Klei Aê Diê Blŭ: Y-Tit 1:10-14
Êlan kliăng: “Brei diñu dôk ñăt, kyuadah diñu bi rŭng jih găp djuê hlăm lu boh sang hŏng klei mtô amâo bhiăn mtô ôh kyua diñu čiăng ƀơ̆ng ngăn.” (Y-Tit 1:11)
Klei êmuh ksiêm mĭn: Hlei pô mtô soh anei leh anăn ya klei bi êdah? Ya bruă diñu ngă leh, leh anăn hŏng ya klei kñăm? Tơdah thâo kral pô mtô soh, ya knuih brei drei mâo?
Khua ƀĭng kna Y-Pôl hưn brei răng hlăm dŭm Phung Sang Aê Diê ti čar Kret mâo lu mnuih amâo gưt, mplư leh anăn bi mbha êpul (êlan 10). Diñu amâo jing phung bi đru đăo ôh ƀiădah jing phung mtô soh, hŏng tlâo mta êdah êdi. Tal sa, jing hlăm phung khăt klĭt leh. Diñu mtô čiăng mâo klei bi mtlaih, phung tue brei tŭ klei khăt klĭt leh anăn djă pioh klei bhiăn Yuđa. Tal dua, diñu ăt đăo hlăm klei yăl dliê đưm phung Yuđa amâo sĭt ôh (êlan 14). Tal tlâo, diñu mtrŭn hdră êlan tŭ klei knap mñai, kăm jih jang klei Aê Diê mtô jing jăk leh anăn doh (Y-Tit 1:14-15). Boh blŭ “Brei diñu dôk ñăt” hlăm êlan 11 jing brei phung mtô soh dôk ñăt, mkhư̆ diñu amâo dưi hiu mtô ôh klei soh hŏng Klei Aê Diê Blŭ. Y-Tit čiăng đru phung đăo lui klei đăo kơ klei yăl dliê amâo sĭt phung Yuđa leh anăn klei mtô mơ̆ng phung lui leh klei đăo sĭt.
Pô mtô soh “bi rŭng jih găp djuê hlăm lu boh sang hŏng klei mtô amâo bhiăn mtô ôh kyua diñu čiăng ƀơ̆ng ngăn” (êlan 11), mtô kơ klei mĭndah yuôm bhăn, blŭ jăk snăk ƀiădah hơăi mang leh anăn mplư phung hmư̆, amâo đru kơ phung đăo kơ Aê Diê hriê kơ prŏng hlăm klei đăo ôh. Kyua klei tŭ kơ pô, diñu mgưt ngă phung đăo kơ Khua Yang čiăng duah prăk, mâo thiăm bruă mă, thiăm klei tŭ dưn hlăm Phung Sang Aê Diê. Mâo sa klei pô čih klei duê Epimenides mâo lu mnuih dlăng msĕ si sa čô khua pô hưn êlâo lač leh djŏ, “Phung Kret luar nanao, jing phung hlô jhŏng, phung ră alah” (êlan 12). Kyua anăn Khua ƀĭng kna Y-Pôl mtă kơ Y-Tit brei ƀuah mkra bi ktang phung đăo Kret čiăng diñu dưi jing ktang hlăm klei đăo, đăm brei hlei pô arăng hing ang amâo jăk ôh.
Klei Khua ƀĭng kna Y-Pôl mtă kơ Y-Tit hlăm trăn Klei Aê Diê blŭ anei đru kơ drei hruê anei ƀuh klei bi knăl čiăng thâo kral pô mtô soh. Anăn jing phung mâo klei bi êdah kƀĭn klei mđing hlăm diñu pô hĭn kơ Khua Yang Yêsu Krist. Dŭm klei pô mtô soh mtô amâo đru kơ klei đăo drei hriê kơ prŏng ôh. Diñu amâo mñă ôh kơ klei myang Khua Yang Yêsu leh anăn klei myang mơ̆ng Klei Aê Diê Blŭ ƀiădah mtô kơ grăp čô bi mklă mơ̆ng klei thâo mĭn hjăn pô. Knuih brei drei mâo jing brei khut khat amâo dôk dơ̆ng mbĭt, amâo dôk gŭ mbĭt leh anăn amâo nao mbĭt ôh hŏng pô mtô soh. Khut khat amâo hmư̆ ôh klei mtô soh, ƀiădah hiu hưn nanao Klei sĭt nik jing Klei Blŭ mâo klei myang đru kơ phung mtô soh mdih lŏ wĭt đăo kơ Khua Yang Yêsu. Grăp čô drei brei hriăm Klei Aê Diê Blŭ čiăng thâo kral pô mtô soh leh anăn amâo tui hlue êlan soh čhuai ôh.
Drei mđing hriăm Klei Aê Diê Blŭ hrăm grăp hruê mơ̆?
Wah lač: Ơ Khua Yang, akâo kơ Ih đru kâo đăo kjăp kơ Khua Yang Yêsu, brei kâo klei thâo mĭn čiăng thâo săng Klei Aê Diê Blŭ. Akâo kơ Ih đru kâo êbat hlue êlan sĭt nik, ñĕ kơ klei mtô soh čhuai, leh anăn đru kơ phung ayŏng adei riêng gah kâo wĭt kơ Khua Yang. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
