Klei Aê Diê Blŭ: Y‑Luk 10:1-11
Êlan kliăng: “Ñu lač kơ digơ̆, “Mâo lu mdiê ksă, ƀiădah mâo ƀiă phung wiă. Snăn akâo bĕ kơ Khua pô hma brei tiŏ nao phung mă bruă srăng nao wiă.” (Y‑Luk 10:2)
Klei êmuh ksiêm mĭn: Ti anôk Khua Yang Yêsu tiŏ nao phung ƀĭng kna nao? Si ngă Khua Yang bi msĕ digơ̆ hŏng êđai biăp ti krah phung asâo tan? Si Khua Yang ktrâo atăt kơ digơ̆? Si Khua Yang dôk iêô mthưr grăp čô phung đăo?
Êngao kơ 12 čô khua ƀĭng kna dôk mbĭt jĕ giăm, lŏ mâo thiăm 70 čô ƀĭng kna mơh Khua Yang Yêsu tiŏ digơ̆ nao mdua mdua mŭt hlăm jih jang ƀuôn čiăng hiu hưn Klei Mrâo Mrang Jăk. Khua Yang lač kơ digơ̆ kơ klei ruăt bi hmao kơ mdiê ksă leh, ƀiădah mâo ƀiă phung wiă. Ñu ƀuh adôk lu lĭn mnuih dôk rai luč ƀiădah amâo djăp ôh mnuih hiu hưn kơ Ƀuôn Ala Mtao Aê Diê. Anăn yơh jing phŭn knhal klei Khua Yang tiŏ nao phung ƀĭng kna nao mŭt hlăm yan wiă čiăng wiă lu mngăt mnuih wĭt kơ Khua Yang.
Khua Yang Yêsu bi msĕ phung ƀĭng kna hŏng “êđai biăp ti krah asâo tan” (êlan 3). Djŏ sĭt snăn mơh! Hlăk digơ̆ nao mŭt hlăm lăn ala čiăng hiu hưn kơ Ƀuôn Ala Mtao Adiê, sĭt nik srăng tuôm hŏng klei phung roh ksŭng bi kdơ̆ng. Brei digơ̆ thâo mđing leh anăn răng nanao, brei thâo “thâo răng msĕ si ala leh anăn ênang msĕ si mgăm.” (Y‑Mathiơ 10:16). Hruê anei, brei Phung đăo kơ Krist ăt djăl hmăr thâo kral leh anăn răng snăk msĕ mơh êjai hiu hưn kơ Khua Yang. Drei jing phung Khua Yang iêô čiăng mkŏ mjing klei mdê hĭn ti krah lăn ala, jing phung mâo klei tiŏ nao mŭt hlăm lăn ala leh anăn jing dĭng ktang Khua Yang Yêsu kơ jih jang mnuih ƀuôn sang.
Khua Yang Yêsu amâo knŏng tiŏ nao phung ƀĭng kna nao ƀiădah amâo mprăp brei leh anăn mtă mtăn ksă êmă. Ñu mtă mtăn ktrâo atăt sĭt tliêr êdi. Êlâo hĭn, digơ̆ amâo guôn djă ba mnơ̆ng yua gun hmun ôh, ƀiădah knŏng ƀiă pliê hdjul. Êdei anăn, brei digơ̆ knŏng bi mĭn kơ bruă jao hĭn kơ klei mkăn êjai ktuê êlan nao (êlan 4). Brei digơ̆ mă tŭ klei đru mơ̆ng mnuih mkăn jing mnơ̆ng yua čiăng dưi bi leh bruă Khua Yang jao kyuadah “mnuih mă bruă năng kơ klei mưn” (êlan 5-9). Knhal tuč, đăm êdu ai ôh tơdah arăng hngah. Khua Yang lač tơdah arăng amâo jum ôh, ktuh hĕ ƀruih đuôm ti jơ̆ng leh anăn nao kơ anôk mkăn. Khua Yang thâo êlâo srăng mâo mnuih hngah kơ digơ̆, leh anăn Ñu mprăp brei kơ phung ƀĭng kna ăt kăp drông wăt klei amâo tŭ dưn msĕ mơh tơdah hiu hưn klei đăo. Tơl wăt hlăm bruă Khua Yang Yêsu pô, ăt tuôm hŏng lu blư̆ arăng wir rŏng leh anăn amâo tui hlue Ñu ôh mơh. Mâo lu mnuih hngah kơ Ñu, amâo čiăng mđing hmư̆ leh anăn amâo ư ai mbĭt hŏng Ñu ôh. Drei msĕ mơh kăn hmăng hmưi mâo klei mdê hĭn hŏng Khua Yang rei. Khua ƀĭng kna Y‑Pôl mtă mtăn snei: “Đăm brei drei jing êmăn ôh hlăm klei ngă jăk, kyuadah tơdah drei amâo êdu ai ôh drei srăng wiă tơdah truh djŏ yan.” (Galati 6:9).
Mdiê ksă bŏ hma, ƀiădah knŏng ƀiă mnuih wiă. Anei yơh jing bruă klam dleh dlan leh anăn bŏ hŏng klei lông dlăng. Khua Yang dôk iêô mthưr grăp čô Phung đăo kơ Krist hmiêt mkăp leh anăn jhŏng mŭt hlăm yan wiă. Brei drei thâo săng nanao snei: “Ƀuôn Ala Mtao Aê Diê giăm truh leh” čiăng dưi mâo klei jhŏng ktang mtrŭt drei găn klei lông dlăng leh anăn čuăn ai tiê săn asei mŭt hlăm yan wiă.
Si ngă drei hmiêt mkăp săn asei mŭt hlăm yan wiă kơ Khua Yang mơ̆?
Wah lač: Ơ Khua Yang, akâo Ih brei kơ kâo klei jhŏng leh anăn hmiêt mkăp nao mŭt hlăm yan wiă, leh anăn jing pô ngă bruă amâo mâo anôk ƀuah ôh hlăm kdrăn hma klei hdĭp mngăt Khua Yang dôk iêô kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
