r noh tơ’bôh tơdrong lu sư rơdu tơdrong lui tơdrong arih gah bơhngol. Kon pơlei Isơrael ‘nâu ‘Bok Kei-Dei pơgơ̆r lu sư, mă-lei ‘Bok Kei-Dei yua Samuel tang măt Sư, pơm ‘bok sek tơlang pơgơ̆r kon pơlei, na kon pơlei blah plơ̆ ‘bok Samuel, noh ưh kơ trŏ kon pơlei blah ‘bok Samuel đĕch ôh, mă-lei noh kon pơlei blah plơ̆ ‘Bok Kei-Dei. Lu kon pơlei ưh kơ wă kơ ‘bok sek tơlang pơgơ̆r lu sư; lu sư ‘maih wă đei minh ‘nu pơtao pơgơ̆r lu sư, wă rok kơmĭl lu kon pơlei dêh char tơmoi nai đei pơtao pơgơ̆r.(tr.5,7).
‘Bok Samuel tơ’bơ̆p lu tơdrong sơ’ngon jĭ jơhngơ̆m yua kơ đơ̆ng hnam dơnŏ păng đơ̆ng kon pơlei, sư ưh kơ đei kơdŭn tơrŏng, sơ’ngon hơdrô̆, sư kư̆m ưh kơ ăn tơdrong sơ’ngon kuer lăm jơhngơ̆m dĭng răm thoi ‘bok Hêli ôh, sư kư̆m ưh kơ pơjăng pơjăr hăm kon pơlei wă dŏng kơdih kâu mơ̆n. Sư tơkan tơ ‘Bok Kei-Dei, krao khan apinh ‘Bok Kei-Dei dŏng sư (tr.6). Năr tơ’bơ̆p tơdrong sơ’ngon jĭ lăm jơhngơ̆m yua kơ đơ̆ng lu bơngai mă bơ̆n ‘mêm kơeng dêh noh, pơtih thoi kon akăn bơ̆n, kon klo bơ̆n, mih ma, duch nă, yă ‘bok bơ̆n .v.v..păng đơ̆ng lu ‘nhŏng oh bơngai lui pơm kơ bơ̆n sơ’ngon jĭ jơhngơ̆m noh,bơ̆n ngăl tơwih kơ lu sư hăm tơdrong pơm plơ̆ kơ lu sư, pơjăng pơjăr wă dŏng kơdih kâu, noh bơ̆n glăi bơih, ưh kơ thoi Kră Yang wă. Yua kơ thoi ‘nei bơih, năr tơ’bơ̆p tơdrong sơ’ngon jĭ jơhngơ̆m,bơ̆n athei tơkan hloi tơ Kră Yang‘bơ̆t jơ ‘noh, bơ̆n pơm thoi ‘nei noh bơ̆n bơngai hơgei, huay kơ ‘bơm truh tơ pơm kơnê̆; bơ̆n jah tơkan tơ Kră Yang thoi ‘nei, noh bơ̆n chă tơdrong Kră Yang chông anhăk bơtho tơ’bôh.
Kơkuh kơ Ih Kră Yang, inh bơnê kơ Ih yua kơ ‘bơ̆t jơ phŭt măng mu tôt măt lăm chăl arih inh, pă ‘bôh bang kiơ bơih, lơ bơngai weh wer kơ inh,achăng lê̆ inh hơdrô̆,mă-lei inh oei đei Ih Tơ’ngla mă ling-lang ‘mêm kơ inh, Ih hlôh kơ inh, păng mơ̆ng nơ̆r inh krao apinh. Apinh Ih ăn kơ inh băt tơkan tơ Ih,apinh Ih bơtho tơ’bôh chông anhăk inh. Inh krao khan yua anăn Kră Yang Yêsu Krist, Amen!
Bơ̆n ngăl tơwih thoi yơ kơplah tơ’bơ̆p tơdrong sơ’ngon jĭ jơhngơ̆m yua kơ đơ̆ng hnam dơnŏ bơ̆n, yua kơ đơ̆ng ‘nhŏng oh bơngai lui bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 10
Kênh Youtube BHKTHN:
