II Kevcai 30:1-6
Nqe cim:
“Tus Tswv yuav pub kom nej huamvam thiab vammeej tshaj nej cov yawgkoob.” (II Kevcai 30:5)
Lus nug rau sawvdaws xav:
– Vajtswv yuav ua dabtsi thaum Nws haivneeg lees kev txhaum tig los cuag Nws?
– Vim li cas Vajtswv txojkev zam txim yuav tsum yuav kev lees txim?
– Peb cheemtsum ua dabtsi thaum ua txhaum rau tus Tswv?
Hauv tshooj 29 feem ntau yog cov lus ceebtoom rau cov Yixalayees txog lub txim uas lawv raug vim tsis ua raws li tej lus cog tseg, ces nyob hauv tshooj 30 no hais txog Vajtswv nplooj siab hlub uas tsis paub kawg, Nws txaus siab hlo zam txim rau Nws haivneeg thaum lawv lees txim, tig rov los pehawm Nws. Vajtswv tsis yog lees yuav cov uas muaj lub siab lees txim xwb Nws tseem cheem tej lus foom tsis zoo uas lawv raug thiab. Tus Tswv hais ua ntej txog qhov uas Nws haivneeg yuav raug ntes coj mus ua qhev vim lawv tau ua txhaum loj heev rau Nws, tiamsis yog lawv thiab lawv cov xeebntxwv lees kev txhaum, txawm yog tabtom raug ua qhev nyob rau ntau qhov chaw, los tus Tswv yeej yuav coj lawv rov los nyob hauv lub tebchaws Nws pub rau lawv cov yawg koob, Nws yuav ua kom lawv vammeej thiab huam vam coob.
Txawm Vajtswv yog tus uas muaj kev hlub, los peb yuav tau nco ntsoov tias, tsis yog li ntawd es tus Tswv yuav lees yuav cov uas siab tawv niaj hnub ua txhaum. Ntu Vajluskub no qhia paub tus Tswv tsuas zam txim, coj cov Yixalayees los thaum uas lawv lees txim, tso lub neej qub tseg, tig rov los ua raws li tus Tswv tej kevcai xwb. Hais tau tias, Vajtswv txojkev zam txim rau Nws haivneeg muaj ib yam ua yog lees txim, tiamsis ua li no yog qhov zoo. Tiamsis txojkev zam txim uas tsis kom ua dabtsi, kam muab tus neeg txhaum tej kev txhaum tso tseg, txawm yog lawv tseem niaj hnub ua txhaum, ces qhov nov yog koom nrog lawv ua txhaum, nws tsis yog Vajtswv tus yamntxwv.
Ntu Vajluskub no yog ib cov lus nqua hu cov neeg uas twb ncaim ntawm Vajtswv mus ntev, ua raws siab nyiam ntsib ntau yam kev nyuaj nyob hauv kev ua neej. Vajtswv nplooj siab hlub loj kawg nkaus, Nws niaj hnub tos ntsoov cov neeg uas zeem paub lawv ua txhaum, txaus siab lees txim, tso lub neej qub tseg thiab tig los pehawm Nws. Yam uas txaus tu siab yog hauv kev ua neej, ntau zaus peb txajmuag rau yus tej kev txhaum, xav tias yam uas yus twb ua los tsis zoo thiab tus Tswv yuav tsis zam txim li lawm, yog li peb cia li tsis kam tig los cuag tus Tswv. Ces yim hnub yim tsau tob hauv txojkev txhaum! Peb yuav tau nco tias, tsis muaj ib txojkev txhaum twg loj uas tus Tswv yuav zam tsis tau li, tsuas yog ntshai lub siab tsis kam tig los lees txim cuag Nws xwb. Cia li lees txim tamsim no ua ntej yuav lig.
Thov Vajtswv,
Vajtswv, Koj yog tus uas tsis chim sai, muaj kev hlub thiab ua siab ntev. Hauv kev ua neej, nyuam yaus yeej khiav tsis dhau tej kev txhaum li. Thov Koj qhia kom nyuam yaus paub lees txim tamsim txhua zaus uas ua txhaum, kom nyuam yaus tau txais Koj txojkev zam txim. Nyuam yaus tuav Tswv Yexus lub npe thov, Amees.
Puas muaj yam dabtsi thaiv peb txojkev lees txim tig rov los cuag tus Tswv?
Nyeem Vajluskub hauv peb lub xyoo: Yausuas 5
Kênh Youtube BHKTHN:
