Klei Aê Diê Blŭ: Y‑Yakơ 2:5-13
Êlan kliăng: “Ƀiădah tơdah diih dlăng mnuih ti êngao, diih ngă soh, leh anăn klei bhiăn yap diih jing phung soh.” (Y‑Yakơ 2:9)
Klei êmuh ksiêm mĭn: Ya klei Y‑Yakơ mblang leh čiăng mtă kơ phung đăo amâo dlăng ôh mnuih ti êngao? Si klei mñă kơ drei tơdah thâo dlăng mnuih ti êngao jing ngă soh?
Leh mtă kơ phung đăo đăm dlăng ôh hlei pô ti êngao, Y‑Yakơ lač kơ tlâo klei mblang kơ klei đăo, knuih hdĭp, leh anăn klei bhiăn čiăng ƀuh dlăng mnuih ti êngao jing amâo djŏ ôh hŏng knuih phung đăo kơ Khua Yang.
Tal sa, hlăm klei đăo, dlăng mnuih ti êngao jing soh hŏng klei Aê Diê ngă hŏng anak mnuih. Hlăm êlan 5, Y‑Yakơ mblang, Aê Diê “ruah leh phung ƀun ƀin hlăm lăn ala brei jing mdrŏng hlăm klei đăo, leh anăn jing phung dưn ƀuôn ala mtao Ñu ƀuăn leh kơ phung khăp kơ Ñu”. Hlăk êjai phung đaŏ mâo klei bi knăl khăp kơ phung mdrŏng snăn Aê Diê lŏ ruah phung ƀun ƀin. Klei brei mđing amâo djŏ jing kyua ƀun anăn Aê Diê ruah, ƀiădah klei bhiăn sa anăn Aê Diê hlăm hdră bi tui jing “kyua klei pap, kyua klei đăo”. Tinei, Y‑Yakơ knŏng lač kơ sa klei sĭt jing phung đăo kơ Khua Yang hlăm Sang Aê Diê hlăk anăn jing phung “ƀun ƀin hlăm lăn ala”. Klei Aê Diê Blŭ khăng yua boh blŭ “ƀun ƀin” čiăng lač kơ mngăt: tơdah sa čô mnuih thâo kral klei hdĭp mngăt ƀun ƀin, amâo mâo ôh ya jing dŏ pô, mơ̆ng anăn tŭ mă mnơ̆ng klei pap Aê Diê brei, snăn pô anăn jing mdrŏng hlăm klei đăo.
Tal dua, kơ knuih hdĭp, dlăng mnuih ti êngao jing soh hŏng ya klei phung đăo dôk găn. Y‑Yakơ dôk čih hră kơ phung đăo Yuđa dôk bru bra djăp anôk, leh anăn lu mnuih hlăm anăn jing phung ƀun ƀin dôk tŭ klei phung mdrŏng ktư̆ juă hlăm ala ƀuôn wăt klei đăo (êlan 6-7). Hlue si klei bhiăn knuih hdĭp khăng mâo snăn phung mdrŏng amâo dôk sa tĭng hŏng diñu ôh. Ƀiădah diñu lŏ mđing khăp kơ phung mdrŏng, mưč mač kơ phung ƀun ƀin. Y‑Yakơ lač kơ bruă ngă snăn jing soh hŏng knuih hdĭp phung đăo kơ Krist.
Tal tlâo, kơ klei bhiăn, dlăng mnuih ti êngao jing soh hŏng klei mtô hlăm klei bhiăn, “Brei ih khăp kơ pô riêng gah ih msĕ si kơ ih pô” (êlan 8). Y‑Yakơ mă klei bhiăn anei hlăm Bruă Lêwi 19:18, jing kdrêč Klei Aê Diê Blŭ mtô phung ƀuôn sang Aê Diê brei mtăp mđơr, amâo dưi dlăng ôh mnuih ti êngao ƀiădah brei khăp kơ phung mkăn. Mơ̆ng anăn, ñu lač hlei pô dlăng mnuih ti êngao snăn jing ngă soh hŏng klei bhiăn, gao sa klei mtă, jing mnuih gao leh jih klei bhiăn (êlan 9-11).
Snăn, ksiêm dlăng kơ djăp mta klei, phung đăo kơ Khua Yang amâo dưi dlăng mnuih ti êngao ôh. Brei thâo Khua Yang ƀuh klei drei blŭ hrăm hŏng pô mkăn leh anăn Ñu srăng bi kmhal drei hlue si klei anăn (êlan 12-13). Grăp čô riêng gah drei wăt tơdah mâo ya klei mdê dưn mơh snăn ăt dưi hrih mjing hlue si rup Aê Diê, jing phung mâo Khua Yang Yêsu khăp sơăi leh anăn djiê hrô. Akâo kơ Khua Yang đru drei brei klei khăp dưi hĭn hŏng djăp mta klei mưng bi mĭn amâo jăk.
Ya klei brei drei ngă čiăng đru mkhư̆ klei bi kah mbha hlăm Sang Aê Diê?
Wah lač: Ơ Khua Yang, bi mni kơ Ih kyua Klei Aê Diê Blŭ brei kâo ƀuh knuih hdĭp dlăng mnuih ti êngao jing soh, soh hŏng klei čuăn leh anăn klei Khua Yang čiăng. Akâo kơ Ih đru hlăm hruê phat kđi, kâo srăng amâo tŭ klei phat kđi kyua dlăng mnuih ti êngao, ƀiădah srăng mâo Khua Yang bi mni kyua hdĭp khăp leh kơ jih jang mnuih. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 17
Kênh Youtube BHKTHN:
