Pajlug 29:11
Nqe cim:
“Cov neeg ruam chim thiab npautaws sai, tiamsis cov neeg thoob tsib to nrog ua taus siab ntev thiab muab txojkev chim npog tseg” (Pajlug 29:11)
Lus nug rau sawvdaws xav:
– Ntawm “cov neeg ruam” thiab “cov neeg txawj ntse” muaj qhov kev sib txawv twg hauv kev xav thiab kev coj cwjpwm?
– Qhov ntawd tseemceeb npaum li cas rau hauv kev sib cav?
– Nqe Pajlug no pab peb daws tau tej lus sib cav li cas?
Nyob hauv phau txhais 2004 HMOWSV Pajlug 29:11 txhais li no: “Tus uas ruam yeej ua nws kev chim tshwm tag nrho los, tiamsis tus txawjntse tswj tau nws txojkev npau cia twjywm.”
Yog li ntawd “tus neeg ruam” yog tus uas maj nrawm nroos hais tagnrho txhua yam uas lawv xav hais, hais tej lus uas tsis tsimnyog hais, thiab hais tawm ntawm tus cwjpwm uas tsis tsimnyog muaj xws li “npau taws”. Ntau tus xav hais tias ntawd yog tus neeg ncaj, ua neej ncaj, xav li cas hais li ntawd, tiamsis Vajtswv Txojlus hais tias ntawd yog lub cim ntawm “tus neeg ruam”. Tus uas ib txwm qhuas hais tias yus yog “neeg ncaj” xav li cas hais li ntawd, yuav muaj ib hnub twg nws yuav pom hais tias yog tsis hais tawm ntshai yuav zoo dua, tiamsis thaum zeem paub li ntawd ces twb lig dhau lawm. Muaj ib txhia, thaum uas ntsib tej kev tsis sib haum lossis teebmeem hauv tuamtsev, tamsim ntawd lawv kub npau taws, hais tej lus hnyav rau sawvdaws, thiab maj nrawm mus rau saum huab cua hais lwm tus phem rau saum tej huab cua ntawd, thiab khiav ib lub pawg ntseeg mus rau ib lub pawg ntseeg nrhiav kev kom hais phem tau rau tus uas yus ntxub… Ceevfaj tsam peb poob zoo li no“Tus uas ruam yeej ua nws kev chim tshwm tag nrho los” tiamsis “tus txawjntse tswj tau nws txojkev npau cia twjywm” lolus no kuj txhais hais tias tswj yus nyob tus tus thiab ntsiag to (Phau Ntawv Nkauj 65:7; 89:9). Yog li ntawd, qhov teeb meem ntawm “tus neeg txawjntse” tsis yog tuav txoj kev npau taws tos lub sijhawm los txog, tiamsis yog vamkhom Vajtswv pab kom tshem tawm txoj npau taws mus zoo li “Vajtswv ua rau dej hiavtxwv lub suab uas nrov nroo ntws nyob ntsiag to; thiab ua rau tej dej uas ntas tuaj nrov qeeg nkaws nyob tus yees, Vajtswv ua rau neeg lub suab qw ntshoo nrooj nyob ntsiag mus”.
“Tus txawj ntse tswj tau nws txojkev npau cia twjywm” mus txog thaum twg? Txog thaum yog sijhawm thiab yog qhov chaw. Tej zaum peb yuav raug “tus neeg ruam” ua phem ntawm tej qhov chaw uas peb sawv nres, tiamsis “tus neeg txawjntse” yuav tsis tawmtsam tamsim ntawd, nws yuav thov Vajtswv pab kom nws zam txim thiab mus ntsib “tus neeg ruam” txhawb lawv zog thiab pab lawv. Tiamsis txhua yam yog yuav daws tau tsuas yog thaum peb rov qab los cuag Vajtswv xwb! Hais ua lwm seem, muaj ntau yam tsis yog yuav muab npog cia xwb, tiamsis yuavtsum hnov qab mus!
Yog ib tus ntseeg, peb yuavtsum tsis txhob hais lus dag (Efexus 4:25), thiab tsis txhob hais tej lus uas tawm tsam peb lub siab nyiam, tiamsis qhov ntawd tsis tau txhais hais tias yeej meem hais kom tagnrho txhua yam tawm, txawm tsis yog sijhawm, tsis yog chaw, tsis yog neeg. Peb yuav tsis hais lwm yam tshwj qhov tseeb, thov Vajtswv pub Nwg txoj kev txawjntse rau peb, kom peb paub cheemtsum hais rau leejtwg thiab tsis hais rau leejtwg kom tej peb hais txhawb tau tus mloog.
Thov Vajtswv:
Tus Tswv, thov pab nyuamyaus muaj Koj txoj kev txawjntse kom paub thaum twg yuav tsum hais thiab yuav hais dab tsi kom tsis txhob ua rau nyuamyaus cov kwv tij yuam kev ua txhaum. Tiamsis thov kom pab nyuam yaus paub hais tej lus uas tsimnyog hais kom txhawb tau lwm tus paub Koj. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas muaj kev txawjntse hais kom yog sijhawm, yog chaw, yog neeg?
Nyeem Vajluskub hauv peb lub xyoos: Yausuas 17
Kênh Youtube BHKTHN:
