Loos 11:1-10
Nqe cim:
“Ib yam nkaus li ntawd, nimno Vajtswv twb xaiv tau ib nyuag pab tseg lawm, Vajtswv hlub lawv kawg li” (Loos 11:5)
Lus nug rau sawvdaws xav:
– Timthawj Paulus hais txog ob qhov pivxam twg kom pom Vajtswv ncaj ncees rau haivneeg tau xaiv?
– Ib nyuag feem haivneeg tau xaiv seem tseg cia raws li txoj kev hlub xaiv lawm, yog hais dab tsi txog Vajtswv?
– Zaj kawm hnub no ntuas peb yam dab tsi?
Vajtswv xaus lus hais tias cov Yixalayees yog ib haivneeg tsis mloog lus thiab tawv ncauj (Loos 10:21), Nws pub txoj kev hlub ua ntej rau lwm haivneeg kom cov Yixalayees chim thiab khib. Vim li ntawd, timthawj Paulus rho tawm ib lolus nug tseemceeb: “Vajtswv twb tso nws haivneeg tseg lawm los?” Paulus teb meej “Yeej tsis tau muab tso tseg li!”. Paulus thiaj hais txog 2 qho pivxam los ua timkhawv Vajtswv ncaj ncees tsis muaj hnub Nws tso cov Yixalayees tseg, txawm yog lawv ntxeev siab rau Nws losxij.
Tim 1, qhov uas Paulus tau saj lawm, nws yog ib tug neeg Yixalayees, cajces Anplahas, xeem Npeeyamees, yog tus uas tau tawmtsam Tswv Yexus, tsim txom thiab caum nrhiav Tswv Yexus cov thwjtim tua. Tiamsis Vajtswv yeej tsis tso nws tseg, Tswv Yexus qhia Paulus paub Nws ntawm txoj kev mus rau Damaxes (Tes Haujlwm 9). Tswv Yexus hu Paulus los ua ib tug timthawj cia ua timkhawv rau cov Yixalayees thiab cais nws cia tshaj tawm txoj moo Zoo rau lwm haivneeg (Tes Haujlwm 13:2). Tim 2, nws rho Vajluskub hauv 1 Vajntxwv 19:10, 18, thaum uas tus cev lus Eliyas poob rau lub sijhawm uas txomnyem heev, cov Yixalayees tau ntxeev siab rau Vajtswv, rhuav tej thaj fij khoom pov tseg, siv ntaj tua Vajtswv cov cev lus. Tus cev lus Eliyas xav hais tias ntshai tsuas tshuav nws ib leeg xwb thiaj seem tsis tuag tiamsim tamsim no tseem raug caum nrhiav tua. Nws tas kev cia siab qaug zog thiab thov Vajtswv rho nws txojsia mus. Tiamsis Vajtswv qhia nws paub, tus Tswv twb tseg xya txhiab tus neeg tsis pe tus mlom Npa-as. Vajtswv ua ib tes haujlwm zoo kawg nkaus hauv lub sijhawm lub neej tsaus ntuj nti, yog li ntawd peb ntseeg ruaj khov Vajtswv yog tus ncaj ncees tswj rawv thiab Nws npaj tseg yam zoo tshaj plaws tseg rau Nws cov menyuam.
Timthawj Paulus qhia paub hauv cov Yixalayees “nimno Vajtswv twb xaiv tau ib nyuag pab tseg lawm, Vajtswv hlub lawv kawg li” lawv yog cov uas tau suav ncaj ncees los ntawm kev ntseeg Tswv Yexus (nqe 5-6). Tshuav feem coob cov Yixalayees yog cov uas caum raws txoj kevcai kom tau suav ncaj ncees tiamsis lawv tsis tau yam uas lawv nrhiav (nqe 7), Vajtswv cia rau lawv tsaus ntuj nti, “lawv muaj qhov muag tiamsis lawv tsis pom kev”, lawv mus raws li lawv kev ntshaw los txog rau niaj nim no (nqe 8; 2 Kevcai 29:4). Tiamsis Vajtswv ncaj ncees Nws ua raws li Nws tau coglus rau lawv cov yawg koob lawm. Nws tseem ua siab ntev tos. Txawm li ntawd los lawv yuav tau suav ncaj ncees los ntawm nyias kev ntseeg. Vajtswv ncaj ncees Nws yeej tsis koom ua yam phem thiab tsis txo qis Nws txoj kev ua zoo. Niaj hnub nim no peb tau cawmdim yog los ntawm kev ntseeg yeej tsis yog los ntawm tes haujlwm ua zoo. Tsis txhob nrhiav koob hmoov los ntawm tej uas yus muaj, vim koob hmoov Vajtswv pub yog los ntawm kev hlub thiab Nws lub siab hlub tshua xwb.
Thov Vajtswv,
Vajtswv, nyuam yaus ua Koj tsaug vim Koj yog tus ncajncees thiab puv nkaus qhov tseeb. Thov pab kom nyuam yaus txawj hwm Koj, mus raws nraim Koj txoj kev kom paub meej tshaj Koj txoj kev ncajncees thiab qhov tseeb. Nyuam yaus tuav Yexus Khetos lub npe thov, Amees.
Peb puas siv peb tes haujlwm zoo los pauv Vajtswv txoj kev hlub?
Nyeem Vajluskub hauv peb lub xyoo: 2 Xamuyees 9
Kênh Youtube BHKTHN:
