Pajlug 29:9
Nqe cim:
“Thaum tus neeg ntse ua plaub nrog tus neeg ruam, tus neeg ruam tsuas yog luag, qw thiab cem phem xwb” (Pajlug 29:9)
Lus nug rau sawvdaws xav:
– Xalumoos qhia dab tsi rau “tus neeg txawj ntse” thaum sib cav nrog “tus neeg ruam”?
– Vim li cas nws yuav qhia tawm cov lus no?
– Peb siv cov lus qhia no li cas?
Vajntxwv Xalumoos hais tias, “…muaj sijhawm nyob ntsiag to thiab muaj sijhawm sib tham...” (Tej Lus Qhia 3:7). Ib tug neeg txawj ntse yeej paub thaum twg yuav tsum hais thiab hais rau leej twg. Muaj qee zaus yuavtsum nyob ntsiag to, thiab tseem muaj qee tus neeg yuavtsum tsis txhob nrog lawv sib cav. Ntawd yog hom neeg uas Vajntxwv Xalumoos hu ua “tus neeg ruam” hauv Pajlug, “tus neeg ruam” tsis yog hais txog cov uas tsis tau muaj kev kawm tiamsis yog cov neeg uas tawv ncauj, thiab khav theeb, lawv pheej xav tias lawv yog thiab tsis kam mloog lus. Lawv yog cov neeg uas tsis muaj lub siab ntshaw sab ntsujplig thiab tsis txais yuav Vajtswv Txoj kev txawjntse, lawv ntxub tej yam uas yuav nyob mus ib txhis (Pajlug 1:7; 10:8).
Hauv kev sib cav nrog “tus neeg ruam” yuav tshwm nws tus cwjpwm dhau los ntawm qhov uas nws “luag lossis cem” “Luag” tsis tau txhais hais tias luag zoo siab, tiamsis lub ntsiab luag, yog luag thuam, twv thiab ua saib tsis taus lwm tus. “Cem” lub ntsiab yog npau taws ua ib ce tshee hnyo, nws tswj tsis tau nws tus kheej thaum uas tabtom tawm tsam tus ntawm nws ib sab. Yog li ntawd, “tus neeg ruam” ntawm no muaj ob tug yam ntxwv: Luag thuam lossis cem npautaws, nws yuav tsis ua raws li kev sib cav, tsis mloog raws li qhov yog, tsis xav nrhiav kev hais kom sib haum. Lolus nyob ntsiag to, yog nres tsis ua haujlwm, tsis sib cav ntxiv lawm. Hais ua lwm seem, “tus neeg ruam” yuav cem kom yeej cov neeg uas tsis pom zoo li nws pom thiab nws haub yaum lwm “tus neeg ruam” li nws, tuaj nws tog tawmtsam qhov ntawd.
Peb cheem tsum nres qhov no los tshuaj xyuas peb lub neej saib. Kuv puas yog “tus neeg ruam” uas ib txwm khav txog kuv tus kheej thiab thuam lwm tus? Kuv puas yog ib tug neeg nyiam mloog cov neeg thuam lwm tus?
Ib “tus neeg txawjntse” – yog tus uas paub ntshai Vajtswv, paub mloog tej lus qhuab qhia txawjntse thiab muaj lub siab mloog lus – peb yuavtsum ua siab ntev rau tej lus tsis muaj hauvpaus hauvntsis ntawm “tus neeg ruam”, tsis quav ntsej txog thiab tsis txhob cia tej lus ntawd ua rau yus nyuaj siab, thiab tsis txhob nrhiav kev sib cav tsis zoo nrog “tus neeg ruam” ntxiv. Vim lub sij hawm muaj nqis heev, peb yuavtsum paub “…siv txhua lub sijhawm kom muaj nqis, rau qhov niaj hnub no tej neeg ua phem kawg li” (Efexaus 5:16), cia li siv txhua lub sijhawm los “…qhia Vajtswv Txojlus, tsis hais lub sijhawm twg los Koj yuav tsum qhia…” (2 Timautes 4:2), tiamsis yuavtsum zam “…tsis txhob nrog leejtwg sib cav txog tej zaj uas tsis muaj hauvpaus hauvntsis… qhov ntawd tsis tseemceeb thiab tsis muaj qabhau dabtsi li” (Titus 3:9).
Thov Vajtswv:
Tus Tswv, thov Koj pub txoj kev txawjntse rau nyuamyaus kom paub txais yuav Vajtswv Txojlus ntuas thiab lwm tus tej lus qhia. Thov pab nyuam yaus zeem paub txog “tus neeg ruam” kom zam dhau tsis nrog nws sib cav tej lus tsis zoo. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb sim tshuaj xyuas saib peb yog “tus neeg ruam” lossis yog “tus neeg ntse”?
Nyeem Vajluskub hauv peb lub xyoos: Yausuas 16
Kênh Youtube BHKTHN:
