Klei Aê Diê Blŭ: Klei Bi Hriêng 29:9
Êlan kliăng: “Tơdah sa čô thâo mĭn mâo klei bi mgăl hŏng sa čô mnuih mluk, mnuih mluk knŏng ăl amâodah tlao, amâo mâo klei êđăp ênang ôh.” (Klei Bi Hriêng 29:9)
Klei êmuh ksiêm mĭn: Ya klei Y-Salômôn mtă kơ “sa čô thâo mĭn” tơdah mâo klei bi mgăl hŏng “sa čô mnuih mluk”? Ya ngă ñu mtă klei anei? Si drei mă yua klei mtă anei?
Mtao Y-Salômôn lač snei: “hlăk dôk kriêp leh anăn hlăk blŭ” (Khua Pô Mtô 3:7). Mnuih thâo mĭn srăng thâo hbĭl blŭ leh anăn blŭ hŏng hlei pô. Mâo đa blư̆ brei thâo dôk kriêp, leh anăn hŏng đa đa mnuih amâo yuôm ôh bi tăng mgăl. Anăn jing phung mnuih mtao Y-Salômôn pia kơ diñu jing “mnuih mluk”. Hlăm Klei Bi Hriêng, “mnuih mluk” amâo djŏ lač kơ phung mnuih amâo hriăm hră mơar ôh, ƀiădah čiăng kơ phung mnuih khăng kŏ, leh anăn kyua klei mgao snăn diñu yap diñu pô yơh jing djŏ hĭn nanao, amâo čiăng hmư̆ klei arăng ôh. Anei ăt jing phung mnuih kƀah klei êpa mhao tui duah klei hdĭp mngăt leh anăn mă tŭ klei thâo mĭn mơ̆ng Aê Diê. Leh anăn diñu ăt jing phung bi êmut kơ mta mnơ̆ng jing dŏ pioh kơ ênuk hlŏng lar (Klei Bi Hriêng 1:7; 10:8).
Tinei, hlăm klei bi tăng mgăl, “mnuih mluk” bi êdah ai tiê ñu hŏng klei “ăl amâodah tlao”. Boh blŭ “ăl” tui si klei mblang klă jing ktư̆ yơ̆ng. Ktư̆ yơ̆ng jing sa boh blŭ bi êdah rup, lač kơ klei luč klei krơ̆ng ai tiê pô hlăk bi kdơ̆ng hŏng arăng. “Tlao” amâo djŏ klei tlao mơak ôh, ƀiădah hlăm klei mblang phŭn anăn jing klei tlao mưč kơ mnuih ti anăp pô. Snăn, “mnuih mluk” tinei mâo dua mta klei bi knăl: amâodah ăl, amâodah mưč, leh anăn mâo dua mta klei “mnuih mluk” amâo tui duah ôh êjai bi tăng mgăl, anăn jing blŭ klei sĭt klei djŏ kpă, leh anăn diñu amâo kñăm kơ klei bi grăng čiăng ba klei “êđăp ênang” ôh, boh blŭ čiăng kơ klei kriêp ênang, mjưh mdei klei ngă, mjưh mdei klei bi tăng mgăl. Blŭ mdê, “mnuih mluk” anei srăng ktưn hrưn ktư̆ juă phung amâo ư ai mbĭt hŏng ñu, hŏng klei ăl krêñ amâodah hŏng klei blŭ mưč, wăt lŏ kčŭt mčhur phung “mluk” mkăn dôk tui hlue ñu.
Brei drei mjưh ti anei čiăng lŏ ksiêm wĭt drei pô. Djŏ mơ̆ kâo jing “mnuih mluk” khăp hưn ktưn nanao kơ kâo pô leh anăn mưč mač mnuih mkăn? Djŏ mơ̆ kâo jing mnuih khăp hmư̆ klei phung mưč mač mnuih mkăn?
Tơdah jing “sa čô thâo mĭn” – jing mnuih huĭ mpŭ kơ Aê Diê, mđing hmư̆ klei mtô lač thâo mĭn leh anăn mâo klei mĭn gưt asăp – brei drei lui klei pap brei kơ klei “mnuih mluk” bi kdơ̆ng wĭt amâo mâo djŏ găl, đăm uêñ mĭn đei ôh leh anăn đăm brei klei diñu wĭt ngă amâo mâo djŏ găl anăn bi hmăi klei hdĭp drei, leh anăn ăt kăn čiăng tui tiŏ klei bi tăng mgăl hơăi mang hŏng “mnuih mluk” rei. Kyuadah hruê mmông jing yuôm bhăn snăn brei drei thâo “Yua hruê diih bi jăk, kyuadah ênuk anei jing jhat.” (Êphêsô 5:16), yua jih mmông găl čiăng pioh “mtô klei Aê Diê blŭ, brei ih gĭr thâodah mông găl amâodah amâo găl ôh, mblang bi klă, ƀuah, mđĭ ai, đăm kƀah ôh klei gĭr leh anăn klei mtô” (II Y-Timôthê 4:2), ƀiădah wăt mbĭt hŏng klei anăn “Ƀiădah brei đuĕ mơ̆ng klei bi tăng mluk, klei răk anăn phung aê, klei bi msao, leh anăn klei bi tăng kơ klei bhiăn, kyuadah klei anăn amâo yuôm ôh leh anăn hơăi mang.” (Y-Tit 3:9).
Ksiêm wĭt drei pô, si ngă drei jing “mnuih mluk” amâodah jing “sa čô thâo mĭn”?
Wah lač: Ơ Khua Yang, akâo Khua Yang brei kơ kâo klei thâo mĭn, čiăng thâo mă tŭ Klei Aê Diê Blŭ leh anăn klei ktrâo atăt mơ̆ng ayŏng amai adei pô. Brei kâo thâo kral “phung mnuih mluk” čiăng đăm mâo klei bi tăng mgăl hơăi mang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
