Klei Aê Diê Blŭ: Rôm 10:13-17
Êlan kliăng: “Leh anăn si mnuih dưi mtô tơdah arăng amâo tiŏ nao diñu ôh? Tui si Klei Aê Diê Blŭ čih leh, “Siam jăk yơh jơ̆ng phung nao hưn klei mrâo mrang jăk!” (Rôm 10:15)
Klei êmuh ksiêm mĭn: Mơ̆ng anôk kčưm bruă hiu hưn Klei Mrâo Mrang Jăk? Ya bruă klam kơ phung hiu hưn Klei Mrâo Mrang Jăk? Ya klei Khua ƀĭng kna Y‑Pôl čiăng lač tơdah ñu čih “amâo djŏ jih jang mnuih ôh gưt kơ Klei Mrâo Mrang Jăk”? Ya klei mñă bi hdơr kơ drei tơdah hiu hưn bi sĭt kơ Khua Yang?
Hlăm hră čih mơĭt Rôm kdrêč 10, Khua ƀĭng kna Y‑Pôl lač kơ klei găp djuê ƀuôn sang ñu amâo čiăng đăo ôh, hlăk anăn knŏng ƀiă mnuih đăo kơ Yang Krist. Klei amâo tŭ jing anei, kyuadah diñu knang kơ klei kpă ênô diñu pô, ƀiădah amâo knang ôh kơ klei kpă ênô Aê Diê hŏng klei đăo kơ Yang Krist. Dơ̆ng mơ̆ng anăn yơh, ñu kñăm bruă hiu hưn kơ Khua Yang Yêsu, jing phŭn kơ “klei đăo”. Boh phŭn kơ Klei Mrâo Mrang klă mngač leh anăn ênưih thâo săng snăk, “Hlei pô iêô kwưh kơ anăn Khua Yang srăng tlaih.” (êlan 13). Msĕ si klei ñu atăt gai leh, mta čuăn kơ bruă hiu hưn Klei Mrâo Mrang Jăk kčưm mơ̆ng anôk tiŏ nao mnuih hưn kơ arăng dưi hmư̆ čiăng thâo kral Khua Yang Yêsu yơh jing Yang Krist, Anak Aê Diê. Bruă klam kơ phung hiu hưn Klei Mrâo Mrang Jăk amâodah kơ phung hưn bi sĭt tal êlâo hĭn jing mâo “jơ̆ng” brei “nao”. Ktuê hƀuê ênuk klei đĭ kyar Phung Sang Aê Diê, mâo lu hdră êlan bi lar bŏ hŏng klei thâo mčeh mjing jăk êdi, leh anăn dưi mă yua tui si djŏ găl, tơl wăt hlăm anôk mĭndah dleh dlan snăk. Bruă klam lŏ čuê ngă nanao amâo dưi kƀah ôh, jing hưn kơ Khua Yang. Hŏng klei đĭ kyar hlăm bruă bi mđung asăp blŭ ară anei, klei blŭ “hưn” dưi bi lar hŏng klei hmư̆, wăt klei dlăng leh anăn hŏng lu mta mnơ̆ng yua mdê mdê, msĕ si hră mơar, rup mdah, hdruôm hră pioh hưn bi sĭt, Hdruôm hră Klei Aê Diê Blŭ, hŏng mnơ̆ng yua mđung rup, mđung asăp, internet… jing klei myun dưi “hưn” hŏng klei mguôp kdrêč pô, kah mbha, hưn bi sĭt.
Kdlưn hĭn kơnăn, čiăng bi mđĭ ai phung hiu hưn Klei Mrâo Mrang Jăk, Khua ƀĭng kna Y‑Pôl hrêč mă sa êlan hlăm Khua pô hưn êlâo Y‑Êsai snei, amâo djŏ jih jang ôh srăng đăo tơdah leh hmư̆ klei hưn bi sĭt. Mâo lu phŭn knhal mdê mdê, amâodah kyua ai tiê khăng, amâodah diñu ka thâo săng klă, amâodah ka truh mông Khua Yang čuă diñu … klei anăn čiăng lač brei drei ăt kjăp ai tiê gĭr nanao hlăm klei hưn kơ Khua Yang Yêsu. Amâo djŏ knŏng hưn sa blư̆ ôh, ƀiădah lu blư̆, amâo djŏ knŏng hưn hŏng klei blŭ ƀiădah mbĭt hŏng knuih hdĭp klei đăo thâo khăp, msĕ si Khua ƀĭng kna Y‑Pêtrôs pô, mtô leh snei, “Brei diih dôk dơ̆ng ƀơ̆ng huă jăk nanao ti krah phung amâo đăo, čiăng kơ tơdah diñu mčeh kơ diih jing mnuih ngă jhat, diñu dưi ƀuh bruă jăk diih ngă leh anăn mpŭ mni kơ Aê Diê ti hruê Ñu srăng lŏ hriê.” (I Y‑Pêtrôs 2:12). Mâo đa mnuih đăo mtam kơ Khua Yang hlăm mông hmư̆ hưn bi sĭt tal êlâo, msĕ si sa čô khua mkriâo Êthiôpi (Bruă Phung Khua Ƀĭng Kna 8:36-39), ƀiădah ăt mâo đa mnuih tơl truh hruê Khua Yang nao čuă, tơl lu pluh thŭn êdei kơh diñu tŭ jum Khua Yang, msĕ si drei tuôm hmư̆ leh anăn bi knal leh. Kyuanăn, đăm drei êdu ai luč klei čang hmăng ôh kơ klei diñu ăt srăng đăo kơ Khua Yang mơh, năng ai mâo sa hruê êdei. Klah čŭn, “mtô klei Aê Diê blŭ, brei ih gĭr thâodah mông găl amâodah amâo găl ôh, mblang bi klă, ƀuah, mđĭ ai, đăm kƀah ôh klei gĭr leh anăn klei mtô.” (II Y‑Timôthê 4:2).
Ya klei bi kgăn drei amâo jih ai tiê ôh hiu hưn bi sĭt kơ Khua Yang?
Wah lač: Ơ Ama Doh Jăk, akâo Ih tiŏ nao kâo leh anăn brei klei pap kơ kâo, čiăng kơ kâo gĭr nanao hiu hưn Klei Mrâo Mrang Jăk Khua Yang. Thâodah mông găl amâodah amâo găl ôh, brei kâo ăt hưn kơ Khua Yang amâo mdei ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
