Jop 1:1-5
“Băt lu kon inh pơm yoch păng băt lăm jơhnơ̆m lu sư blei hiap Kră Yang ‘Bok Kei-Dei . Jop juăt kơ pơm thoi noh.” (Jop 1:5b)
Nơ̆r jet tơchĕng pơwao:
– Hnam dơnŏ ‘bok Jop đei kiơ̆ tơdrong ‘lơ̆ng hơyơ?
– Tơdrong juăt hơmet gah bơhngol thoi yơ tơgŭm ‘bok Jop bơwei hnam dơnŏ lui yom kơ Kră Yang?
– Lu bơ̆n pơjing tơdrong akŭm lăm hnam dơnŏ wă krao khan kơ hnam dơnŏ noh thoi yơ?
‘Bok Jop jơ̆ minh ‘nu lăm pêng ‘nu bơngai mă Pah So đei jô̆ khan ‘lơ̆ng tơpăt (ÊSê Kiên 14:14). Sư pŭ iŏk lăm hnam dơnŏ đei mơjĭt ‘nu kon. Ưh kơsĭ arih băt lui yom, mă lei sư kư̆m tơgŭm dôm tơmam kăl yua ăn kơ rim ‘nu bongai păng chu pŭ iŏk weirong chăl arih gah bơhngol kơ lu kon sư.
Wă tơiung tơdrong arih gah bơhngol gơh đei yua, ‘bok Jop bơtho hnam dơnŏ sư pơyơ̆r tơmam soi kơ Kră Yang, ‘noh pơm gah ‘nguaih lăm tơdrong kơkuh kơ Kră Yang, drap kơkuh păng krao khan apinh Kră yang mơnat ăn tơdrong yoch . Tơdrong pơyơ̆r tơmam soi sư năm hơdai hăm tơdrong krao khan (ESơra 6:10; Luka 1:10). ‘Bok Jop pơm kơmĭl tơ’bôh lăm tơ]drong krao khan, tơdrong kơkuh kơ Kră Yang tơ lăm hnam dơnŏ kơ kon sâu sư păng ăn kơ lu bơ̆n dang ei. Lăm Pah So, đei lơ mĕ ‘bă pơm kơmĭl lăm tơdrong krao khan kơ hnam dơnŏ. ‘Bok Abraham đei krao khan kơ kon sưnoh Is ma el, păng krao khan ăn kơ mon sư Lot (Blung a 18:24-32). ‘Bok Môis ôr krao khan kơ Kră Yang, đĭ jơhngơ̆m apinh Sư mơnat ăn păng pơklaih ăn kơ mai sư (Jô̆ Kơ̆l Bơngai 12:13). Lăm Pah ‘Nao, lơ mĕ ‘bă đei krao apinh Kră Yang Yêsu pơklaih jĭ jăn, puh yang kơnê̆ đơ̆ng kon sư.
‘Bok Jop sư hlôh băt tơdrong hli krưp tơdrong pơm yoch păng achăng Kră Yang đơ̆ng lăm lu kon sư, thoi noh sư đĭ jơhngơ̆m adrin krao khan kơ hnam dơnŏ sư (tr. 5). Sư rơih iŏk jơ năr “đơ̆ng rŏng kơ sŏng sa keh bơih.” păng hơmet pơ’lơ̆ng “hơmet ăn kơ lu kon sưmă rơgoh, iung đơ̆ng hrôih” wă kơ jơ krao khan hnam dơnŏ gơh đei pơm păng hơnơ̆ng.
Sơ̆p Hla ar Pah ‘Nao bơtho klo kăn, mĕ ‘bă, kon hơ’lơ̆p athei pŭ iŏk tơgŭm dih băl (Kôlôssê 3:18-21) wă bơ wei tơdrong pŭn hiôk păng jơhngơ̆m lui yom kơ Kră Yang đĭ đăng bơngai lăm hnam dơnŏ. Krao khan hơdai lăm hnam dơnŏ, dah akŭm lăm hnam dơnŏ noh khŏm pơm gah bơhngol wă bơwei tơdrong arih lui yom lăm hnam dơnŏ păng Khul Bơngai Lui. Đei yua đơ̆ng krao khan lăm hnam dơnŏ ưh kơsĭ tơgŭm lu bơ̆m lăm chăl arih gah bơhngol pran kơjăp, wer weh đơ̆ng tơdrong yoch, đơ̆ng tơdrong pơhlŭ pơlung, đơ̆ng tơdrong kơnê̆ lăm teh đak păng tơgŭm bơngai lăm hnam dơnŏ đei jơ năr tơ’bưh bâ̆l, tơklep kơjăp ‘mêm mơnat dih băl. Lu kon ‘bok Jop arih hiôk hơiă dih băl yua kơ rim năr kơkuh kơ Kră Yang tơ lăm hnam dơnŏ, păng dôm nơ̆r krao khan đơ̆ng ‘bă lu sư. Dang ei, lu bơ̆n đei Sơ̆p Hla ar ‘Bok Kei-Dei jơ̆ Nơ̆r Kră Yang pơma bơtho kơ lu bơ̆n, păng đei đơ̆ng Kră Yang ăn tơdrong pŭn hiôk lăm tơdrong krao khan tơ’bưh hăm Kră Yang. Tơdrong jang bơngai pơm ‘bă ‘noh pơjing păng bơwei hơnơ̆ng tơdrong akŭm hnam dơnŏ đơ̆ng năr pơjing hnam dơnŏ. Tơdrong mă kăl ‘noh rok kiơ̆ kơmĭl ‘bok Jop “ juăt kơ pơm thoi noh”!
Ơ ‘Bă mă ‘mêm kơeng! Apinh ăn kơ hnam dơnŏ inh đei Kră Yang ‘mêm mơnat, wei rong, păng bơtho tơ’bôh wă kơ đĭ hnam dơnŏ arih ăn kơ Kră Yang, ‘mêm mơnat dih băl. Apinh tơgŭm inh pling lang oei bơwei jơ năr krao khan lăm hnam dơnŏ wă kơ bơwei tơdrong pŭn hiôk wă kơ tơiung jơhngơ̆m lui yom kơ Ih. Yua anăn Kră Yang Yêsu Krist, Amen.
Lu bơ̆n đei pơjing jơ krao khan hnam dơnŏ bơih ưh? Tơdah đei bơih, lu bơ̆n mă tơnăp bơwei jơ krao khan hnam dơnŏ thoi yơ noh lăm tơdrong arih mă khan hrăt hrot dang ei?
Đŏk Sơ̆p Hla ar ‘Bok Kei-Dei lăm pêng sơnăm: II Hơ’mon 4.
Kênh Youtube BHKTHN:
