Klei Aê Diê Blŭ: Y-Mathiơ 18:23-27
Êlan kliăng: “Kyua klei pap kơ gơ̆ khua dĭng buăl anăn phưi gơ̆ leh anăn bi êngiê nư gơ̆” (Y-Mathiơ 18:27)
Klei êmuh ksiêm mĭn: Dĭng buăl hlăm klei Khua Yang Yêsu yăl dliê srăng bi tlă anăp hŏng ya klei bi kmhal tơdah amâo tla jih ôh nư khua ñu? Ya ngă khua bi êngiê nư kơ dĭng buăl anei? Ya klei hriăm drei mâo kơ klei pap brei mơ̆ng klei yăl dliê anei?
Leh mtô kơ klei pap brei nanao (Y-Mathiơ 18:21-22), čiăng đru phung ƀĭng kna thâo ya ngă Ñu čiăng kơ digơ̆ thâo pap brei. Khua Yang Yêsu yăl dliê kơ klei sa čô dĭng buăl đuôm nư khua ñu. Tơdah mtao dơ̆ng tĭng nư, arăng atăt ba kơ ñu sa čô đuôm nư pluh êbâo talăng, anei jing sa ênoh prăk prŏng snăk. Tơdah amâo dưi tla ôh ñu pô leh anăn mô̆ anak ñu arăng čhĭ jing hlŭn, bi dŏ ngăn ñu arăng mă čiăng tla nư. Dĭng buăl anăn kwưh kơ khua gĭr hŏng ñu leh anăn ñu srăng tla jih nư. Khua thâo hŏng ênoh prăk anei wăt tơdah mă bruă jih hruê dôk hdĭp ñu kăn srăng dưi tla rei, kyuanăn, “Kyua klei pap kơ gơ̆ khua dĭng buăl anăn phưi gơ̆ leh anăn bi êngiê nư gơ̆” (êlan 27).
Mơ̆ng klei Khua Yang yăl dliê anei, drei thâo ya ngă khua phưi leh anăn bi êngiê jih nư kơ dĭng buăl anăn amâo djŏ kyua ñu jing sa čô mnuih jăk ôh, kyuadah klei ñu ƀuăn hŏng khua anăn jing klei ƀuăn khă bi mâo đuč, boh sĭt gơ̆ wăt tơdah ñu mă bruă hruê mlam hlŏng kơ djiê ăt kăn srăng mâo djăp prăk tla nư lei. Khua pap brei kyua klei ñu čuôn kơŭt kwưh akâo, khua čŏng čiăng pap brei kơ ñu leh anăn mô̆ anak ñu, amâo čiăng ôh arăng čhĭ jih gŏ sang ñu brei jing hlŭn tui si klei bhiăn. Anei jing klei pap brei êbeh dlai amâo mâo klei čoh čuăn ôh.
Hruê anei tơdah drei êmuh, “ya ngă kâo srăng pap brei?” Hdơr bĕ, Khua Yang bi êngiê leh mơh nư drei đuôm prŏng snăk, anăn jing nư klei soh. Hlăm klei phung ƀĭng kna wah lač, Khua Yang Yêsu mtô kơ phung ƀĭng kna ñu snei, “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh” (Y-Mathiơ 6:12). Hdơr bĕ, amâo djŏ Khua Yang knŏng pap brei nư klei soh drei hlăm hruê leh êgao ôh, ƀiădah Ñu ăt pap brei ară anei hin leh anăn wăt kơ êdei anăp mơh tơdah drei ngă soh leh anăn kmhal hŏng Ñu (I Y-Yôhan 1:9). Mơ̆ng drei đăo kơ Khua Yang, lu blư̆ drei ăt mâo klei čhuai leh anăn ngă soh hŏng Ñu, mâo klei soh drei ngă nanao lu blư̆. Khua Yang ăt gĭr hŏng drei leh anăn lu blư̆ Ñu pap brei leh klei soh drei. Klei jăk, leh anăn klei pap Khua Yang kơ klei hdĭp drei prŏng êdimima; kyuanăn, Ñu čiăng drei khăp leh anăn pap brei mơh kơ phung ayŏng adei drei, pap brei nanao amâo mâo knhal ôh. Akâo Khua Yang đru drei amâo srăng wơr bĭt ôh kơ klei jăk Ñu čiăng drei thâo pap brei.
Si ngă drei hdơr knga bi mni mơ̆ kơ klei pap prŏng Aê Diê dôk nanao hlăm klei hdĭp drei?
Wah lač: Ơ Khua Yang, kâo lač jăk kơ Ih kyuadah Ih pap brei leh nư klei soh kâo prŏng snăk. Đru kâo hdơr nanao kơ klei Ih bi mtlaih čiăng kơ kâo thâo pap brei kơ pô mkăn msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
