Lukas 10:1-11
Nqe cim:
“Cov nplej uas zoo hlais lawm muaj ntau, tiamsis cov neeg uas hlais muaj tsawg. Nej cia li thov tus tswv teb kom nws txib dua ib co neeg mus pab hlais nws cov nplej.” (Lukas 10:2)
Lus nug rau sawvdaws xav:
– Tswv Yexus txib cov thwjtim mus qhov twg?
– Vim li cas tus Tswv muab lawv piv zoo li cov yaj mus rau hauv pab hma?
– Nws qhia rau lawv zoo li cas?
– Tus Tswv tabtom nqua hu txhua tus li cas?
Tshwj 12 tug thwjtim, tseem muaj ntxiv 70 leej thwjtim kuj tau Tswv Yexus txib ua tej nkawm mus qhia Txojmoo Zoo rau hauv tej nroog. Tus Tswv hais rau lawv txog qhov kev cheem tsum maj heev ntawm cov nplej uas twb siav siav lawm tiamsis tsis muaj neeg hlais. Nws pom tseem tshuav ntau leej yuam kev tiamsis tsis muaj txaus neeg mus qhia Vajtswv lub Tebchaws rau lawv. Nov yog qhov vimchiv vim li cas tus Tswv txib cov thwjtim tawm mus coj neeg los cuag Nws.
Tswv Yexus muab cov thwjtim piv zoo li “pab yaj mus rau hauv pab hma” (nqe 3). Muaj tseeb li ntawd tiag! Thaum lawv rau hauv ntiajteb qhia txog Vajtswv lub Tebchaws, yeej yuav muaj yeebncuab tawmtsam thiab nkaug. Lawv yuav tsum faj ntsoov thiab ua tib zoo saib, yuav tsum “ntse li nab, siab mos muag li tus nquab” (Mathais 10:16). Nimno, cov ntseeg Yexus kuj yuav tsum paub thiab ua tib zoo saib thaum tawm mus ua timkhawv qhia txog tus Tswv. Peb yog cov uas tau tus Tswv hu los ua tej uas txawv li neeg ntiajteb ua, yog cov raug txib mus hauv ntiajteb thiab yog timkhawv qhia Tswv Yexus zaj rau tibneeg.
Tswv Yexus tsis yog txib cov thwjtim mus xwb Nws tseem ua tib zoo qhia rau lawv thiab. Nws muab tej lus taw qhia los qhia rau lawv. Thawj qhov, lawv tsis tas nqa ntau yam mus, tsuas nqa tej uas cheemtsum xwb. Txuas ntxiv, lawv yuav tsum nco ntsoov rau tes haujlwm uas tau txib xwb txhob faib siab mus rau (nqe 4). Tsimnyog lawv txais tej khoom pab uas lwm tus muab kom lawv thiaj mus taus qhia tus Tswv zaj“rau qhov yeej tsimnyog tus uas ua haujlwm tau nqi zog.” (nqe 5-9). Qhov kawg, lawv tsis txhob poob siab thaum neeg tsis txais tos. Tus Tswv hais tias yog lawv tsis txais tos, cia li so tej plua av lo kotaw thiab mus rau lwm qhov. Tus Tswv paub ua ntej hais tias yuav muaj neeg tsis txais tos lawv, thiab Nws tabtom npaj rau cov thwjtim kom tiv taus tej kev nyuaj thaum mus ua timkhawv. Nyob kiag hauv Tswv Yexus kev ua haujlwm, kuj muaj qee zaug tej neeg sawvdaws tso Nws tseg thiab tsis nrog Nws mus lawm. Muaj cov neeg uas tsis lees yuav Nws, tsis mloog thiab tsis ua li Nws qhia. Peb tsis muaj qhov kev cia siab hais tias yus raug txawv tus Tswv raug. Timthawj Paulus ntuas hais tias: “peb tsis txhob nkees ua tej haujlwm zoo; yog peb pheej ua tsis tso tseg, muaj ib hnub peb yeej yuav tau sau xwb.” (Kalatias 6:9).
Nplej siav puv nras liaj, tiamsis cov uas mus hlais tsawg heev. Qhov no yog ib lub nra nyuaj thiab muaj ntau yam kev sim siab. Tus Tswv tabtom nqua hu cov ntseeg uas zoo siab hlo thiab muaj siab tawv qhawv mus hlais nplej. Peb yuav tsum paub tias: “Vajtswv lub Tebchaws los ze lawm” kom peb muaj zog tiv taus tej kev sim siab thiab fij hlo tus kheej mus hlais nplej.
Thov Vajtswv,
Tus Tswv, thov Koj pub rau nyuam yaus muaj lub siab tawv thiab txaus siab mus hlais nplej, ua tau tus tub zog tsis muaj qhov thuam tau nyob hauv Koj thaj teb sab ntsujnplig uas Koj txib nyuam yaus mus ua. Nyuam yaus tuav Tswv Yexus lub npe thov, Amees.
Peb puas txaus siab fij tus kheej mus hlais tus Tswv cov nplej?
Nyeem Vajluskub hauv peb lub xyoo: I Xamuyees 1
Kênh Youtube BHKTHN:
