Yakaunpaus 2:5-13
Nqe cim:
“Tiamsis yog nej xaiv neeg ntsejmuag ces yog nej ua txhaum. Txawm yog Vajtswv txoj kevcai los yeej qhia hais tias nej ua txhaum lawm thiab” (Yakaunpaus 2:9)
Lus nug rau sawvdaws xav:
– Yakaunpaus hais tawm tej lus qhia twg los mus ntuas cov ntseeg kom tsis txhob xaiv ntsejmuag?
– Peb tau qhuab ntuas zoo li cas thaum paub tias xaiv ntsejmuag yog kev txhaum?
Tom qab ntuas cov ntseeg tsis txhob xaiv leejtwg ntsejmuag, Yakaunpaus hais tawm peb lolus qhia txog kevcai ntseeg, kev ua neej, thiab kev haum cai kom ua rau sawvdaws pom tias xaiv ntsejmuag ces yog yam uas tsis phim raws li cov ntseeg tus yam ntxwv.
Tim ib, ntawm sab kevcai ntseeg, xaiv ntsejmuag ces tsis phim qhov uas Vajtswv ua rau tibneeg. Nyob hauv nqe 5, Yakaunpaus txhais qhia, Vajtswv “xaiv cov neeg pluag hauv ntiajteb no los ua cov uas muab siab rau ntseeg Vajtswv, thiab los ua Vajtswv haivneeg raws li Vajtswv tau coglus tseg”. Thaum thooj nkaus li cov ntseeg nyiam cov neeg npluanuj dua ces tus Tswv ho xaiv cov neeg pluag. Thov kom peb nco tias tsis yog vim pluag es tau tus Tswv xaiv, tiamsis twb yog vim Vajtswv tus cai tshwjxeeb teem tseg hauv Nws lub luag haujlwm cawm tibneeg ces yog “los ntawm kev hlub thiab vim ntseeg”. Nyob ntawm no, Yakaunpaus tsuas piav qhia ib qhov muaj tseeb uas yog cov neeg uas ntseeg tus Tswv nyob hauv Pawg ntseeg tiam ntawd puavleej yog cov neeg “pluag raws li sab nqaij tawv”. Vajluskub kheev qiv lolus “pluag” los hais txog tej ntsiab ntawm sab ntsujplig: thaum ib tug neeg twg zeem paub nws sab ntsujplig pluag qhuav qhawv, tsis muaj dabtsi, thaum ntawd nws thiaj paub txais qhov povhaum uas tus Tswv pub, ces nws yuav dhau los ua ib tug neeg npluanuj ntawm sab kev ntseeg.
Tim ob, ntawm sab kev ua neej, xaiv ntsejmuag ces txawv tsis phim rau tej uas cov ntseeg tabtom hla dhau. Yakaunpaus tabtom sau nws tsab ntawv xa mus rau cov ntseeg uas yog neeg Yudais uas raug tawg khiav mus nyob txhua qhov, thiab feem coob nyob hauv lawv cov puavleej yog cov neeg pluag uas tabtom raug cov neeg npluanuj tsimtxom ntawm sab nqaij tawv thiab sab kev ntseeg huv tibsi (nqe 6-7). Raws li kev ua neej ces cov neeg npluanuj yeej tsis sawv nrog lawv ib nqag. Txawm li ntawd los cov ntseeg ho nyiam cov neeg npluanuj, ho saib tsis taus cov neeg pluag. Yakaunpaus qhia tias tej haujlwm zoo li ntawd ces tsis haum, thiab tsis phim raws li tus ntseeg txojkev ua neej lawm.
Tim peb, ntawm sab haum kev haum cai, xaiv ntsejmuag yog tsis phim raws li Vajtswv txoj Kevcai qhia, “Hlub koj tej kwvtij zejzog ib yam li koj hlub koj lub cev” (nqe 8). Yakaunpaus qiv nqe Kevcai no hauv Levis Kevcai 19:18, uas ibtxwm yog ntu Vajluskub qhia tus Tswv haivneeg yuav tsum ua neej ncaj, tsis txhob xaiv ntsejmuag, tiamsis yuav tsum hlub txhua tus. Yog li, Yakaunpaus qhia meej tias leejtwg xaiv ntsejmuag ces yog ua txhaum kevcai, yog txhaum ib nqe ces kuj yog txhaum tagnrho txhua nqe (nqe 9-11).
Yog li ntawd, saib los ntawm txhua phab txhua ces, tus ntseeg Yexus yuav tsum tsis txhob xaiv ntsejmuag. Yuav tsum zeem paub txhua lub sijhawm tias tus Tswv ntsia pom tej uas peb ua rau lwm tus thiab tus Tswv yuav txiav txim rau peb raws li tej uas peb tau ua rau lwm tus lawm (nqe 12-13). Txhua tus neeg uas nyob ib ncig peb txawm yog lawv yuav zoo li cas los lawv kuj puavleej tau tus Tswv tsim zoo li Vajtswv tus yam ntxwv, puavleej yog cov neeg uas tau tus Tswv Yexus hlub thiab zoo siab tuag theej. Cia siab hais tias peb txhua tus yuav cia kev hlub kovyeej txhua yam kev xav phem.
Thov Vajtswv,
Tus Tswv, ua Koj tsaug vim Koj Txojlus taw qhia rau nyuam yaus pom tias ua neej xaiv ntsejmuag ces yog kev txhaum, tsis raws li txoj cai thiab tus Tswv koj tus dej siab. Thov kom hnub txiav txim, nyuam yaus tsis raug txiav txim vim xaiv ntsejmuag, tiamsis yuav tau tus Tswv koj qhuas vim nyuam yaus tau ua neej hlub tshua txhua tus. Nyuam yaus tuav Yexus Khetos lub npe thov, A-mees.
Peb cheem tsum ua dabtsi kom tav tau kev xaiv ntsejmuag hauv Pawg ntseeg?
Nyeem Vajluskub hauv peb lub xyoo: 2 Xamuyees 17
Kênh Youtube BHKTHN:
