Klei Aê Diê Blŭ: I Y‑Samuel 1:3‑18
Êlan kliăng: “H’An rŭng răng êdi leh anăn wah lač kơ Yêhôwa leh anăn hia ênguôt.” (I Y‑Samuel 1:10)
Klei êmuh ksiêm mĭn: Ya klei H’An ngă leh, ti anăp klei hêñ ênguôt kyua klei gơ̆ plao? Ya klei ñu akâo kơ Khua Yang leh anăn hŏng si ai tiê ñu wah lač? Hŏng si ai tiê drei khăng wah lač hŏng Khua Yang?
H’An jing mô̆ phŭn Y‑Êlkana, sa čô găp djuê Lêwi. H’An amâo mâo anak ôh, êjai anăn mô̆ tal dua ñu mâo lu anak. Wăt tơdah ung ñu khăp kơ ñu hĭn, ƀiădah grăp thŭn, tơdah hlue mbĭt hŏng ung đĭ nao kơ Sang Yêhôwa ti Silô čiăng myơr mnơ̆ng ngă yang kơ Yêhôwa, H’An ăt tŭ lu klei hêñ ênguôt leh anăn arăng bi riêl ai kyua klei ñu amâo mâo anak. Dôk ti anăp klei hêñ ênguôt amâo mâo pô thâo săng brei, ñu êran nao kơ Khua Yang, tuh êyuh ai tiê pô hŏng êa ală. Ñu ik uêñ kwưh akâo kơ Khua Yang mđing dlăng brei kơ klei rŭng ênguôt ñu, brei kơ ñu sa čô anak êkei leh anăn ñu ƀuăn srăng myơr anak anăn kơ Khua Yang kluôm jih klei hdĭp.
Klei Aê Diê Blŭ brei thâo, ñu knŏng wah lač hlăm lam ai tiê hŏng jih ai tiê kwưh akâo leh anăn hŏng klei čiăng tơl amâo truh pia hŏng klei blŭ. Anei jing sa klei kwưh akâo kbiă hriê mơ̆ng ai tiê mčah sĭt. H’An bi mguôp sĭt suôr hŏng Aê Diê, myơr jih mngăt ai tiê klei mĭn ñu kơ Khua Yang, ñu amâo mđing kơ phung riêng gah ôh, ăt kăn uêñ rei si klei arăng mĭn kơ ñu. Kyuanăn, khua ngă yang Y‑Hêli mĭndah ñu kpiê ruă kyuanăn blŭ knŏng kpư̆ kƀuê ƀiădah amâo hmư̆ ênai ôh. Tơdah hmư̆ H’An wĭt lač, khua ngă yang Y‑Hêli lŏ wĭt lač: “Nao bĕ hŏng klei êđăp ênang, leh anăn akâo kơ Aê Diê phung Israel brei klei ih wah lač kơ Ñu!” H’An mă tŭ klei khua ngă yang hơêč hmưi leh anăn đuĕ wĭt amâo lŏ ênguôt ôh.
Wăt tơdah rŭng ênguôt kyua amâo mâo anak, ƀiădah H’An amâo mâo luč klei čang hmăng, kăn kdŭn ai hŏng klei truh kơ pô rei. Mklăk wĭt, ñu ƀuh klei čang hmăng hlăm Khua Yang hŏng klei wah lač. Ñu đăo kơ Khua Yang jing Pô Hrih Mjing dưi ngă bruă êgao hĭn tui si klei bhiăn yang đar leh anăn srăng brei kơ ñu klei pap dưi jing amĭ tui si mmông Khua Yang. Kyuanăn, ñu tuh êyuh ai tiê ñu hŏng êa ală. Knŏng tơdah klei drei bi mguôp hŏng Khua Yang sĭt suôr êdimi kơh srăng tơl truh blŭ hrăm hŏng Khua Yang hŏng êa ală. H’An khăp sĭt kơ Khua Yang, đăo knang leh anăn jĕ giăm hŏng Khua Yang čiăng dưi hưn mdah jih klei rŭng ênguôt hlăm lam ai tiê ñu hŏng Khua Yang. Kdlưn hĭn, ñu ƀuăn hŏng Khua Yang, ya mta klei Khua Yang brei kơ ñu, ñu srăng myơr wĭt kơ Khua Yang. Anei yơh jing sa klei hriăm yuôm bhăn snăk brei kơ drei tui hriăm.
H’An lui brei leh kơ drei sa klei bi hmô jăk siam hlăm klei wah lač. Ñu amâo knŏng akâo klei ñu pô čiăng, ƀiădah tuh êyuh ai tiê sĭt, leh anăn suôr tliêr hĭn êjai hlăm klei bi mguôp hŏng Khua Yang. Ñu tuh êyuh ai tiê mčah ñu ti anăp Khua Yang leh anăn ƀuăn rơ̆ng srăng myơr wĭt jih jang klei yuôm hĭn kơ Khua Yang. Ñu wah lač leh hŏng êa ală leh anăn Khua Yang hmư̆, wĭt lač klei ñu akâo!
Hbĭl drei tuôm nao leh kơ Khua Yang kwưh akâo kơ Ñu hŏng êa ală?
Wah lač: Ơ Khua Yang, lač jăk kơ Khua Yang brei leh kơ kâo klei pap dưi bi mguôp hŏng Ih msĕ si anak blŭ hrăm hŏng Ama. Brei kâo sĭt suôr hĭn hlăm klei bi mguôp hŏng Khua Yang. Leh anăn đru kâo nao kơ Khua Yang hŏng ai tiê mčah, tuh êyuh jih klei rŭng ênguôt hlăm lam ai tiê kâo hŏng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
