Yakaunpaus 1:2-4
Nqe cim:
“Cov kwvtij, thaum nej raug ntau yam kev nyuaj siab, nej cia li suav hais tias yog nej tau koob hmoov zoo kawg.” (Yakaunpaus 1:2)
Lus nug rau sawvdaws xav:
– Tus ntseeg Yexus yuav ntsib tej kev sim siab twg?
– Peb cheemtsum muaj tus cwjpwm zoo li cas?
– Yuav ua li cas muab kev sim siab saib ua kev zoo siab tau?
Sau tsab ntawv xa mus rau cov ntseeg Yexus uas yog neeg Yudais khiav mus nyob rau txhua qhov chaw, Yakaunpaus txhawb lawv lub zog kom muaj tus cwjpwm ua neej nyob nrog txojkev txomnyem, sim siab. Yakaunpaus piav txog kev txomnyem uas lawv raug yuav “raug ntau yam”, txhais tau hais tias muaj ntau yam kev nyuaj sib txawv los raug rau txhua seem hauv lawv lub neej. Tsab ntawv Henplais 11:35-38 hais txog txhua yam kev sim siab uas cov ntseeg tus Tswv yuav ntsib raug, seem kev xav, kev ua ntawm lub cev. Peb tus kheej twb yeej ntsib qee yam ntawd nyob hauv lub neej, raug neeg thuam, cais, hais saib tsis taus vim qhov los ntseeg tus Tswv, muaj qee tus raug ntaus, tua povtseg. Txawm muaj li ntawd los tsis yog yam tshiab, nws yog tej uas Tswv Yexus twb xub hais ua ntej, “neeg ntiajteb yuav tsimtxom nej” (Yauhas 16:33).
Thaum ntsib raug kev nyuaj, peb pheej xav khiav tawm lossis thov tus Tswv tshem tej ntawd ntawm peb mus. Tiamsis Yakaunpaus txhawb cov ntseeg lub zog kom cia li muab qhov kev sim siab ntawd saib ua “koob hmoov zoo kawg”. Qhov no yog kev zoo siab tiag tiag, zoo siab txaus nkaus, zoo siab dawbhuv. Yuav ua li cas kom muaj kev zoo siab txaus nkaus?
Tseeb tiag yog peb totaub kev sim siab ntsig txog peb txojkev ntseeg ces peb yuav zoo siab txaus nkaus. Yakaunpaus tsis hais tias cia li zoo siab, ua neej zoo ces txhua yam yuav dhau mus. Yakaunpaus txhais hais tias tus uas ntseeg Vajtswv yuav zoo siab txaus nkaus thaum nws ntsia pom tej nqi zog yav tom ntej tsis yog pheej ntsia tej kev nyuaj tamsim no xwb: “ua siab ntev nyiaj tej kev nyuaj siab”. Ua siab ntev yog rau siab ntso ua tej uas yus tabtom ua thaum ntsib kev nyuaj. Hauv sab ntsujplig, ua siab ntev hais txog txojkev ntseeg ruaj khov, tsis ua ywjfab ywjfwj, niaj hnub vamkhom tus Tswv thiab ua raws li Nws lub siab nyiam. Nov yog ib hauv cov kev ua zoo ntawm txojkev ntseeg, yog tus muaj Vaj Ntsujplig (Kalatias 5:22). Yakaunpaus txhais ntxiv tias kev ua siab ntev yuav pab tau tus ntseeg “ua tau neeg zoo kawg nkaus, tsis muaj ib qho uas lwm tus yuav thuam tau.” (nqe 4). Thiab nov yog qhov vimchiv uas peb muab kev sim siab saib ua kev zoo siab ntag.
Yuav muaj qee tus hauv peb cov no tabtom ntsib raug kev nyuaj los ntawm nyiaj txiag, tsis muaj kev sib raug zoo, menmyuam tsis mloog lus, qaug zog ua neej, ua haujlwm tsis nce qib, raug yuam…Tus Tswv tsis qhia kom peb zoo siab vim tej no. Tiamsis thaum peb tsa qhovmuag ntsia yav tom ntej, ntsia tej nqi zog ntawm txojkev ntseeg thiab lub siab ntseeg tus Tswv, peb yuav zoo siab heev thiab muaj zog khov kho nrog tus Tswv mus.
Thov Vajtswv,
Tus Tswv, Koj paub tej kev uas nyuam yaus raug. Thov Koj ntxiv dag zog kom nyuam yaus txaus peevxwm tiv kev sim siab komxwv txojkev ntseeg loj hlob, thiab tau txais Vajtswv txojkev npaj tseg mus ibtxhis. Nyuam yaus tuav Tswv Yexus lub npe thov, Amees.
Tej kev sim siab uas dhau tas pab tau peb loj hlob hauv tus Tswv zoo li cas?
Nyeem Vajluskub hauv peb lub xyoo: Yauhas 18
Kênh Youtube BHKTHN:
