Mathais 18:15-20
Nqe cim:
“Kuv qhia ntxiv rau nej hais tias, yog nej cov uas nyob hauv ntiajteb no muaj ob leeg ua ib lub siab thov yam twg, kuv Txiv tus uas nyob saum ntuj ceebtsheej yuav pub yam ntawd rau nkawd” (Mathais 18:19)
Lus nug rau sawvdaws xav:
– Cov ntseeg muaj feem xyuam li cas hauv Vajtswv pab yaj?
– Ua li cas kom cov ntseeg ceev tau kev sib koom ua ke?
– Peb kev koom thov Vajtswv ua ke cheemtsum muaj yam tseemceeb dab tsi kom tau Vajtswv teb peb tej lus thov?
Tswv Yexus tabtom hais txog ib pab yaj uas zoo kawg nkaus thiab Nws tsis xav kom muaj ib tug yuam kev poob hauv pab ntawd mus (Mathais 18:12-14). Txuas ntxiv hauv ntu no, Tswv Yexus qhia txhua kauj ruam pab kom ceev tau kev sib raug zoo ntawm cov ntseeg hauv tej pab pawg. Homphiaj Vajtswv xav kom peb ua neej txawj sib hlub sib pab kom tsis muaj ib tug yaj hauv Nws pab yaj poob mus, pab ntawd yog tsev neeg, txhua pab pawg hauv pawg ntseeg thiab pawg ntseeg. Tiamsis hauv kev pehawm, ua haujlwm ua ke nrog rau cov neeg txhaum, qhov uas ua rau lwm tus yuam kev thiab tu siab yeej yuav zam tsis dhau. Qhov ntawd tsis yog yuav ua rau peb sib faib, poob kev sib raug zoo xwb tiamsis tseem yuav tav peb kev sib txuas nrog Vajtswv thiab (Malakaus 11:25). Cia kom ceev tau kev sib raug zoo peb yuavtsum zam tsis ua lwm tus yuam kev, hwm lwm tus thiab txawj sib zam txim (nqe 15-22).
Tswv Yexus ua tib zoo qhia peb txog qhov uas daws teebmeem thaum muaj neeg ua txhaum rau peb (nqe 15-20). Nco ntsoov Tswv Yexus lolus qhia no, kiag thaum peb twb tsis yog tus uas ua txhaum los peb yuavtsum ua tib zoo hais kom sib haum. Thaum sib hais peb yuavtsum ceev tsis rhuav tus ua txhaum ntsejmuag, Tswv Yexus hais tias, nrog nws tham “thaum neb ob leeg xwb”. Tsuas yog thaum tus ua txhaum tsis mloog, mam li cheemtsum coob tus ntxiv nrog mus. Yog li ntawd, lub homphiaj kawg uas Vajtswv xav tau yog “tau nws rov los ua koj kwvtij li qub” tsis tau yuam kom lwm tus thov txim yus tabmeeg sawvdaws daws peb kev txhaum. Qhov uas yuav sib raug zoo tau yog ob tug yuav tau sib koom thov Vajtswv ua ke (nqe 19). Thaum txoj kev sib txuas ntawm nkawd twb muaj kev sib raug zoo lawm ces nkawd tej lus thov, thov yam twg yuav tau Vajtswv “pub yam ntawd rau nkawd” thiab Vajtswv yuav nyob nrog nkawd.
Kev koom siab ntawm Vajtswv pab yaj yog yam uas tseemceeb dua huv tibsi kom tej lus thov thiab kev pehawm ntawm peb tau Vajtswv zoo siab txais yuav. Hauv zaj lus thov Vajtswv (Mathais 6:9-13), Tswv Yexus kuj qhia peb thov Vajtswv hauv kev koom siab, zam txim rau lwm tus kom thiaj tau Vajtswv zam txim: “Thov koj zam txim rau peb ib yam li peb twb zam txim rau cov uas ua txhaum rau peb lawm” (Mathais 6:12). Qhov uas cia kom thaum thov Vajtswv ua ke tau Vajtswv teb yog kev sib raug zoo, koom siab, ntawd tsis yog zaj lus thov Vajtswv li kev coj noj coj ua, thov ntev, thov mus thov los li nyeem ib zaj lus tsis muaj qab hau. Vim li ntawd thov Vajtswv pab kom peb ua tau tus qauv zoo, saib taus lwm tus thiab sib zam txim, Vajtswv thiaj nyob nrog peb thiab teb peb tej pab pawg tej lus thov.
Thov Vajtswv,
Peb Leej Txiv tus uas nyob saum ntuj! Thov pab kom nyuam yaus muaj kev sib raug zoo nrog kwjtij zej zos, sib zam txim, sib hwm hauv kev thov Vajtswv kom tau Koj teb peb tej lus thov. Nyuam yaus tuav Yexus Khetos lub npe thov, Amees.
Kev thov Vajtswv hauv peb tsevneeg thiab ntawm tej pab pawg puas tau Vajtswv teb? Vim li cas?
Nyeem Vajluskub hauv peb lub xyoo: 2 Xamuyees 4
Kênh Youtube BHKTHN:
