Klei Aê Diê Blŭ: Y‑Mathiơ 18:15-20
Êlan kliăng: “Kâo lŏ lač kơ diih, tơdah dua čô hlăm phung diih ti lăn ala sa ai akâo ya mnơ̆ng diih čiăng, Ama Kâo hlăm adiê srăng ngă brei kơ diñu.” (Y‑Mathiơ 18:19)
Klei êmuh ksiêm mĭn: Si bruă klam hŏng hdơ̆ng găp kơ sa čô đaŏ kơ Krist hlăm phung biăp Khua Yang? Si hdră êlan ngă čiăng kơ phung đăo kơ Krist dôk êđăp ênang hdơ̆ng găp? Ya mta klei yuôm čiăng mâo hlăm klei drei wah lač jih jang, čiăng kơ Khua Yang mă tŭ?
Khua Yang Yêsu dôk lač kơ sa êpul phung biăp ênŭm ênap, leh anăn Ñu amâo čiăng ôh sa drei klah đuĕ mơ̆ng êpul (Y‑Mathiơ 18:12-14). Lŏ čuê hlăm trăn anei, Khua Yang ktrâo atăt dŭm knhuang brei ngă hĕ, čiăng djă pioh klei êđăp ênang hlăm hdơ̆ng phung đăo. Klei Khua Yang kñăm čiăng kơ drei dôk hdĭp mâo bruă klam hdơ̆ng găp, čiăng kơ đăm bi luč ôh biăp hlăm êpul Ñu, êpul anăn jing gŏ sang, êpul điêt, êpul djă bruă, Phung Sang Aê Diê. Ƀiădah lĕ, hlăm klei ngă bruă hrăm mbĭt hdơ̆ng phung mnuih soh, dleh yơh tlaih mơ̆ng klei bi têč hnêč, bi ruă êka hdơ̆ng găp. Klei hmăi jhat ñu atăt kơ klei bi kah phung, bi luč klei êđăp ênang hdơ̆ng pô, wăt bi kgăn klei drei bi mguôp hŏng Khua Yang mơh (Y‑Markôs 11:25). Čiăng djă pioh klei êđăp ênang hdơ̆ng găp, brei ñĕ đuĕ mơ̆ng klei bi têč hnêč, mpŭ kơ mnuih mkăn, leh anăn kăp bi pap brei kơ hdơ̆ng pô (êlan 15-22).
Khua Yang Yêsu uêñ mtô drei hdră êlan mkra msir tơdah mâo mnuih ngă soh hŏng drei (êlan 15-20). Mđing kơ Klei Blŭ Khua Yang mtô tinei, wăt drei amâo ngă soh dưn, ăt mơak ai tiê kăp bi grăng mơh! Êjai bi grăng, brei êlâo hĭn răng kơ kơhưm kơ pô ngă soh, kyuanăn mtă mtăn “hjăn hdơ̆ng diih”. Knŏng tơdah pô ngă soh amâo čiăng hmư̆ ôh, snăn kơh jak ba sa dua čô mbĭt. Snăn klei kñăm knhal tuč Khua Yang čiăng jing “ih lŏ mâo ayŏng adei” amâo djŏ ôh mgô̆ mnuih mkăn brei akâo klei pap kơ drei ti anăp jih jang čiăng arăng thâo kơ drei amâo soh ôh. Kdlưn hĭn kơ jih jang hlăm klei bi grăng, jih dua čô wah lač mbĭt hdơ̆ng pô (êlan 19). Tơdah klei bi mguôp jih dua čô êđăp ênang leh, snăn klei diñu wah lač “Ama Kâo hlăm adiê srăng brei kơ diñu” leh anăn Khua Yang srăng dôk mbĭt hŏng diñu.
Klei sa ai hlăm sa êpul biăp Khua Yang jing mta phŭn yuôm hĭn čiăng kơ klei drei wah lač leh anăn kkuh mpŭ, Khua Yang srăng mă tŭ. Hlăm klei wah lač jih jang (Y‑Mathiơ 6:9-13), Khua Yang ăt mtô mơh drei wah lač hlăm klei mĭn sa ai hŏng klei pap brei kơ mnuih mkăn, čiăng kơ Khua Yang pap brei kơ drei: “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh” (Y‑Mathiơ 6:12). Êlan čiăng kơ tơdah wah lač jih jang Khua Yang mđing hmư̆ jing klei dôk êđăp ênang hdơ̆ng pô, sa ai, amâo djŏ ôh kyua klei wah lač thâo yua boh blŭ jăk siam, wah lač dlông, amâodah mñă wĭt mñă nao msĕ si răk klei bhiăn đăo hŏng klei amâo mâo mĭn. Kyuanăn, akâo kơ Khua Yang brei drei dôk hdĭp mâo klei bi hmô, mpŭ kơ mnuih mkăn hĭn kơ pô, leh anăn bi pap brei kơ hdơ̆ng pô, čiăng kơ Khua Yang dôk mbĭt, mđing hmư̆ klei drei wah lač jih jang.
Si ngă klei drei wah lač hlăm gŏ sang, êpul điêt drei Khua Yang hmư̆ leh anăn wĭt lač mơ̆? Ya ngă?
Wah lač: Ơ Ama hmei dôk hlăm adiê! Brei kâo tui duah klei êđăp ênang nanao hŏng phung ayŏng amai adei, kăp pap brei hdơ̆ng găp, thâo bi mpŭ čiăng kơ klei hmei wah lač Khua Yang hmư̆ nanao leh anăn wĭt lač. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 4
Kênh Youtube BHKTHN:
