Klei Aê Diê Blŭ: Klei Čŏk Hia 5:19-22
Êlan kliăng: “Lŏ bi wĭt hmei bĕ, Ơ Yêhôwa, čiăng kơ hmei dưi lŏ wĭt; lŏ bi mrâo bĕ hruê hmei msĕ si mphŭn dô!” (Klei Čŏk Hia 5:21)
Klei êmuh ksiêm mĭn: Ti anăp klei ênguôt hnĭng, luč klei čang hmăng mơ̆ng klei hdĭp jing mnă, ya klei phung ƀuôn sang Aê Diê bi mklă? Diñu đăo ya klei Aê Diê dưi ngă hlăm klei hdĭp diñu? Ya klei drei ngă tơdah thâo pô dôk hlăm boh jhat mơ̆ng klei soh?
Phung ƀuôn sang Aê Diê thâo kơ klei dleh dlan pô dôk găn jing kyua klei soh diñu ngă leh hŏng Yêhôwa ngă kơ Aê Diê bi êdah klei Ñu ngêñ hŏng phung ƀuôn sang Israel. Ară anei phung ƀuôn sang Aê Diê amâo lŏ čiăng hdĭp hlăm klei knap mñai anei ôh, diñu kngưr ală dlăng kơ Yêhôwa jing Pô dôk hlăm jih jang ênuk, Jhưng Mtao Ñu adôk kjăp čiăng akâo kơ Aê Diê pap brei leh anăn đru. Phung ƀuôn sang Aê Diê thâo săng wăt tơdah boh klei riêng gah si jing snăn Aê Diê hŏng knuih Ñu amâo bi mlih. Amâo mâo ôh ya klei dưi bi mlih klei Ñu khăp leh anăn klei Ñu pap hŏng phung ƀuôn sang Ñu. Kyua anăn, Khua pô hưn êlâo Y-Yêrêmi jhŏng bi ala kơ phung ƀuôn sang Israel akâo kơ Aê Diê “lŏ bi wĭt hmei bĕ” jing akâo kơ Aê Diê bi mrâo diñu čiăng diñu dưi lŏ bi mrâo, kmhal klei soh wĭt hŏng Khua Yang, lŏ bi mrâo dŭm hruê diñu msĕ si mphŭn dô (êlan 21).
Leh hruê mlan sui hdĭp jing hlŭn leh anăn arăng ktư̆ juă, diñu mdih leh, čang hmăng dưi wĭt kơ Aê Diê, wir ƀô̆ mta hŏng klei soh jing klei êlâo kơ tŭ klei bi kmhal ăt diñu khăng ai tiê. Ƀiădah truh wưng ară anei tơdah găn leh djăp klei ênguôt hnĭng, knap mñai mơ̆ng klei bi kdơ̆ng snăn diñu čang hmăng lŏ hdĭp hlăm hruê mlan mâo Aê Diê kiă kriê, dưi dôk hlăm klei Ñu răng mgang. Diñu đăo sĭt mphŭn mơ̆ng klei wah lač anei, Yêhôwa srăng nao čhưn leh anăn ba diñu wĭt hŏng Aê Diê. Pô bŏ hŏng klei khăp, klei pap srăng pap brei, bi mrâo leh anăn hơêč hmưi kơ phung ƀuôn sang Ñu êbeh dlai. Êlan knhal tuč brei ƀuh klei đăo diñu, “Amâodah Ih tuôm hngah kơ hmei hlŏng lar mơ̆? Ih ăl kơ hmei êgao hnơ̆ng mơ̆?” (êlan 22 ). Anei jing ai tiê phung ƀuôn sang Aê Diê, đăo sĭt Aê Diê amâo srăng ăl kơ diñu truh knhal tuč ôh!
Drei amâo dưi ñĕ ôh kơ klei ngă soh hlăm klei hdĭp leh anăn ăt mâo mơh lu blư̆ klam boh jhat mơ̆ng klei soh. Tơdah drei thâo kral boh klei knap mñai pô dôk klam jing kyua ngă soh leh anăn bi ênguôt Aê Diê, snăn bruă brei drei ngă leh anăn ngă mtam jing akâo kơ Aê Diê bi mrâo čiăng drei kmhal klei soh wĭt kơ Aê Diê, ñĕ kơ êlan soh jhat msĕ si phung ƀuôn sang Aê Diê mphŭn dô. Aê Diê srăng bi mrâo dŭm hruê mlan jăk mơak mphŭn dô leh anăn drei dưi dôk nanao hlăm klei Ñu kiă kriê.
Drei kmhal mtam mơ̆ tơdah ngă soh?
Wah lač: Ơ Aê Diê! Kâo mơak snăk tơdah ksiêm mĭn leh anăn hơêč hmưi kơ Pô Dôk Hlŏng Lar, Amâo Bi Mlih. Akâo kơ Ih đru kâo pral hŏng klei Yang Mngăt Jăk mñă čiăng hmao kmhal klei soh, čiăng mâo Ih bi mrâo leh anăn bi mrâo hruê mlan jăk mơak tơdah kâo dôk hlăm klei Khua Yang kiă kriê. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
