I Xamuyees 1:3-18
Nqe cim.
“Hanas ntxhov siab heev, nws txawm sawv tsees, nws thiaj thov tus TSWV thiab quaj ncia heev” (I Xamuyees 1:10)
Lus nug rau sawvdaws xav.
– Hanas tau ua dabtsi thaum ntsib kev ntxhov siab vim tsis muaj menyuam?
– Nws taij thov tus Tswv yam dabtsi thiab taij thov los ntawm nplooj siab zoo licas?
– Peb pheej thov Vajtswv los ntawm nplooj siab thiab kev xav zoo licas?
Hanas yog Ekanas uas yog xeem Efalayees tus niam hlob. Hanas tsis muaj menyuam, tiamsis Ekanas tus niam yau muaj coob tug menyuam. Txawm Hanas tau nws tus txiv hlub heev dua, los txhua lub xyoo, thaum nrog tus txiv mus hlawv khoom fij rau Vajtswv ntawm lub Tsevntaub hauv nroog Silaus, Hanas pheej raug txob thuam thiab pheej raug rhuav ntsejmuag vim nws tsis muaj menyuam. Thaum ntsib tej kev txob thuam uas tsis muaj leejtwg nkag siab, nws tau los cuag tus Tswv, qhib siab qhib ntsws, quaj los kua muag. Hanas tas siab tas ntsws taij thov tus Tswv tsa qhov muag saib nws txojkev lwj siab, pub rau nws muaj ib tug tub thiab nws coglus yuav muab tus tub ntawd fij rau tus Tswv mus tas simneej.
Vajluskub qhia hais tias Hanas tsuas taij thov kawg siab kawg ntsws puag hauv nruab siab tuaj tsis hais tawm suab. Ntawd yog tej lus taij thov tawm puag hauv ib nplooj siab uas tawg ntsoog tuaj. Hanas sib txuas lus nrog tus Tswv tiag tiag, nws tig nws txojkev xav thiab tus ntsujplig los rau tus Tswv, nws tsis quavntsej cov neeg ibncig, kuj tsis tsum qhia rau lawv paub txog nws txojkev xav. Vim li ntawd, tus Povthawj Elis thiaj xav yuamkev hais tias Hanas qaug cawv lawm thiaj ua li ntawd. Thaum hnov Hanas tej lus teb, tus Povthawj Elis thiaj hais tias: “Koj cia li mus tsev kaj siab lug, thiab thov tus TSWV uas yog cov Yixalayees tus Vajtswv pub rau koj raws koj tau thov nws lawm!” Hanas txais yuav tus povthawj tej lus foom hmoov thiab rov los tsev tsis nyuaj siab ntxiv lawm.
Txawm nyuaj siab, lwj siab vim tsis muaj menyuam, los Hanas tsis tas kev cia siab, tsis swb tej kev ntxhov siab. Tiamsis, nws nrhiav pom kev cia siab ntawm Vajtswv nyob hauv nws tej lus taij thov. Nws ntseeg hais tias tus Tswv yog Tus Tsim Txhua Yam muaj hwjchim dua tej txojcai teem tseg hauv ntiajteb thiab tus Tswv yuav pub rau nws tau txoj koobhmoov ua niam raws li lub sijhawm tus Tswv npaj tseg. Vim li ntawd nws thiaj taij thov kawg siab kawg ntsws ua rau kua muag poob los. Tsuas yog thaum peb txojkev sib raug zoo nrog tus Tswv txaus lawm, ces peb thiaj yuav poob taus kua muag thaum sib txuas lus nrog Nws. Hanas yeej hlub tus Tswv tiag tiag, nws cia siab thiab nyob ze tus Tswv kom qhia tau nws tej kev lwj siab puag hauv nruab siab tuaj rau tus Tswv. Tshaj qhov ntawd, Hanas coglus rau tus Tswv hais tias tus Tswv pub yam twg rau nws, ces nws yuav fij yam ntawd rov rau tus Tswv. Ntawm no yog ib zaj zoo heev rau peb kawm xyaum.
Hanas ua tau ib tug qauv zoo heev nyob hauv kev thov Vajtswv. Nws tsis yog tsuas thov kom tau nws tej kev cheemtsum xwb, tiamsis nws tseem tas siab tas ntsws taij thov thiab yim hnub hnub yim nyob ze tus Tswv. Nws muab nws lub siab puas tsus qhia tabmeeg tus Tswv thiab txaus siab hlo coglus muab yam muaj nqis tshajplaws fij rov rau tus Tswv. Nws tau poob kua muag taij thov thiab tus Tswv tau teb nws tej lus.
Thov Vajtswv,
Tus Tswv, thov ua Koj tsaug vim txoj koobhmoov tau sib txuas lus nrog Koj ib yam li txiv tub. Thov pub rau nyuam yaus yim hnub yim nyob ze Koj thiab pub kom nyuam yaus los cuag Koj ntawm qhov uas muab txhua yam hauv nruab siab qhia rau Koj. Nyuam yaus tuav Yexus Khetos lub npe thov, Amees.
Peb los cuag tus Tswv thiab poob kua muag taij thov Nws thaum twg?
Nyeem Vajluskub hauv peb lub xyoos: Lukas 2
Kênh Youtube BHKTHN:
https://www.youtube.com/c/bhkthn
